ວັນທີ 20 ຕຸລາ 2017 ທີ່ຜ່ານມານີ້,ຢູ່ທີ່ແຂວງຫຼວງພະບາງ ໄດ້ຈັດພິທີເຊັນສັນຍາ ກໍ່ສ້າງໂຄງການປັບປຸງ ສິ່ງແວດລ້ອມ ເຂດບ້ານມະໂນ ເມືອງຫຼວງພະບາງ. ໂດຍເປັນປະທານ ຂອງ ທ່ານ ສຸກັນ ບຸນຍົງ ເຈົ້າເມືອງຫຼວງພະບາງ, ມີຮອງປະທານອົງການພັດທະນາ ແລະ ບໍລິຫານຕົວເມືອງ, ອຳນວຍການບໍລິສັດ ຮັບເໝົາກໍ່ສ້າງ, ພ້ອມດ້ວຍ ຜູ້ຕາງໜ້າພະແນກ ການທີກ່ຽວຂ້ອງເຂົ້າຮ່ວມ.
ໂຄງການທົດລອງ ປັບປຸງສິ່ງແວດລ້ອມ ເຂດບ້ານມະໂນ ແມ່ນໂຄງການໜຶ່ງ ຕັ້ງຢູ່ເຂດມໍລະດົກໂລກຫຼວງພະບາງ ກວມເອົາສ່ວນໜຶ່ງຂອງບ້ານມະໂນ ແລະ ບ້ານປ່ອງຄຳ ໃນເນື້ອທີ່ 50 ເຮັກຕາ ເຊິ່ງເປັນ ໂຄງການຕົວແບບ ໃນການຟື້ນຟູໜອງນ້ຳທຳມະຊາດ ຊ່ວຍບຳບັດນ້ຳເປື້ອນ ດ້ວຍການສ້າງຮ່ອງລະບາຍນ້ຳໃຫຍ່ ເພື່ອແກ້ໄຂບັນຫານ້ຳຖ້ວມ.
ໂຄງການນີ້ ມີໜ້າວຽກຫຼັກຄື: ປັບປຸງ ໜອງນ້ຳທໍາມະຊາດ ທີຂຶ້ນບັນຊີມໍລະດົກ ຈຳນວນ 21 ໜອງ ເພື່ອປັບປຸງເປັນໜອງສ່ວນລວມ ຢູ່ຫ້ອງການບ້ານມະໂນ ເປັນບ່ອນບຳບັດນ້ຳເປື້ອນ ທີ່ໄຫຼມາຈາກ ຮອງໃຫຍ່, ກໍ່ສ້າງຮອງລະບາຍນ້ຳໃຫຍ່, ກໍ່ສ້າງທໍ່ລອດທາງຢູ່ບ້ານມະໂນ, ກໍ່ສ້າງທາງຍາງລຽບຕາມແຄມຮ່ອງນ້ຳ, ອານະໄມຮ່ອງນ້ຳເກົ່າ, ຕິດຕັ້ງຕະແກງດັກ ຂີ້ເຫຍື້ອໃສ່ຮ່ອງນ້ຳ ແລະ ຕິຕັ້ງປະຕູຄວບຄຸມ ນ້ຳ ໃສ່ຈຸດເຊື່ອມຕໍ່ລະຫວ່າງ ໜອງກັບຮ່ອງນ້ຳ.
ໂຄງການນີ້ ມີມູນຄ່າການ ກໍ່ສ້າງ 1 ຕື້ 782 ລ້ານກວ່າກີບ ຫຼື ເທົ່າກັບ 182.600 ເອີໂຣ ໂດຍແມ່ນອົງການ ພັດທະນາ ແລະ ບໍລິຫານຕົວເມືອງ ເປັນເຈົ້າຂອງໂຄງການ ແລະ ບໍລິສັດ ສຸລິຍະວົງ ກໍ່ສ້າງ ແລະ ສ້ອມແປງຈຳກັດພຽງຜູ້ດຽວ ເປັນຜູ້ຮັບເໝົາກໍ່ສ້າງ ຈະເລີ່ມການກໍ່ສ້າງນັບແຕ່ ວັນທີ 1 ພະຈິກ ປີ 2017 ເຊິ່ງຈະໃຊເວລາການກໍ່ສ້າງ 6 ເດືອນ ຈະໃຫ້ສຳເລັດ.
Editor: ຕະວັນ ແສງສະຫວັນ
