ອໍານາດການປົກຄອງແຂວງຈໍາປາສັກ ຖະແຫຼງຄວາມພ້ອມໃນການຈັດງານປີທ່ອງທ່ຽວລາວ ຊຶ່ງຈະມີຂຶ້ນພ້ອມກັບງານບຸນຜາສາດຫີນວັດພູຈໍາປາສັກ ໃນຕົ້ນປີ 2018 ພ້ອມທັງແຈ້ງຄວາມໜ້າສົນໃຈໃນຫຼາຍກິດຈະກໍາ ທີ່ຈະເກີດຂຶ້ນ ອັນຈະສ້າງຄວາມໜ້າສົນໃຈແກ່ນັກທ່ອງທ່ຽວທັງພາຍໃນ ແລະ ຕ່າງປະເທດໄດ້ເປັນຢ່າງດີ.
ທ່ານ ບຸນຖອງ ດີວິໄຊ ເຈົ້າແຂວງໆຈໍາປາສັກ ເປີດເຜີຍໃນງານຖະແຫລງຂ່າວວ່າ: ສໍາລັບ ງານສະເຫຼີມສະຫຼອງ ເປີດປີທ່ອງທ່ຽວ 2018 ແຂວງຈໍາປາສັກ ແມ່ນຈະໄດ້ເປີດຂຶ້ນໃນວັນທີ 29 ມັງກອນ 2018 ພ້ອມກັບພິທີເປີດງານບຸນນະມັດສະການຜາສາດຫີນວັດພູມໍລະດົກ ໂລກແຫ່ງທີ 2 ຂອງລາວ, ທ່ຽວຊົມໂຮງ ທ້າວ-ໂຮງນາງ, ໂຮງງົວນັນທິນ, ໂຮງນາງສີດາ, ໂຮງທ້າວເຕົ່າ, ຮູບຍິງນອນຫງາຍ-ຊາຍນອນຂວໍ້າ, ຮອຍຕີນພະບາດ, ຮູບປັ້ນພະຍາກົມມະທາ ແລະ ເທິງພື້ນທີ່ມໍລະດົກໂລກ ທັງ 390 ຕາຕະລາງກິໂລແມັດ, ຊຶ່ງໃນມື້ເປີດງາຈະໄດ້ຈັດຢ່າງອາລັງການ, ເຊິ່ງຈະມີບັນດາແຂກ ທັງພາຍໃນ ແລະ ຕ່າງປະເທດ ຈະໄດ້ເຂົ້າຮ່ວມຫຼາຍຄະນະ, ທັງເປັນການໂຄສະ ນາ ດຶງດູດນັກທ່ອງທ່ຽວ ໃຫ້ເຂົ້າມາທ່ອງທ່ຽວ ແລະ ຮັບຮູ້ແຂວງຈໍາປາສັກຫຼາຍຂຶ້ນ.
ສຳລັບ ກິດຈະກໍາ ປີທ່ອງທ່ຽວລາວ 2018 ທີ່ແຂວງຈໍາປາສັກ, ນອກຈາກ ງານບຸນນະມັດສະການຜາສາດຫິນວັດພູ ກໍ່ຄື ພາຍຫຼັງກິນເຂົ້າຫຼາມບັ້ງໃຫຍ່ ຕົ້ມໄກ່ໃສ່ໄຂ່ມຸດແດງສໍາເລັດແລ້ວ, ຈະມີການທ່ຽວຊົມທາດສາມປາງ (ເມືອງສຸຂຸມາ), ຊົມທາງນາງອີງ (ເມືອງມຸນລະປະໂມກ), ຊົມອຸໂມງ (ບ້ານໂຕະໝູ) ຂຶ້ນຊົມທໍາມະຊາດ ເທີງພູອາສາ, ວາດສາຍຕາເບິ່ງບຶງກຽດໂງ້ງ, ຊົມທໍາມະຊາດປ່າສະຫງວນແຫ່ງຊາດເຊປຽນ, ເຂົ້າພັກແຮມໂຮມສະເຕ ລະດັບອາຊຽນ ບ້ານຫົວດອນແດງ, ເມືອງປະທຸມພອນ. ຈາກນັ້ນ ເລາະລົງໃຕ້ທ່ຽວຊົມນໍ້າຕົກຕາດຄອນພະເພັງ ໄຂ່ມຸກແຫ່ງແມ່ນໍ້າຂອງ, ນະມັດສະການກາບໄຫວ້ຂໍພອນຈາກຕົ້ນໄມ້ສັກສິດມະນີໂຄດ, ຂີ່ເຮືອເລາະທ່ຽວເກາະດອນ, ເບິ່ງປາໂລມານໍ້າຈືດ, ທ່ຽວຊົມແກ້ງລີຜີ (ສົມພະມິດ) ແລະ ການທ່ຽວຊົມອື່ນໆ ເວົ້າໄດ້ວ່າລ້ວນແຕ່ໜ້າສົນໃຈ.
Editor: ເສດຖະກິດ-ການຄ້າ
