ທ່ານນາງ ບຸນພັກ ອິນທະປັນຍາ ຮອງເຈົ້າແຂວງໄຊຍະບູລີ ໄດ້ຖະແຫຼງຂ່າວຕໍ່ສື່ມວນຊົນພາຍໃນແຂວງເມື່ອບໍ່ດົນມານີ້ ຢູ່ທີ່ຫ້ອງຮັບແຂກຫ້ອງວ່າການປົກຄອງແຂວງ ເຊິ່ງທ່ານໄດ້ຍົກໃຫ້ເຫັນຄວາມພ້ອມໃນການເປີດປີທ່ອງທ່ຽວ 2018 ທີ່ແຂວງໄຊຍະບູລີ ແມ່ນພ້ອມແລ້ວໃນທຸກດ້ານເຊິ່ງລາຍລະອຽດທ່ານໄດ້ກ່າວວ່າ : ສໍາລັບການຈັດປີທ່ອງທ່ຽວລາວແຂວງໄຊຍະບູລີ ແມ່ນຈະໄດ້ຈັດຂຶ້ນພ້ອມໆກັບງານມະຫາກໍາບຸນຊ້າງ ໃນວັນທີ 17 ກຸມພາ 2018 ທີ່ຈະມາເຖີງນີ້ ເຊິ່ງປະກອບມີທັງໝົດ 12 ກິດຈະກໍາ ໃນຂອບເຂດທົ່ວແຂວງ ເຊັ່ນ: ເທດສະການບຸນກອງເຂົ້າໃຫຍ່ເມືອງພຽງ, ເດືອນ 1 ປີ 2018, ງານມະຫາກໍາບຸນຊ້າງ ຢູ່ເທດສະບານແຂວງ ຈັດຂຶ້ນໃນເດືອນ 2 ປີ 2018 , ເທດສະການບຸນເຂົ້າຈີ່ໃຫຍ່ເມືອງບໍ່ແຕນ ຈັດຂື້ນເດືອນ 2 ປີ 2018, ເທດສະການບຸນສິງໂຂນ ເມືອງປາກລາຍ ຈັດຂື້ນໃນເດືອນ 3 ປີ 2018, ເທດສະການບຸນພະທາດປວກ ເມືອງຄອບ ຈັດຂື້ນໃນເດືອນ 3 ປີ 2018, ເທດສະການບຸນພະທາດນາງສາມຜີວ ເມືອງທົ່ງມີໄຊ ຈັດຂື້ນໃນເດືອນ 4 ປີ 2018, ເທດສະການບຸນພະເວດເມືອງແກ່ນທ້າວ ຈັດຂື້ນໃນເດືອນ 6 ປີ 2018, ເທດສະການບຸນຊ່ວງເຮືອເມືອງຫົງສາ ຈັດຂື້ນໃນເດືອນ 9 ປີ 2018, ເທດສະການທາດຊຽງລົມ ເມືອງຊຽງຮ່ອນຈັດຂຶ້ນໃນເດືອນ 10 ປີ2018, ເທດສະການບຸນຊ່ວງເຮືອເມືອງເງິນ ຈັດຂຶ້ນໃນເດືອນ 10 ປີ 2018, ເທດສະການບຸນດອກແດງ ເມືອງໄຊສະຖານ ຈັດຂຶ້ນໃນເດືອນ 12 ປີ 2018 ແລະ ງານປະເພນີເຜົ່າຕ່າງໆ, ທັງໝົດນັ້ນແມ່ນໄດ້ກໍານົດເປັນປະຕິທິນຮອບວຽນໃນປີທ່ອງທ່ຽວຂອງແຂວງ ເປັນແຕ່ລະເດືອນພ້ອມນີ້ຍັງມີກິດຈະກໍາປິ່ນອ້ອມ ເຊັ່ນ: ການຈັດຄາລາວານລົດແຕ່ເມືອງໄຊຍະບູລີ ຫາ ເມືອງໄຊສະຖານ ແລະ ເດີນທາງໄປທ່ຽວຊົມພັນຖໍ້ານໍ້າທັ່ງ ທີ່ເມືອງໄຊຍະບູລີ, ການແລກປ່ຽນທາງດ້ານສິລະປະວັນນະຄະດີ, ກິລາ ລະຫ່ວາງເມືອງ ກັບ ແຂວງ, ແຂວງກັບບັນດາແຂວງໃກ້ຄຽງ ແລະ ກິດຈະກໍາອື່ນໆອີກ, ເຊິ່ງກິດຈະກໍາດັ່ງກ່າວຈະໄດ້ຈັດຂຶ້ນແຕ່ເດືອນ 12 ປີ 2017 – 12 ປີ 2018
ໃນຕອນທ້ຍ ທ່ານ ຮອງເຈົ້າແຂວງໄຊຍະບູລີ ກໍ່ຍັງໄດ້ຮຽກຮ້ອງມາຍັງທຸກພາກສ່ວນຈົ່ງຮ່ວມແຮງຮ່ວມໃຈ ປະກອບສ່ວນເຂົ້າໃນກິດຈະກໍາຕ່າງໆ ແລະ ຫວັງວ່າຈະໄດ້ຮັບການສະໜັບສະໜູນຈາກບັນດາຫົວໜ່ວຍທຸລະກິດທັງພາກລັດ, ເອກະຊົນ ແລະ ບັນດາອົງການຈັດຕັ້ງສາກົນຕ່າງໆ, ບັນດາຜູ້ປະກອບການທຸລະກິດ, ບໍລິການພ້ອມກັນເປັນເຈົ້າພາບຮ່ວມກັນໃນການຈັດປີທ່ອງທ່ຽວລາວ 2018 ນີ້ ໃຫ້ມີຄວາມປອດໄພ, ຄວາມສະອາດ, ຈົບງາມ ພ້ອມທັງຊຸກຍູ້ສົ່ງເສີມຜະລິດຕະພັນທ່ອງທ່ຽວຕະຫຼອດເຖິງສີ່ງອໍານວຍຄວາມສະດວກເພື່ອຮອງຮັບການບໍລິການໃຫ້ແກ່ນັກທ່ອງທ່ຽວເຊັ່ນ: ໂຮງແຮມ, ເຮືອນພັກ, ຮ້ານອາຫານ, ຮ້ານບັນເທິງ, ການນໍາທ່ຽວ ແລະ ການຂົນສົ່ງນັກທ່ອງທ່ຽວ ຕ້ອງເອົາໃຈໃສ່ຮັບປະກັນຄຸນນະພາບການບໍລິການຕາມຫຼັກສາກົນ ຄື: ການຕ້ອນຮັບ, ມະນຸດສໍາພັນດີ, ຄວາມສະອາດດ້ານສະຖານທີ່ ແລະ ອາຫານປອດສານພິດ, ຍຸດຕິທໍາບໍ່ເອົາລັດເອົາປຽບລູກຄ້າ, ມີຄວາມສະຫງົບເພື່ອເຮັດໃຫ້ບັນລຸຕາມຈຸດປະສົງທີ່ວາງໄວ້.
ຂອບໃຈ ທີມຂ່າວແຂວງໄຊຍະບູລີ
Editor: ກຳປານາດ ລັດຖະເຮົ້າ
