ຫຼາຍປີິຜ່ານມາຢູ່ແຄມຂອງຫາດດອນຈັນ ນັບແຕ່ກາຍ 3 ແຍກປາກປ່າສັກ ລົງມາຫາ ສວນເຈົ້າອານຸວົງ ຖືກພັດທະນາໄດ້ຢ່າງຈົບງາມ ເຊັ່ນ: ມີກັນເຈື່ອນ, ຖະໜົນຫົນທາງທີ່ກວ້າງຂວາງ, ສະໜາມຄົນຍ່າງ, ຕະຫຼາດຂາຍເສື້ອຜ້າ ແລະ ກິດຈະກຳອີກຫຼາຍຢ່າງ. ປັດຈຸບັນ ແຄມຂອງໄດ້ກາຍ ເປັນຫຼາຍກວ່າການໃຫ້ຍ່າງອອກກຳລັງກາຍ, ຊົມວິວ ແລະ ສະຖານທີ່ທຳການຄ້າຂາຍ.
ຈາກການທີ່ຜູ້ສື່ຂ່າວພວກເຮົາໄດ້ລົງໄປສໍາຫລວດ ພົບວ່າ: ສະຖານທີ່ແຄມຂອງແມ່ນເຕັມໄປດ້ວຍບັນຍາກາດອັນອົບອຸ່ນ, ໄດ້ພົບເຫັນຄົນທຸກເພດ ທຸກໄວອາຍຸ ໄປຍ່າງອອກກຳລັງກາຍ, ບາງຄົນໄປນັ່ງຊົມຕາເວັນຕົກດິນ ໃນຍາມຄ້ອຍຄ່ຳ ຊຶ່ງສາມາດເວົ້າໄດ້ວ່າ ແຄມຂອງເວລານີ້ກາຍເປັນສະຖານທີ່ພັກຜ່ອນ, ອອກກຳລັງກາຍ, ເຕັ້ນແອໂລບິກ ເຊິ່ງເປັນສະຖານທີ່ທ່ອງທ່ຽວທີ່ສຳຄັນອີກໜຶ່ງແຫ່ງຫນຶ່ງຂອງຊາວນະຄອນຫຼວງວຽງຈັນ ແລະ ໃນແຕ່ລະວັນ ຈະມີມວນຊົນອອກມາຍ່າງໂດຍສະເພາະຖະໜົນຄົນຍ່າງບໍ່ຕ່ຳກວ່າ 1 ແສນຄົນ.
ແຄມຂອງໃນເວລານີ້ ນອກຈາກຈະເປັນສະຖານທີ່ພັກຜ່ອນ, ອອກກຳລັງກາຍ ແລະ ທ່ອງທ່ຽວແລ້ວ ຍັງເປັນສະຖານທີ່ສ້າງລາຍຮັບໃຫ້ກັບແມ່ຄ້າຊາວຂາຍ, ຮ້ານອາຫານ ແລະ ຮ້ານເສື້ອຜ້າຕ່າງໆ. ຫາກຢັບຂຶ້ນໄປເທິງ 3 ແຍກປາກປ່າສັກ ກໍ່ຈະເປັນສວນດອກໄມ້ ແລະ ຮ້ານອາຫານເປັນຈຳນວນຫຼາຍ ມີອາຫານຫຼາກຫຼາຍໃຫ້ເລືອກກິນທັງອາຫານທະເລ, ອາຫານພື້ນບ້ານ ແລະ ເຄື່ອງດື່ມທຸກປະເພດ. ສິ່ງທີ່ໜ້າສົນໃຈອີກໜຶ່ງກິດຈະກຳກໍ່ຄືການຂີ່ ພາລາມໍເຕີ paramotor ເທິງອາກາດ, ຂີ່ເຮືອເຈັດສະກີເທີງໜ້ານ້ຳ ອັນສ້າງຄວາມສົນໃຈໃຫ້ກັບມວນຊົນໄດ້ເປັນຢ່າງດີ, ຖ້າທ່ານໃດຍັງບໍ່ເຄີຍໄປ ກໍ່ສາມາດໄປສຳຜັດກັບບັນຍາກາດແບບນີ້ໄດ້ທຸກວັນ.
ພິເສດອີກອັນຫນຶ່ງ ແຄມຂອງໃນວັນນີ້ ໄດ້ກາຍເປັນພື້ນທີ່ເສດຖະກິດ ອັນສ້າງລາຍຮັບຈາກການຈັບຈ່າຍຊື້ສິນຄ້າ ກະຈາຍສູ່ຊຸມຊົນ ໃນແຕ່ລະວັນຫລາຍຕື້ກີບ ແລະ ຍັງສ້າງວຽກເຮັດງານທຳໃຫ້ຊາວຫນຸ່ມ ແລະ ພໍ່ແມ່ປະຊາຊົນໃນບໍລິເວນດັ່ງກ່າວຕື່ມອີກ.
Editor: ຕະວັນ ແສງສະຫວັນ
