ສປປ ລາວ ຈະເນັ້ນໜັກໃສ່ທ່າແຮງທີ່ເປັນເອກະລັກດ້ານສະຖານທີ່ທ່ອງທ່ຽວທາງທໍາມະຊາດ, ຮ່ອງຮອຍປະຫວັດສາດ ລວມເຖິງວິຖີການດຳລົງຊີວິດຂອງປະຊາຊົນລາວບັນດາເຜົ່າ ເພື່ອດຶງດູດນັກທ່ອງທ່ຽວຈາກສາກົນໃຫ້ເຂົ້າມາທ່ຽວປະເທດເຮົາຫລາຍຂື້ນ ໃນໂອກາດປີທ່ອງທ່ຽວລາວ 2018.
ທ່ານ ສູນ ມະນີວົງ, ຫົວໜ້າກົມໂຄສະນາການທ່ອງທ່ຽວ, ກະຊວງຖະແຫລງຂ່າວ, ວັດທະນາທຳ ແລະທ່ອງທ່ຽວ ເປີດເຜີຍວ່າ: ສປປ ລາວ ມີຄວາມອຸດົມສົມບູນທາງດ້ານທຳມະຊາດ, ວັດທະນາທຳ ທີ່ເປັນມໍລະດົກໂລກ, ແຫ່ງຊາດ ແລະ ທ້ອງຖີ່ນ ລວມເຖິງຮ່ອງຮອຍດ້ານ ປະຫວັດສາດລ້ວນແຕ່ເປັນເອກະລັກທີ່ໂດ່ດເດັ່ນ ຊື່ງຈະສ້າງຄວາມສົນໃຈໃຫ້ນັກທ່ອງທ່ຽວຈາກຕ່າງປະເທດໄດ້ດີສົມຄວນ ໂດຍສະເພາະການຈັດປີທ່ອງທ່ຽວລາວໃນປີ 2018 ຈະຈັດຫລາຍກິດຈະກຳ ເພື່ອໂຄສະນາ ແລະສົ່ງເສີມການທ່ອງທ່ຽວຂອງລາວ ໃຫ້ໄດ້ຮັບການພັດ ທະນາຢ່າງຕໍ່ເນື່ອງ.
ຫົວໜ້າກົມໂຄສະນາການທ່ອງທ່ຽວ ໃຫ້ຮູ້ຕື່ມວ່າ: ສປປ ລາວ ເຄີຍຈັດປີທ່ອງທ່ຽວມາແລ້ວ 2 ຄັ້ງຄື: ຄັ້ງທີ 1 ປີ 2000, ຄັ້ງທີ 2 ປີ 2012 ແລະ ຄັ້ງທີ 3 ຈະຈັດຂື້ນໃນປີ 2018 ເພື່ອສ້າງຄວາມເຂົ້າໃຈໃຫ້ສັງຄົມຮັບຮູ້ກ່ຽວກັບວຽກງານການພັດທະນາການທ່ອງທ່ຽວ ແລະ ຮ່ວມກັນເປັນເຈົ້າພາບທີ່ດີຕ້ອນຮັບນັກທ່ອງທ່ຽວ ແລະ ຮູ້ສຶກປະທັບໃຈທຸກຄັ້ງເມື່ອໄດ້ມາທ່ຽວປະເທດເຮົາ.
Editor:ຕະວັນ ແສງສະຫວັນ
