ປີທ່ອງທ່ຽວລາວ 2018, ຫລາຍໆແຂວງ ໄດ້ຍົກເອົາກິດຈະກຳ ການທ່ອງທ່ຽວ ທີ່ເດັ່ນໆປະຈຳ ແຂວງຂອງຕົນ ເພື່ອດຶງດູດ ນັກທ່ອງທ່ຽວ ທັງພາຍໃນ ແລະ ຕ່າງປະເທດ, ສະເພາະແຂວງ ອັດຕະປື ກໍໄດ້ມີການກໍານົດເອົາຫລາຍໆກິດຈະກໍາ. ໃນນັ້ນມີ 2 ກິດຈະກໍາທີ່ຖືກບັນຈຸເຂົ້າໃນງານສະເຫລີມສະຫລອງລະດັບຊາດຄື: ບຸນນະມັດສະການພະເຈົ້າໄຊຍະເສດຖາທິລາດ ທີ່ບ້ານວັດທາດ ເມືອງໄຊເສດຖາ ແລະ ງານຕ້ອນຮັບຂະບວນຄາລາວານລົດ ຈາກນະຄອນລວງວຽງຈັນສູ້ແຂວງພາກາງ ແລະພາກໃຕ້.
ທ່ານນາງ ບຸນນານ ບຸນນະແສງ ຫົວໜ້າພະແນກ ຖະແຫລງຂ່າວວັດທະນະທຳ ແລະ ທ່ອງທ່ຽວ ແຂວງອັດຕະປື, ທັງເປັນຮອງປະທານຄະນະກໍາມະການຈັດງານປີທ່ອງທ່ຽວລາວ 2018 ແຂວງອັດຕະປື ໄດ້ຖະແຫລງຂ່າວຕໍ່ຜ່ານສື່ມວນຊົນເມື່ອບໍ່ດົນນີ້ວ່າ: ເພື່ອເປັນການກະກຽມຄວາມພ້ອມດ້ານຕ່າງໆ ໃນການເປີດປີທ່ອງທ່ຽວລາວ 2018 ສໍາລັບແຂວງອັດຕະປື, ໄດ້ມີການກະກຽມຄວາມພ້ອມສໍາເລັດແລ້ວໃນຫລາຍດ້ານ, ເຊິ່ງກິດຈະກຳ ສະເພາະຂອງແຂວງ ແມ່ນໄດ້ຖືເອົາງານບຸນປະເພນີຂອງແຕ່ລະຊົນເຜົ່າ ທີ່ມີສີສັນ ແລະ ຄວາມຫລາກຫລາຍທີ່ແຕກຕ່າງກັນທັງ 11 ຊົນເຜົ່າພາຍໃນແຂວງ, ໃນນັ້ນ ປະກອບ ມີ: ບຸນປະເພນີໄຂປະຕູເລົ້າຂອງເຜົ່າໂອຍ ຢູ່ບ້ານອິນທີ, ເມືອງສະໜາມໄຊ; ບຸນເຂົ້າບ້ານຂອງເຜົ່າເບົາ, ຢູ່ບ້ານວັງຍາງ, ເມືອງພູວົງ; ບຸນປີໃໝ່ລາວ ພິທີປ່ຽນຜ່າບ່ຽງຢະອົງແສນ, ທີ່ວັດສະແຄະ, ເມືອງໄຊເສດຖາ; ບຸນບັ້ງໄຟບ້ານວັດຫລວງ, ເມືອງໄຊເສດຖາ; ບຸນອອກພັນສາຊ່ວງເຮືອປະຈໍາປີ ທີ່ເທສະບານແຂວງອັດຕະປື; ບຸນກິນເຂົ້າໃໝ່ເຜົ່າຕະຫລຽງ, ຢູ່ເມືອງຊານໄຊ; ບຸນນະມັດສະການພະເຈົ້າໄຊຍະເສດຖາທິລາດ, ຢູ່ເມືອງໄຊເສດຖາ; ພິທີກໍາງານຜ່າໜອງ ວິທີຫາປາແບບພື້ນບ້ານ, ຢູ່ບ້ານຫີນລາດ ເມືອງສະ ໜາມໄຊ ແລະ ພິທີສະຫລອງສວນຫລັກເມືອງຂອງແຂວງ.
ທ່ານນາງ ບຸນນານ ບຸນນະແສງ ຍັງໃຫ້ຮູ້ອີກວ່າ: ນອກຈາກງານບຸນປະເພນີຕ່າງໆ ຂອງແຕ່ລະຊົນເຜົ່າແລ້ວ ແຂວງອັດຕະປື ຍັງມີແຫລ່ງທ່ອງທ່ຽວທາງທໍາມະຊາດ ແລະ ປະຫວັດສາດ ທີ່ໜ້າສົນໃຈເປັນຕົ້ນ ທາງທໍາມະຊາດມີນໍ້າຕົກຕາດແຊພະ ແລະ ນໍ້າຕົກຕາດແຊປອງໄລ ທີ່ສວຍສົດງົດງາມ, ມີຕາດຫົວຄົນ-ລີສອດຕາດແຜດ ແລະ ຕາດຈໍ. ສ່ວນແຫລ່ງທ່ອງທ່ຽວທາງປະຫວັດສາດ ມີເສັ້ນທາງໂຮ່ຈິມິນຊາກລົດຕັງ ແລະ ລູກສອນໄຟ, ສະຖານທີ່ໝັ້ນການປະຕິວັດເຂດລາວໃຕ້ ແລະ ຮ່ອງຮອຍເມືອງອົງການເກົ່າ, ພ້ອມນີ້ແຂວງອັດຕະປື ຍັງມີອາຫານພື້ນບ້ານທີ່ເປັນເອກະລັກສະເພາະ ທີ່ແຂວງອື່ນບໍ່ມີເປັນຕົ້ນ: ໝົກໃບໝາກຫຸ່ງ, ຊີ້ນຕະໂນດ, ແຈ່ວປາເຕົ່າ ແລະ ອື່ນໆ ໃຫ້ນັກທ່ອງທ່ຽວທັງພາຍໃນ ແລະ ຕ່າງປະເທດໄດ້ທ່ຽວຊົມ ແລະ ຊີ້ມລົດຊາດອາຫານພື້ນບ້ານ ອີກດ້ວຍ.
Editor: ຂ່າວສານປະເທດລາວ
