ການທ່ອງທ່ຽວ ຂອງທີມງານ ມື້ນີ້ ຂື້ນມາທີ່ພາກເຫນືອອີກຄັ້ງ, ເຊີ່ງມີຈຸດພິກັດ ທີ່ເມືອງຮ້ຽມ, ແຂວງຫົວພັນ. ໃນໄລຍະຜ່ານມາ ລາຍການເຄີຍນຳສະເຫນີສະຖານທີ່ທ່ອງທ່ຽວ ພາຍໃນແຂວງຫົວພັນ ໃນຫລາຍໆສະຖານທີ່ ໄປແລ້ວ ແຕ່ມີອີກສະຖານທີ່ທ່ອງທ່ຽວຫນຶ່ງ ທີ່ຍັງຄົງຫນ້າສົນໃຈ ແລະ ເຊື່ອແນ້ວ່າ ຫລາຍທ່ານຍັງບໍ່ທັນຮູ້. ແລະ ບໍ່ເຊື່ອວ່າ ທີ່ແຂວງຫົວພັນ ຈະມີບໍ່ນ້ຳຮ້ອນ.
ບໍ່ນ້ຳອຸ່ນ ຫລື ບໍ່ນ້ຳຮ້ອນ ໃນປະເທດລາວ ແມ່ນມີຫລາຍບ່ອນ ເປັນຕົ້ນແມ່ນ ທີ່ເມືອງຄຳ, ແຂວງຊຽງຂວາງ, ທີ່ເມືອງກາສີ, ແຂວງວຽງຈັນ ແລະ ທີ່ແຂວງບໍລິຄຳໄຊ ກໍ່ມີເຊັ່ນດຽວກັນ.
ເຮົາມາເວົ້າເຖິງ ບໍ່ນ້ຳຮ້ອນ ທີ່ເມືອງຮ້ຽມ, ແຂວງຫົວພັນ ແມ່ນເປັນອີກຫນຶ່ງສະຖານທີ່ທ່ອງທ່ຽວ ທີ່ຫນ້າສົນໃຈ ເພາະບໍ່ນ້ຳຮ້ອນແຫ່ງນີ້ ຕາມການແນະນຳຈາກເຈົ້າຫນ້າທີ່ຮັບຜິດຊອບ ລາຍງານວ່າ: ມີອຸນຫະພູມສູງ ເກືອບ 100 ອົງສາ, ຮ້ອນກວ່າບໍ່ນ້ຳຮ້ອນໃນແຫ່ງອື່ນໆ ແລະ ສາມາດຕົ້ມໄຂ ແລະ ອາຫານປະເພດອື່ນໆສຸກໄດ້ແບບສະບາຍ. ສະຖານທີ່ແຫ່ງນີ້ ແມ່ນມີຄວາມສວຍງາມ ເພາະຍັງມີການປົກຄຸມດ້ວຍປ່າໄມ້ ທີ່ຂຽວງາມ ເຊິ່ງນອນໃນເຂດປ່າສະຫງວນແຫ່ງຊາດ ນ້ຳແອດ-ພູເລີຍ ເຊີ່ງເປັນເຂດປ່າສະຫງວນແຫ່ງຊາດ ທີ່ຍັງມີສັດສາ-ວາສິ່ງຫວງຫ້າມອາໃສຢູ່ຫລາຍ.
ບໍ່ນ້ຳຮ້ອນ ເມືອງຮ້ຽມ ຜ່ານມາແມ່ນໄດ້ເປີດໃຫ້ນັກທ່ອງທ່ຽວເຂົ້າຊົມແລ້ວ ດົນພໍສົມຄວນ ເປີດໃຫ້ບໍລິການນັບແຕ່ 7 ໂມງເຊົ້າ ຈົນເຖິງ 19 ໂມງແລງ ສ່ວນໃຫຍ່ແມ່ນນັກທ່ອງທ່ຽວພາຍໃນແຂວງ ແລະ ແຂວງໃກ້ຄຽງ, ນັກທ່ອງທ່ຽວຕ່າງປະເທດແມ່ນມີສ່ວນນ້ອຍ ເພາະການໂຄສະນາປະຊາສຳພັນ ຍັງບໍ່ທົ່ວເຖີງ. ສະຖານທີ່ແຫ່ງນີ້ ແມ່ນສາມາດເດີນທາງໄປທ່ຽວຊົມໄດ້ຕະຫລອດປີ ແລະ ໄລຍະທີ່ມີນັກທ່ອງທ່ຽວຫລາຍທີ່ສຸດ ໃນລະດູຫນາວ. ນອກຈາກຈະໄດ້ສຳຜັດກັບຄວາມອຸ່ນ, ຄວາມຮ້ອນຂອງບໍ່ນ້ຳຮ້ອນແຫ່ງນີ້ ສີ່ງອຳນວຍຕ່າງໆ ຍັງມີຄວາມສະດວກສະບາຍ ເຊັ່ນ,: ຫ້ອງນ້ຳ, ບ່ອນນັ່ງພັກຜ່ອນ, ບ່ອນຮັບປະທານອາຫານ ແລະ ອື່ນໆ. ສຸດທ້າຍກໍ່ຂໍຝາກເຖິງນັກທ່ອງທ່ຽວ ທັງພາຍໃນ ແລະ ຕ່າງປະເທດ ຫາກໄດ້ເດີນທາງໄປຢ້ຽມຢາມແຂວງຫົວພັນ ໃຫ້ຖືເອົາໂອກາດນີ້ ແວ່ໄປທ່ຽວຊົມສຳຜັດ ກັບຄວາມພິເສດ ຂອງສະຖານທີ່ແຫ່ງນີ້ ບໍ່ນ້ຳຮ້ອນ ເມືອງຮ້ຽມ. ເສັ້ນທາງໄປແມ່ນສະດວກສະບາຍ.
Editor: ກຳປານາດ ລັດຖະເຮົ້າ
