ຫັດຖະກຳລາວ ເຫັນທີຈະຕ້ອງໄດ້ປັບໂຕພໍສົມຄວນຈາກທີ່ເຄີຍເຮັດແບບດັ້ງເດີມທີ່ເຄີຍເປັນມາ, ສິ່ງທີ່ຄວນຕ້ອງໄດ້ປັບປຸງຕ້ອງເນັ້ນເອກະລັກຄວາມເປັນລາວ, ມີຄວາມທັນສະໄໝ, ໂດຍສະເພາະແມ່ນເຄື່ອງທີ່ລະນຶກຕ້ອງໃຫ້ມີຂະໜາດເໝາະສົມແກ່ການຖືໄປ-ມາສະດວກ, ສະບາຍເພື່ອຕ້ອນຮັບປີທ່ອງທ່ຽວລາວ 2018 ຄາດວ່າຈະມີນັກທ່ອງທ່ຽວເຂົ້າມາບໍ່ຕ່ຳກວ່າ 5 ລ້ານຄົນ.
ທາງດ້ານທ່ານ ຫານຊະນະ ສີສານ ປະທານສະມາຄົມຫັດຖະກຳລາວ ໄດ້ກ່າວວ່າ: ໄດ້ມີການຊີ້ນຳກຸ່ມຫັດຖະ ກຳຕາມສະຖານທີ່ຕ່າງໆໃນທົ່ວປະເທດ ໄດ້ຮຽນຮູ້ ແລະ ສຶກສາການຊົມໃຊ້ຂອງກຸ່ມນັກທ່ອງທ່ຽວຫຼາຍປະເທດທີ່ຈະເດີນທາງເຂົ້າມາທ່ຽວລາວຫຼາຍຂຶ້ນໃນໄລຍະປີທ່ອງທ່ຽວລາວ 2018 ຜູ້ປະກອບການ ແລະ ນາຍຊ່າງຕ້ອງໄດ້ຜະລິດຫັດຖະກຳ ທີ່ຫຼາກຫຼາຍຂຶ້ນທັງແບບລາວເດີມ, ແບບປະຍຸກປະສົມປະສານມີຄວາມຈົບງາມ ໂດຍສະເພາະແມ່ນເຄື່ອງທີ່ລະນຶກຢູ່ແຕ່ລະທ້ອງຖິ່ນ ເພື່ອໃຫ້ນັກທ່ອງທ່ຽວ ສາມາດຊື້ກັບໄປເປັນຂອງຝາກຂອງຕ້ອນໃຫ້ກັບໝູ່ເພື່ອນ ແລະ ມິດສະຫາຍ.
ນອກຈາກນີ້ ສະມາຄົມຫັດຖະກຳລາວ ທີ່ມີຄູ່ຮ່ວມສັນຍາ ຄື: ຍີ່ປຸ່ນ ແລະ ສ.ເກົາຫຼີ ແມ່ນຈະໄດ້ສືບຕໍ່ໂຄສະນາຢ່າງກວ້າງຂວາງດ້ວຍການນຳເອົາສິນຄ້າທີ່ຄັດເລືອກຈາກສິນຄ້າພູມປັນຍາຊາວບ້ານ (ODOP) ແລະ ເປັນສິນຄ້າທີ່ເປັນເອກະລັກຂອງລາວ ເຊັ່ນ: ຝ້າໄໝ ທີ່ມີຮູບແບບລາຍສີສັນຕ່າງໆ ເພື່ອໃຫ້ເວທີພາກພື້ນ ແລະ ສາກົນຮັບຮູ້ສິນຄ້າຈາກ ສປປ ລາວ ຫຼາຍຂຶ້ນ.
Editor: ຕະວັນ ແສງສະຫວັນ
