ເຈົ້າອານຸວົງເປັນວິລະກະສັດ ກໍ່ຄືວິລະບຸລຸດຂອງຊາດລາວເຮົາ ທີ່ມີຄວາມອົງອາດກ້າຫານທີ່ຕໍ່ສູ້ກັບກອງທັບຂອງພວກສັກດີນາຕ່າງດ້າວ ແລະ ເພິ່ນໄດ້ເສຍຊີວິດ ປີ 1829 ລວມອາຍຸໄດ້ 60 ປີ ເພື່ອເຮັດໃຫ້ລູກຫຼານຂອງປະຊາຊົນລາວຮຸ່ນຕໍ່ໆໄປ ເຫັນໄດ້ຜົນງານອັນໃຫຍ່ຫຼວງ ແລະ ຄວາມອົງອາດກ້າຫານຂອງເຈົ້າອານຸວົງ ພັກ-ລັດຖະບານເຮົາ ຈຶ່ງໄດ້ເຫັນດີຕົກລົງສ້າງສະຖານອານຸສາວະລີ ເຈົ້າອານຸວົງສະຖິດໄວ້ຢູ່ທີ່ແຄມຂອງ ເຂດທ່າວັດຈັນ ເມືອງຈັນທະບູລີ ນະຄອນຫຼວງວຽງຈັນ ໂດຍໄດ້ປິ່ນໜ້າໄປຍັງຝັ່ງຂອງເບື້ອງປະເທດໄທ ເຊິ່ງໂຄງການດັ່ງກ່າວ ໄດ້ສ້າງສຳເລັດວັນທີ 2 ພະຈິກ 2010.
ເພື່ອເປັນການສະແດງໃຫ້ເຫັນເຖິງຄວາມກະຕັນຍູຮູ້ບຸນຄຸນ ຕໍ່ຜູ້ມີພະຄຸນຕໍ່ປະເທດຊາດບ້ານເມືອງນັ້ນ ກໍ່ຄືເຈົ້າອານຸວົງ ແລະ ການນຳພັກ-ລັດຜູ້ອື່ນໆ ທີ່ໄດ້ລ່ວງລັບໄປແລ້ວນັ້ນ ອົງການປົກຄອງເມືອງຈັນທະບູລີ ພ້ອມດ້ວຍອົງການ ອພສ ເມືອງຈັນທະບູລີ, ອພສ ນະຄອນຫຼວງວຽງຈັນ ປະຊາຊົນທຸກຊັ້ນຄົນຕ່າງໆ ແລະ ຄະນະສວນເຈົ້າອານຸວົງ ໄດ້ຈັດງານສະເຫຼີມສະຫຼອງວັນປະດິດສະຖານອານຸສາວະລີ ເຈົ້າອານຸວົງ ຄົບຮອບ 7 ປີ (2/11/2010-2/11/2017) ແລະ ຕັ້ງກອງອັດຖະ 30 ກວ່າກອງ ເພື່ອອຸທິດໃຫ້ແກ່ດວງວິນຍານຂອງເຈົ້າອານຸວົງ ບັນດາທ່ານບັນພະບູລຸດ ແລະ ການນຳພັກ-ລັດ ເຊິ່ງພິທີໄດ້ຈັດຂຶ້ນທີ່ສວນເຈົ້າອານຸວົງໃນວັນທີ 11-12 ພະຈິກ 2017.
ສຳລັບ ຕອນເຊົ້າວັນທີ 12 ພະຈິກ 2017 ໄດ້ມີພິທີໃສ່ບາດຖວາຍສັງຄະທານແດ່ພະສົງ 125 ອົງ ທີ່ມາຈາກທົ່ວນະຄອນຫຼວງວຽງຈັນ ມີທ່ານ ສົມສະຫວາດ ເລັ່ງສະຫວັດ ອະດີດຮອງນາຍົກລັດຖະມົນຕີ ທີ່ປຶກສາຄະນະບໍລິຫານງານສູນກາງພັກ ທ່ານນາງ ນາລີ ສີສຸລິດ ພັນລະຍາຂອງທ່ານ ທອງລຸນ ສີສຸລິດ ນາຍົກລັດຖະມົນຕີ ບັນດາພັນລະຍາການນຳຂັ້ນພັກ-ລັດ ທ່ານຮອງລັດຖະມົນຕີ ການນຳນະຄອນຫຼວງວຽງຈັນ ການນຳເມືອງຈັນທະບູລີ ເຈົ້າສັດທາ ແລະ ປະຊາຊົນບັນດາເຜົ່າທົ່ວປະເທດ ກໍ່ຄືຊາວນະຄອນຫຼວງວຽງຈັນ ເຂົ້າຮ່ວມຫຼາຍພັນຄົນ.
Editor: ວຽງຈັນໃຫມ່
