ນ້ຳຕົກຕາດເລາະ ເປັນສະຖານທີ່ທ່ອງທ່ຽວທາງທຳມະຊາດ ທີ່ປະທັບໃຈຕໍ່ກັບນັກທ່ອງທ່ຽວ ຫລື ຜູ້ທີ່ເດີນທາງມາທ່ຽວຊົມຫລາຍບໍ່ຫນ້ອຍ, ເປັນນ້ຳຕົກທີ່ເກີດຈາກສາຍນ້ຳເຊເສັດ ໄຫລເລາະຜ່ານຫມູ່ບ້ານລົງໄປສູ່ແອ່ງນ້ຳເບື້ອງລຸ່ມ, ຊາວບ້ານຈິ່ງເອີ່ນຂານກັນ ວ່າ: ຕາດເລາະ. ຕາດເລາະຫ່າງຈາກຕົວເມືອງສາລະວັນ ປະມານ 28 ກີໂລແມັດ ໄປຕາມເສັ້ນທາງ ສາລະວັນ ຫາ ປາກເຊ, ຊຶ່ງຕາດເລາະ ມີທິວທັດທຳມະຊາດທີ່ສວຍງາມ ມີຕົ້ນໄມ້ໃຫຍ່ຫລາຍຊະນິດ ສາຍນ້ຳຕົກທີ່ມີຫລາຍຊັ້ນ ໄຫລຜ່ານໂຂດຫີນ, ສົ່ງສຽງໃຫ້ເປັນຕາຢາກລົງໄປຫລີ້ນ ໄປອາບໃຫ້ຊື່ນອົກຊື່ນໃຈ. ຕາດເລາະ ຈະມີສາຍນ້ຳໄຫລຢູ່ຕະຫລອກປີ ແລະ ເປັນຫນ້າທ່ຽວຊົມຫລາຍທີ່ສຸດ ໃນລະຫວ່າງເດືອນ 5 ຫາ 11 ເຊິ່ງເປັນໄລຍະທີ່ຈະມີສາຍນ້ຳໄຫລທີ່ສວຍງາມ, ນ້ຳໃສສະອາດ ແຕ່ກໍສາມາດເດີນທາງມາທ່ຽວຊົມໄດ້ຕະຫລອດປີ.
ນ້ຳຕົກຕາດເລາະ ແມ່ນມີຄວາມແຕກຕ່າງຈາກສະຖານທີ່ຕ່າງໆ ເພາະສະຖານທີ່ນີ້ ແມ່ນປະກອບດ້ວຍທຳມະຊາດອັນສວຍງາມ ແລະ ມີສາຍນ້ຳເຊເສັດ ທີ່ນຳໃຊ້ເຂົ້າໃນການຜະລິດກະແສໄຟຟ້າໃນລາວ ຄື: ເຂື່ອນໄຟຟ້າເຊເສັດ. ເຊເສັດ 1 ແລະ ເຊເສັດ 2 .ອ້ອມຮອບບໍລິເວນໃກ້ຄຽງມີປ່າໄມ້ອຸດົມສົມບູນ, ອາກາດບໍລິສຸດ ແລະ ມີຄວາມສະອາດ ເປັນທຳມະຊາດ ສາມາດທ່ຽວຊົມດ້ວຍການເລາະ ຫລື ຂີ່ຊ້າງທີ່ໃຫ້ບໍລິການ. ຊົມຫມູ່ບ້ານຊົນເຜົ່າ ທີ່ຕັ້ງຖີ່ນຖານໃກ້ກັບແມ່ນ້ຳເຊເສັດ. ຊົມວິຖີການດຳລົງຊີວິດຂອງປະຊາຊົນບັນດາເຜົ່າ, ການທຳມາຫາກິນ, ການຫາປາຂອງປະຊາຊົນ ທີ່ມີຄວາມຕິດພັນກັບສາຍນ້ຳແຫ່ງນີ້ . ຜູ້ຄົນສ່ວນຫລາຍ ລວມທັງນັກທ່ອງທ່ຽວມັກພາກັນມາທ່ຽວຫລີ້ນ ລົງຫລີ້ນນ້ຳຫລາຍທີ່ສຸດ ໃນໄລຍະບຸນກຸດສົງການປີໃໝ່ລາວ ຂອງທຸກໆປີ ແລະ ງານບຸນທາງພຸດທະສາສະຫນາ, ວັນພັກຜ່ອນຕ່າງໆ
ຖ້າວ່ານັກທ່ອງທ່ຽວ ຫາກຕ້ອງການພັກຜ່ອນຢູ່ກັບທີ່ ເພື່ອທີ່ຈະໄດ້ສຳຜັດກັບທຳມະຊາດແບບຍາວນານ, ໃນບໍລິເວນນ້ຳຕົກຕາດເລາະ ຍັງມີເຮືອນພັກ ແລະ ຣີສອດ ພ້ອມຄອຍບໍລິການສຳລັບນັກທ່ອງທ່ຽວຕ່າງປະເທດທີ່ມັກໃນການພັກຜ່ອນ, ລັກສະນະທີ່ພັກແມ່ນເປັນຕູບນ້ອຍໆ ເຊິ່ງແຕ່ລະຫລັງມີຮູບຊົງຄືເຮືອນລາວ, ໃຫ້ຄວາມສະດວກສະບາຍ ແລະ ມີຄວາມຈົບງາມເປັນເອກະລັກຂອງລາວ. ມີຄວາມທົນທານ ແລະ ແຫນ້ນຫນາ, ລວມທັງຮ້ານອາຫານໃຫ້ບໍລິການ.
ຂອບໃຈຂໍ້ມູນຈາກ: ລາຍການເມືອງລາວວັນນີ້
Editor: ຕະວັນ ແສງສະຫວັນ
