ມື້ວານນີ້ ລາຍການໄດ້ນຳສະເຫນີ ສະຖານທີ່ທ່ອງທ່ຽວ ທີ່ເມືອງວັງວຽງໄປແລ້ວ. ແລະ ໃນມື້ນີ້ ເຮົາມີອີກຫນຶ່ງສະຖານທີ່ທ່ອງທ່ຽວ ທາງພາກໃຕ້ ມາສະເຫນີຕໍ່ທ່ານຜູ້ຊົມ ເພື່ອເອົາໃຈນັກທ່ອງທ່ຽວ ທີ່ທີ່ມັກການທ່ອງທ່ຽວແບບໃຫມ່. ເໝາະກັບການພັກຜ່ອນ ແລະ ການຫຼິ້ນກິດຈະກຳມ່ວນຊື່ນ, ທ່ຽວແບບເປັນກຸ່ມເພື່ອນ, ຄອບຄົວ ຫຼື ໄປກັບຄົນຮັກ ເຊື່ອແນ່ວ່າທັງມ່ວນ ຢ່າງແນ່ນອນ ເຊິ່ງສະຖານທີ່ວ່ານີ້ ມີຊື່ວ່າ “ຕາດກອຍ-ລອຍຟ້າ”
“ຕາດກອຍ-ລອຍຟ້າ” ແມ່ນອີກຫນຶ່ງສະຖານທີ່ທ່ອງທ່ຽວຕັ້ງຢູ່ທີ່ເມືອງປະທຸມພອນ,ແຂວງຈຳປາສັກ ເປັນໜຶ່ງສະຖານທີ່ທ່ຽວທີ່ໄດ້ຮັບຄວາມນິຍົມທັງນັກທ່ອງທ່ຽວພາຍໃນ ແລະ ຕ່າງຊາດ ເປັນຈຳນວນຫຼາຍ. ເພາະທີ່ຕາດແຫ່ງນີ້ ນອກຈາກຈະມີທຳມະຊາດສວຍງາມ, ມີແມ່ນ້ຳໄຫລໃສເຢັນ ໜ້າລົງລອຍຫລີ້ນແລ້ວ ຍັງມີກິດຈະກຳຕ່າງໆທີ່ໄວ້ໃຫ້ຄົນທີ່ມາໄດ້ເລືອກຫຼິ້ນຫຼາກຫຼາຍ ເຊັ່ນ: ກິດຈະກຳການຍ່າງປ່າ, ກິດຈະກຳຂີ່ສະລິງ, ການໄຕ່ຂົວອູ່, ການກິນເຂົ້າປ່າ, ຫລີ້ນນ້ຳ, ຖ່າຍຮູບ ແລະ ອື່ນໆ.
ສະຖານທີ່ທ່ອງທ່ຽວ ແຫ່ງນີ້ ແມ່ນສາມາດເດີນທາງມາທ່ຽວຊົມ-ທ່ຽວຫລີ້ນ ໄດ້ຕະຫລອດປີ, ແຕ່ຍາມແລ້ງ ນ້ຳອາດມີຫນ້ອຍ ແລະ ຖ້າລະດູຝົນແນວນຂີ້ ນ້ຳແມ່ນມີຫລາຍ ແລະ ສວຍງາມ. ນັກທ່ອງທ່ຽວ ສ່ວນໃຫຍ່ ມັກເດີນທາງມາໃນວັນພັກຜ່ອນ ເສົາ-ອາທິດ. ບາງຄັ້ງ ນັກທ່ອງທ່ຽວມາຫລາຍ ໃນວັນງານບຸນຕ່າງໆ ເປັນຕົ້ນແມ່ນ.: ວັນພັກທາງລາດສະການ ທີ່ແກ່ຍາວ 2-3 ວັນ, ເຂົ້າພັນສາ, ເຂົ້າປະດັບດິນ, ບຸນປີໃຫມ່ ແລະ ວັນອື່ນໆ. ນັກທ່ອງທ່ຽວມີຄວາມເພີດເພີນກັບກິດຈະກຳ ທີ່ຫລາກຫລາຍ ການພະຈົນໄພ ຍ່າງປ່າ, ການໂຫນສະລີງ, ຂົວອູ່ ລວມທັງການບໍລິການຕູ້ມນັ່ງຫລີ້ນ....
ຕາດກອຍ-ລອຍຟ້າ ຍັງຖືກໄດ້ວ່າ ເປັນແຫລ່ງທ່ອງທ່ຽວລະດັບເມືອງ ທີ່ມີການສຳປະທານຈາກພາກສ່ວນເອກະຊົນ ໃນການພັດທະນາ ກາຍເປັນແຫລ່ງທ່ອງທ່ຽວ ທີ່ໄດ້ຮັບຄວາມສົນໃຈ ແລະ ນິຍົມໄປ ທັງພາຍໃນເມືອງ, ແຂວງ ແລະ ນັກທ່ອງທ່ຽວຕ່າງຊາດ.
Editor: ກຳປານາດ ລັດຖະເຮົ້າ
