ບັນຍາກາດບຸນນະມັດສະການພະທາດຫລວງ ເຊົ້າມືນີ້ ຄື ວັນທີ 3 ພະຈິກ 2017 ກົງກັບ ວັນສຸກຂຶ້ນ 15 ຄ່ໍາ ເດືອນ 12 ປະຊາຊົນລາວຊາວພຸດ ທັງຫລາຍ ນັບທັງໃນນະຄອນຫລວງວຽງຈັນ ແລະ ເດີ່ນທາງມາຈາກຕ່າງແຂວງ. ຊຶ່ງນັບແຕ່ເວລາ 7:00 ໂມງ ໄດ້ເຂົ້າຮ່ວມພິທີໄຫວ້ພະຮັບສິນ, ຟັງທຳມະເທສະໜາ, ຖວາຍສັງຄະທານ, ຄາລະວະໃຫ້ພອນ, ໃສ່ບາດ, ຢາດນ້ຳ ແລະ ບິນພະບາດຂອງພະສົງສຳມະເນນຈຳນວນຫຼາຍຮ້ອຍອົງ ທີ່ມາຈາກທຸກສາລະທິດວັດຕ່າງໆ ໂດຍການເຂົ້າຮ່ວມພິທີຂອງທ່ານ ບຸນຍັງ ວໍລະຈິດ, ປະທານປະເທດແຫ່ງ ສປປ ລາວ, ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ, ມີບັນດາຄະນະລັດຖະບານ, ການນໍາຂັ້ນຕ່າງໆ ພໍ່ແມ່ປະຊາຊົນຊາວພຸດເຂົ້າຮ່ວມຢ່າງຫລວງຫລາຍ.
ສຳລັບ ງານບຸນນະມັດສະການພະທາດຫຼວງ ປະຈຳປີ 2017 ແມ່ນຈັດຂຶ້ນຢ່າງຍິ່ງໃຫຍ່ ເນື່ອງຈາກຕິດພັນກັບເປີດປີທ່ອງທ່ຽວລາວ 2018 ທີ່ໄດ້ເປີດຢ່າງເປັນທາງການ ໃນວັນທີ 28 ຕຸລາຜ່ານມານີ້ ເຊິ່ງພາຍໃນງານບຸນໄດ້ມີຫຼາຍກິດ ຈະກຳໃຫ້ທ່ຽວຊົມ ບໍ່ວ່າຈະເປັນຮ້ານວາງສະແດງ ຜະລິດຕະພັນທ່ອງທ່ຽວແຕ່ລະແຂວງທົ່ວປະເທດ ຮ້ານວາງສະ ແດງຂາຍສິນຄ້າພາຍໃນ ແລະ ຕ່າງປະເທດ ສະແດງສິລະປະກາງແຈ້ງຢູ່ສະໜາມຫຼວງ ໝູ່ບ້ານເຮືອນຊົງລາວ ແລະ ອື່ນໆ ທັງນີ້ ກໍ່ເພື່ອເຮັດໃຫ້ບັນຍາກາດຢູ່ພາຍໃນບຸນພະທາດຫຼວງປີນີ້ ຄຶກຄື້ນ ມ່ວນຊື່ນ ທັງຮັກສາໄດ້ຮີດຄອງປະເພນີ ແລະ ວັດທະນະທຳອັນດີງາມຂອງຊາດ.
Editor: ຕະວັນ ແສງສະຫວັນ
