ອີງຕາມບົດລາຍງານ ການກະກຽມຈັດປີທ່ອງທ່ຽວລາວ 2018 ທ່ານ ບໍ່ແສງຄຳ ວົງດາລາ ລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໄດ້ໃຫ້ຮູ້ວ່າ: ສຳລັບແຜນນະໂຍບາຍສົ່ງເສີມປີທ່ອງທ່ຽວລາວ 2018 ແມ່ນສຸມໃສ່ວຽກງານການພັດທະນາ ບັນດາຜະລິດຕະພັນການທ່ອງທ່ຽວ, ປັບປຸງຂອດການບໍລິການທ່ອງທ່ຽວ ທາງດ້ານປະລິມານ ແລະ ຄຸນນະພາບ, ອຳນວຍຄວາມສະດວກ ໃຫ້ແກ່ນັກທ່ອງທ່ຽວ ໂດຍສະເພາະແມ່ນນະໂຍບາຍ ການເຂົ້າ-ອອກເມືອງ, ນະໂຍບາຍການຍົກເວັ້ນວີຊາ ໃຫ້ແກ່ນັກທ່ອງທ່ຽວທີ່ເຂົ້າມາທ່ຽວໃນ ສປປ ລາວ ໃນໄລຍະປີທ່ອງທ່ຽວລາວ ແລະ ການຈັດຕັ້ງປະຕິບັດວີຊາດຽວໃນຂົງເຂດປະເທດສະມາຊິກອາຊຽນ.
ພ້ອມນີ້, ຍັງມີນະໂຍບາຍ ຂົນສົ່ງນັກທ່ອງທ່ຽວທາງບົກ, ທາງນ້ຳ ແລະ ທາງອາກາດ; ເອົາໃຈໃສ່ການຮັກສາຄວາມສະຫງົບ, ຄວາມປອດໄພ ໃຫ້ແກ່ນັກທ່ອງທ່ຽວທັງຢູ່ສູນກາງ ແລະ ທ້ອງຖິ່ນ; ປະສານສົມທົບ ກັບບັນດາຫົວໜ່ວຍທຸລະກິດຕ່າງໆ ເຊັ່ນ: ທຸລະກິດທີ່ພັກໂຮງແຮມ, ທຸລະກິດຮ້ານອາຫານ, ທຸລະກິດການບິນ ແລະ ທຸລະກິດອື່ນໆ ເພື່ອອຳນວຍຄວາມສະດວກ ແລະ ຫລຸດລາຄາການບໍລິການໃຫ້ແກ່ນັກທ່ອງທ່ຽວ ທີ່ເຂົ້າມາທ່ຽວ ສປປ ລາວ ໃນໄລຍະປີທ່ອງທ່ຽວລາວ 2018; ປັບປຸງ ແລະ ຈັດກິດຈະກຳການສະເຫລີມສະຫລອງ ການທ່ອງທ່ຽວ ໃຫ້ມີຄວາມຫລາກຫລາຍ ແລະ ດຶງດູດນັກທ່ອງທ່ຽວ ໃຫ້ເຂົ້າມາທ່ອງທ່ຽວໃຫ້ນັບມື້ນັບຫລາຍຂຶ້ນ ແນ່ໃສ່ໂຄສະນາການທ່ອງທ່ຽວ ທາງດ້ານທໍາມະຊາດ, ປະຫວັດສາດ ແລະ ວັດທະນະທຳ; ປັບປຸງຂອດການບໍລິການ ການທ່ອງທ່ຽວ ເປັນຕົ້ນ ແມ່ນລາຄາການບໍລິການຕ່າງໆ ເຊັ່ນ: ລາຄາທີ່ພັກໂຮງແຮມ, ລາຄາອາຫານ ແລະ ລາຄາການບໍລິການນຳທ່ຽວ; ພ້ອມທັງເອົາໃຈໃສ່ປະສານສົມທົບ ລະຫວ່າງສູນກາງ ແລະ ທ້ອງຖິ່ນ ໃນການສະເຫລີມສະຫລອງປີທ່ອງທ່ຽວລາວ ໂດຍສະເພາະການພັດທະນາພື້ນຖານໂຄງລ່າງ ແລະ ສິ່ງອຳນວຍຄວາມສະດວກ ຕາມແຫລ່ງທ່ອງທ່ຽວຕ່າງໆ ພ້ອມທັງ ປັບປຸງຜະລິດຕະພັນການທ່ອງທ່ຽວ ແລະ ເຄື່ອງທີ່ລະນຶກທີ່ເປັນເອກະລັກຂອງລາວ.
Editor: ຂ່າວສານປະເທດລາວ
