ເຮົາມາຮູ້ຈັກອີກຫນຶ່ງແຫລ່ງທ່ອງທ່ຽວ ທາງທຳມະຊາດ ທີ່ຕັ້ງຢູ່ເຂດເຊປຽນ ເມືອງສະໜາມໄຊ, ແຂວງອັດຕະປື ນັ້ນກໍ່ແມ່ນນ້ຳຕົກຕາດ ແຂປ້ອງໄລ່ ເຊີ່ງຫ່າງຈາກຕົວເມືອງສາມັກຄີໄຊ ປະມານ 75 ກິໂລແມັດ. ນ້ຳຕົກຕາດດັ່ງກ່າວ ກຳເນີດຈາກສາຍນ້ຳເຊປຽນ, ຈຸດທີ່ຕັ້ງຢູ່ ພູໂຄນ ນອນໃນປ່າຄັນຊົນ ຂອງປ່າສະຫງວນແຫ່ງຊາດເຊປຽນ. ຢູ່ໃນສາຍນ້ຳດຽວກັນກັບນ້ຳຕົກຕາດແຊປ້ອງໄລສະຖານທີ່ດັ່ງກ່າວ ມີຄວາມກ້ວາງ ປະມານ 130 ແມັດ, ນ້ຳໂຕນເປັນສອງປ່ອງ ຝັ່ງຊ້າຍມີຄວາມສູງ 20 ແມັດ, ຝັ່ງຂວາ ມີຄວາມສູງ ປະມານ 35-40 ແມັດ. ໄລຍະການລົງສຳຫຼວດສະຖານທີ່ທ່ອງທ່ຽວນີ້ ໃນ ປີ 1998. ນ້ຳຕົກຕາດແຊປ່ອງໄລ້ ຫ່າງຈາກ ນ້ຳຕົກຕາດແຊພະ ປະມານ 8 ກິໂລແມັດ, ການເດີນທາງເຂົ້າໄປເຖິງເຂດດັ່ງກ່າວ ໄປໄດ້ທັງ 2 ລະດູ, ເດີນທາງດ້ວຍລົດໂອໂຕ, ລົກຈັກ, ລົດຖີບ ແລະ ລົດກະບະ. ສຳລັບການເດີນທາງຈາກເທດສະບານແຂວງ ທາງບົກ ປະມານ 75 ກິໂລແມັດ, ແຕ່ສຳລັບຍາມຝົນ ຈະມີຈຸດປ່ອງ ບໍລິການທີ່ບ້ານໃໜ່ ຫ່າງຈາກເທດສະບານແຂວງ ປະມານ 55 ກິໂລແມັດ, ຈາກນັ້ນ ກໍ່ຂີ່ເຮືອຫາງຍາວໄປທາງນ້ຳ ເຖິງທ່າເຮືອ ສະໝອງພາກ ປະມານ 01 ຊົ່ວໂມງເຄິ່ງ, ສືບຕໍ່ຍ່າງປ່າຊົມທຳມະຊາດ ໄປເຖິງແຊພະ ປະມານ 45 ນາທີ, ຖ້າຈະໄປແຊປ້ອງໄລ ກໍ່ຕ້ອງໃຊ້ເວລາຍ່າງຕື່ມອີກປະມານ 2 ຊົ່ວໂມງ, ລາຍການນີ້ຕ້ອງມີເວລາພັກແຮມ ຢູ່ເຮືອນພັກຊາວບ້ານ ເປັນລາຍການທ່ອງທ່ຽວ ແບບອະນຸລັກ ໂປຣແກມ2 ວັນ 01 ຄືນ.
Editor: ກຳປານາດ ລັດຖະເຮົ້າ
