ໂຕະເອັກ ໄດ້ມີການຈັດງານ Explore NaKai – Visit and Shop at TOH – X (ເປີດປະຕູສູ່ນາກາຍ ) ພາຍໃຕ້ການຮ່ວມມືຂອງ ລັດວິສາຫະກິດສ່ວນບຸກຄົນ ໂຕະລາວ ແລະ ບໍລິສັດ ເຄື່ອນໄຟຟ້ານໍ້າເທີນ 2. ເພື່ອພັດທະນາ ເສດຖະກິດຊຸມຊົນ ເຂດຍົກຍ້າຍຈັດສັນ ເມືອງນາກາຍ ແຂວງຄໍາມ່ວນ, ໃຫ້ກຽດເຂົ້າຮ່ວມມີ: ທ່ານນາງ. ວາລີ ເວດສະພົງ ສະມາຊິກສາພາແຫ່ງຊາດ ຮອງປະທານສະພາການຄ້າ ແລະ ອຸດສາຫະກໍາ ແຫ່ງຊາດລາວ, ພ້ອມດ້ວຍບັນດາ ອົງການຈັດຕັ້ງສາກົນ, ນັກລົງທືນ, ສື່ມວນຊົນ ແລະ ພາກສ່ວນກ່ຽວຂ້ອງເຂົາຮ່ວມ.
ຈຸດປະສົງ ຂອງການຈັດງານດັ່ງກ່າວ ແມ່ນເພື່ອເຮັດໃຫ້ກຸ່ມນັກລົງທືນ ທັງພາຍໃນ ແລະ ຕ່າງປະເທດ ໄດ້ຮັບຮູ້ເຖິງທ່າແຮງ ທາງດ້ານເສດຖະກິດຂອງ ເມືອງນາກາຍ ໂດຍສະເພາະແມ່ນບັນດາປະຊາຊົນທີ່ມາຈາກ ກຸ່ມບ້ານ ໃນເຂດຍົກຍ້າຍຈັດສັນເຊັ່ນ: ບ້ານສົບເຮ້ຍ, ບ້ານໜອງບົວຄໍາ, ບ້ານນາຍກາຍໃຕ້, ບ້ານທ່າລັງ, ບ້ານໂນນສະຫວັນ ແລະ ບ້ານອື່ນໆ ລວມທັງໝົດ 16 ກຸ່ມບ້ານ, ຊຶ່ງປະຊາຊົນໃນເຂດຍົກຍ້າຍຈັດສັນດັ່ງກ່າວ ໄດ້ມີການຍົກຍ້າຍຈາກ ທີ່ ພັກອາໃສເດີມຂອງເຂົາເຈົ້າ ເພື່ອເຮັດໃຫ້ສາມາດສ້າງເຄື່ອນໄຟຟ້າ ແຕ່ປີ 2012 ເຊິ່ງມີຜູ້ທີ່ໄດ້ຮັບຜົນກະທົບ ຈໍານວນ 1.300 ກ່ວາຄອບຄົວ, ແລະ ມີ 6 ພັນກວ່າຄົນ, ປະຊາຊົນເລົ່ານີ້ຈໍານວນຫຼາຍແມ່ນ ຊຸຸມຊົນທີ່ ທຸກຍາກ ເພື່ອປັບປຸງຊີວິດການເປັນຢູ່ ໂດຍການສ້າງລາຍຮັບ ທີ່ ຍືນຍົງ ໃນໄລຍະຍາວໃຫ້ກັບພວກເຂົາເລົ່ານັ້ນ ຈຶ່ງໄດ້ເກີດການຮ່ວມມືກັບ ລັດວິສາຫະກິດສ່ວນບຸກຄົນ ໂຕະລາວ ໃນການຈັດຕັ້ງກິດຈະກໍາທີ່ມີຊື່ວ່າ ກິດຈະກໍາແຂ່ງຂັນແນວຄວາມຄິດທາງດ້ານທຸລະກິດ ຫຼື ທີ່ຮູ້ຈັກກັນດີ ໃນຊື່ Startup Weekend ມາເປັນເຄື່ອງມືໃນການສ້າງເສດຖະກິດ ແລະ ພັດທະນາຄວາມຄິດຂອງປະຊາຊົນໃນຂົງເຂດ ແລະ ອ້ອມຂ້າງກຸ່ມບ້ານຍົກຍ້າຍຈັດສັນໃຫ້ ຫັນປ່ຽນຈາກເສດຖະກິດຄອບຄົວ ໃຫ້ສາມາດເຂົ້າເຖິງຕະຫຼາດໄດ້, ກິດຈະກໍາດັ່ງກ່າວເຮັດໃຫ້ປະຊາຊົນໃນເຂດຍົກຍ້າຍຈັດສັນ ສາມາດຈັດຕັ້ງກຸ່ມທຸລະກິດນ້ອຍໆຂື້ເຊັ່ນ: ກຸ່ມງານສີມືຫັດຖະກໍາ, ກຸ່ມຕໍ່າແຜນແພ, ກຸ່ມແປຮູບພະລິດຕະພັນປາ, ກຸ່ມສະບູ, ກຸ່ມກະເສດອີນຊີ.
ນອກນັ້ນ ພາຍໃນງານຍັງມີການບອກເລົ່າເຖິງປະສົບການ ທີ່ໄດ້ຮັບຈາກກິດຈະກໍາດັ່ງກ່າວ ຂາກຜູ້ ຕາງຫນ້າກຸ່ມ ທີ່ເຂົ້າຮ່ວມໂຄງການ, ມີການວາງສະແດງສີນຄ້າ ແລະ ຝີມືຂອງປະຊາຊົນ ໃຫ້ແຂກທີ່ມາຮ່ວມງານໄດ້ເລືອກຊື້ - ເລືອກຊົມ ແລະ ຍັງມີການເດີນແບບຜົນງານ ທີ່ ເປັນສີມືຂອງ ກຸ່ມຕໍ່າແຜນນາກາຍອີກດ້ວຍ.
Editor: ກຳປານາດ ລັດຖະເຮົ້າ
