ນະຄອນຫລວງວຽງຈັນ ຖືໄດ້ວ່າເປັນເມືອງທີ່ມີສະເຫນ່ ຫນ້າຢູ່ ແລະ ຫນ້າທ່ຽວຊົມ ເພາະເປັນເມືອງຫລວງຂອງປະເທດ ທີ່ມີຊື່ສຽງ ໃນລະດັບອາຊຽນ ແລະ ພາກພື້ນ ມີຄວາມສະຫງົບປອດໄພ ແລະ ມີວັດທະນະທຳອັນດີງາມ, ຮອຍຍີມ ແລະ ມິດຕະພາບອັນດີງາມ. ເມື່ອເວົ້າເຖິງທາງດ້ານການທ່ອງທ່ຽວ ພາຍໃນນະຄອນຫລວງວຽງຈັນ ກໍ່ຖືວ່າເປັນທີ່ຫນ້າສົນໃຈຂອງນັກທ່ອງທ່ຽວ ຄວາມງາມ ແລະ ຄວາມມີສະເຫນ່ ໃນຮູບແບບຂອງຄວາມເປັນລາວ ທີ່ເປັນເອກະລັກສະເພາະຂອງຊາວ ນະຄອນຫລວງວຽງຈັນ, ເມືອງທີ່ຫນ້າຢູ່ ຂອງອາຊຽນ.
ສວນເຈົ້າອະນຸວົງ, ນັບໄດ້ວ່າເປັນສະຖານທີ່ ມີຄວາມຫນ້າສົນໃຈ, ທຸກໆຕອນແລງຂອງແຕ່ລະມື້ ເຮົາຈະເຫັນມວນຊົນ ທັງພາຍໃນນະຄອນຫລວງວຽງຈັນ ແລະ ນັກທ່ອງທ່ຽວຈາກຕ່າງປະເທດ ມັກຈະພາກັນເດີນທາງໄປອອກກຳລັງກາຍ ເປັນຂະບວນຟົດຟື້ນ, ໃນທ່າມກາງວິວທິວທັດຄ່ອຍຄ່ຳຍາມແລງ ຕາເວັນ ໃກ້ຈະລັບຂອບຟ້າ, ວິວອັນສວຍງາມຂອງແມ່ນ້ຳຂອງ, ວິວຫາດຊາຍດອນຈັນ ແລະ ອີກຢ່າງຫນຶ່ງ ຢູ່ທີ່ສວນເຈົ້າອະນຸວົງ ຍັງເປັນສະຖານທີ່ກວ້າງຂວາງ, ມີບ່ອນຢ່າງຫລີ້ນອອກກຳລັງກາຍຫລາຍຈຸດ, ລວມທັງບ່ອນພັກຜ່ອນ, ເດີນຫຍ້າຂຽວງາມ, ຮົ່ມໄມ້, ມີບ່ອນຫລີ້ນສຳລັບເດັກນ້ອຍ, ແລະ ບ່ອນເຕັ້ນເອລາບິກ ແລະ ພິເສດຍັງມີໂຊນໄວ້ວາງສະແດງສິນຄ້າຫັດຖະກຳ-ເສື້ອຜ້າ ແລະ ເຄື່ອງທີ່ລະນຶກ ຫລາກຫລາຍປະເພດ.
ນະຄອນຫລວງວຽງຈັນ ເມືອງທີ່ມີຮອຍຍິມງາມ, ເມືອງຂອງຄົນມີນ້ຳໃຈສາມັກຄີ ແລະ ຊ່ວຍເຫລືອເຊິ່ງກັນ ແລະ ກັນ, ເມືອງສາວງາມແດນຈຳປາ ແລະ ເມືອງຜູ້ທີ່ມີສຸຂະພາບທີ່ດີຂອງອາຊຽນ. ເຊິ່ງຜູ້ຄົນສ່ວນໃຫຍ່ ນັບແຕ່ໄວ້ຫນຸ່ມ, ໄວສາວ ຈົນເຖິງໄວຊາລາເຖົ້າແກ່ ລ້ວນມັກການອອກກຳລັງກາຍ, ຍ່າງຫລີhນເພື່ອຜ່ອນຄາຍ ແລະ ເປີດຫູ-ເປີດຕາ, ມັກຮັກການເບິ່ງແຍງສຸຂະພາບ ເຊິ່ງເຫັນໄດ້ ໃນການມີສ່ວນຮ່ວມສ້າງກິດຈະກຳເພື່ອສຸຂະພາບ ນັບທັງກິດຈະກຳການຍ່າງ, ກິດຈະກຳແລ່ນ ແລະ ການເຕັ້ນ. ສຳລັບສວນເຈົ້າອານຸ ຖືວ່າເປັນຈຸດແລນມາກທີ່ສຳຄັນຂອງເມືອງວຽງຈັນ ເປັນສະຖານທີ່ທ່ອງທ່ຽວທາງວັດທະນະທຳ ຕິດພັນກັບປະຫວັດສາດອັນດີງາມ, ຜູ້ຄົນທີ່ເດີນທາງມາທ່ອງທ່ຽວ ຕ້ອງໄດ້ມາເລາະຢ້ຽມຊົມໃນຫລາຍຈຸດ ໃນເຂດດອນຈັນ, ເຂດຮູບປັນຫລໍ່ເຈົ້າອານຸວົງ ແລະ ເຂດຂາຍຜະລິດຕະພັນສິນຄ້າ. ເພາະສະຖານທີ່ດັ່ງກ່າວ ໃນແຕ່ລະວັນ, ແຕ່ລະມື້ ລ້ວນແຕ່ປະກອບມີກິດຈະກຳ ແລະ ສິ່ງທີ່ຫນ້າສົນໃຈ ຫລາຍຢ່າງ ເຊັ່ນ: ການສະແດງ ອາຫານ ແລະ ເຄື່ອງດື່ມ ລວມທັງການຂາຍສິນຄ້າປະເພດເຄື່ອງຫັດຖະກຳ ເສື້ອຜ້າ, ເຄື່ອງທີ່ລະນຶກຫລາຍປະເພດ. ຜູ້ທີ່ມາເລາະທ່ອງທ່ຽວແມ່ນໄດ້ມ່ວນຊື່ນກັບການຈັບຈ່າຍຊື້-ຂາຍເລືອກຊື້ເຄື່ອງທີ່ຖືກໃຈ.
ນັບເປັນອີກສະຖານທີ່ຫນຶ່ງ ທີ່ມີສີສັນໃນຕອນກາງຄຶນ ແລະ ເຮັດໃຫ້ ແຄມຂອງ ສວນເຈົ້າອະນຸວົງ ມີຄວາມຄຶກຄື້ນ ແລະ ໄດ້ສ້າງຄວາມສົນໃຈ ໃຫ້ແກ່ນັກທ່ອງທ່ຽວ ທີ່ເຂົ້າມາຢ້ຽມຊົມນະຄອນຫລວງວຽງຈັນ, ນອຈາກນີ້, ສວນເຈົ້າອະນຸວົງ ຍັງເປັນບ່ອນຈັດຕັ້ງກິດຈະກຳຕ່າງໆຂອງນະຄອນຫລວງວຽງຈັນ, ເຊິ່ງໄດ້ຈັດຂື້ນຢ່າງເປັນປະຈຳ ເພາະສະຖານທີ່ແຫ່ງນີ້ ມີຄວາມກວ້າງຂວາງ, ອາກາດສົດຊື່ນ, ສວຍງາມສາອາດງາມຕາ ແລະ ເຫມາະສົມກັບກິດຈະກໍາ ສຸຂະພາບ ແລະ ກິດຈະກຳບັນເທິງ, ກິດຈະກຳເພື່ອສັງຄົມສົງເຄາະ-ຊ່ວຍເຫລືອ ແລະ ກິດຈະກຳອື່ນໆ
ເນື່ອງໃນໂອກາດສະເຫລີມສະຫລອງວັນປະດິດສະຖານອະນຸສອນເຈົ້າອານຸວົງ ຄົບຮອບ 7 ປີ ( 2 ພະຈິກ 2010 – 2 ພະຈິກ 2017 ອົງການປົກຄອງເມືອງຈັນທະບູລີ ພ້ອມດ້ວຍອົງການ ພຸດທະສາສະຫນາ ສໍາພັນລາວ ເມືອງຈັນທະບູລີ ແລະ ອພສ ນະຄອນຫລວງວຽງຈັນ ປະຊາຊົນທຸກຊັ້ນຄົນຕ່າງໆ ແລະ ຄະນະຮັບຜິດຊອບສວນເຂົ້າອານຸວົງ ຈະໄດ້ຈັດງານສະເຫລີມສະຫລອງວັນປະດິດສະຖານອະນຸສາວະລີເຂົ້າອານຸວົງ ຄົບຮອບ 7 ປີ ແລະ ຕັ້ງກອງອັດຖະ ເພື່ອອຸທິດເດ່ດວງວິນຍານ ຂອງເຈົ້າອານຸວົງ ແລະ ບັນດາບັນພະບຸລູດລາວ ແລະ ຜູ້ນາພັກ-ລັດ ເຊີ່ງພິທີດັ່ງກ່າວ ຈະໄດ້ຈັດຂື້ນທີ່ສວນເຈົ້າອານຸວົງ ເມືອງຈັນທະບູລີ, ນະຄອນຫລວງວຽງຈັນ ເຊີ່ງລາຍລະອຽດ ຄື:
- ວັນເສົາ ທີ 11 ພະຈິກ 2017 ກົງກັບມື້ແຮມ 8 ຄໍ່າ ເດືອນ 12 ພສ 2560 ເປັນມື້ຕັ້ງກອງບຸນ ແລະ ຫາງຫາກະກຽມເຄື່ອງສັງຄະທານຕ່າງໆ ເວລາ 15:30 ໂມງ ແຫ່ອຸປະຄຸດຕາມຮິດຄອງ ຫລັງຈາກນັ້ນ ເວລາ 17:00 ໂມງແລງ ມິພິທີ ສູດປະລິຕະມຸງຄຸນ ແລະ ຕອນຄໍ່າ ມີການຄົບງັນຕາມປະເພນີ ຮັບການໂມທະນາທານ ແລະ ສົມທົບທຶນໃນການປະດັບປະດາ ຕິດແຜ່ນຫີນສີລາ ແລະ ກໍ່ສ້າງແທ່ນລຶບພະສູນ.
- ວັນທິດ ທີ 12 ພະຈິກ 2017 ກົງກັບມື້ແຮມ 9 ຄໍ່າ ເດືອນ 12 ພສ 2560 ເວລາ 7 ໂມງເຊົ້າ ມີພິທີໃສ່ບາດຖວາຍສັງຄະທານ ແດ່ພະສົງ ລວມ 125 ອົງ ເວລາ 8 ໂມງ ຖວາຍພັດຕະຫານແດ່ພະສົງ
Editor: ກຳປານາດ ລັດຖະເຮົ້າ
