ແຂວງສາລະວັນ ໃຊ້ງົບປະມານ 19 ຕື້ 451 ລ້ານກວ່າກີບ ໃສ່ໂຄງການປັບປຸງ-ກໍ່ສ້າງພື້ນຖານໂຄງລ່າງສະໜາມກິລາຂອງແຂວງ ເພື່ອກະກຽມຄວາມພ້ອມຮັບໃຊ້ງານມະຫາກຳກິລານັກຮຽນມັດທະຍົມສຶກສາທົ່ວປະເທດ ຄັ້ງທີ 7 ທີ່ແຂວງສາລະວັນ ເປັນເຈົ້າພາບໃນປີ 2020. ເມື່ອບໍ່ດົນ ຢູ່ທີ່ສະໝາມກິລາແຂວງສາລະວັນ ໄດ້ມີພິທີວາງສີລາລຶກໂຄງການປັບປຸງກໍ່ສ້າງສະໝາມກິລາແຂວງ, ໂດຍການເຂົ້າຮ່ວມຂອງ ທ່ານ ສີສຸວັນ ວົງຈອມສີ ເຈົ້າແຂວງໆສາລະວັນ, ທ່ານ ພູທົງ ຄຳມະນີວົງ ຮອງເຈົ້າແຂວງ ປະທານສະມາຄົມກິລາກາຍະກຳແຂວງ, ມີ ທ່ານ ຈືຈູກັງ ບໍລິສັດອິນທະສິດກໍ່ສ້າງເຄສະຖານ ຈຳກັດຜູ້ດຽວ, ມີບັນດາຄະນະປະຈຳພັກແຂວງ, ກຳມະການພັກແຂວງ, ພະແນກການອ້ອມຂ້າງ ແລະພາກສ່ວນຕ່າງໆທີ່ກ່ຽວຂ້ອງເຂົ້າຮ່ວມ.
ທ່ານ ສີລີສັກ ຖະໜອມຮັກ ຫົວໜ້າພະແນກສຶກສາທິການ ແລະ ກິລາແຂວງສາລະວັນ ທັງເປັນເຈົ້າຂອງໂຄງການດັ່ງກ່າວ ໄດ້ລາຍງານກ່ຽວກັບການເຄື່ອນໄຫວປະຕິບັດໂຄງການດັ່ງກ່າວໃຫ້ຮູ້ວ່າ: ໂຄງການປັບປຸງ, ກໍ່ສ້າງ ແລະ ສ້ອມແປງສະໜາມກິລາແຂວງ ເປັນໂຄງການໜຶ່ງທີ່ບັນຈຸເຂົ້າໃນແຜນພັດທະນາເສດຖະກິດ-ສັງຄົມ 5 ປີ ຂອງແຂວງ ສົກປີ 2016-2020 ແລະ ໄດ້ສຳຫຼວດອອກແບບມາແຕ່ປີ 2016. ສຳລັບສະໜາມກິລາເປີດ-ປິດ ມີມູນຄ່າ 19 ຕື້ 451 ລ້ານກວ່າກີບ ແລະ ຈະປະຕິບັດໃນ 4 ໜ້າວຽກໃຫຍ່ ຄື: ກໍ່ສ້າງອັດສະຈັນບ່ອນນັ່ງຊົມ, ກໍ່ສ້າງສະໜາມກິລາ (ເດີ່ນເຕະບານ) ກໍ່ສ້າງຮ່ອງແລ່ນອ້ອມສະໜາມ ແລະ ກໍ່ສ້າງຮ່ອງລະບາຍນ້ຳ ໂດຍແມ່ນ ບໍລິສັດ ອິນທະສິດກໍ່ສ້າງເຄຫາສະຖານ ຈຳກັດຜູ້ດຽວເປັນຜູ້ຮັບເໝົາກໍ່ສ້າງ ກຳນົດເວລາການກໍ່ສ້າງ 9 ເດືອນ, ນັບແຕ່ມື້ວາງສີລາລຶກເປັນຕົ້ນໄປ ແລະ ຄາດວ່າຈະໃຫ້ສຳເລັດໃນປີ 2019.
Editor: ກຳປານາດ ລັດຖະເຮົ້າ
