ເມືອງວັງວຽງ ແຂວງວຽງຈັນ ເຊິ່ງເປັນເມືອງທີ່ຂື້ນຊື່ເລື່ອງແຫລງທ່ອງທ່ຽວ ທີ່ສຳຄັນຫລາຍແຫ່ງຂອງປະເທດ ເປັນຈຸດຫມາຍປາຍທາງແຫ່ງຫນຶ່່ງຂອງນັກທ່ອງທ່ຽວ ກ່ອນຈະເດີນທາງຕໍ່ໄປແຂວງຕ່າງໆທາງພາກເຫນືອຂອງລາວ ຊຶ່ງສົ່ງຜົນໃຫ້ທຸລະກິດເຮືອນພັກ, ໂຮງແຮມ, ຮ້ານອາຫານ ແລະ ທຸລະກິດທີ່ຕິດພັນກັບແຫຼ່ງທ່ອງທ່ຽວຂະຫຍາຍຕົວໄດ້ຢ່າງຕໍ່ເນື່ອງ. ປັດຈຸບັນ ເມືອງວັງວຽງກຳລັງຈະມີການຈັດເຂດພາຍໃນຕົວເມືອງ ແລະ ບຸກເບີກຖ້ຳຕື່ມອີກ 2-3 ແຫ່ງ.
ທ່ານ ບຸນມີ ພົມມະວົງສາ, ຫົວໜ້າຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເມືອງວັງວຽງ ເປີດເຜີຍວ່າ: ເມືອງວັງວຽງກຳລັງຈະຍົກລະດັບສະຖານທີ່ທ່ອງທ່ຽວໃຫ້ທຽບເທົ່າກັບອາຊຽນ ເຊັ່ນ: ຮ້ານອາຫານຕາມສາຍນ້ຳຊອງ, ຖ້ຳ, ບາລູນ ແລະ ກິດຈະກຳອື່ນໆ ທີ່ເປັນທີ່ນິຍົມຂອງນັກທ່ອງທ່ຽວ ໂດຍສະເພາະການເຂົ້າເປັນປະຊາຄົມເສດຖະກິດອາຊຽນ ທີ່ຈະມີນັກທ່ອງທ່ຽວທັງພາຍໃນ ແລະ ຕ່າງປະເທດເພີ່ມຂຶ້ນ.
ໃນປີ 2015 ຜ່ານມາ ວັງວຽງສາມາດເກັບລາຍຮັບຈາກການທ່ອງທ່ຽວສູງເຖິງ 80 ຕື້ກວ່າກີບມີນັກທ່ອງທ່ຽວທີ່ເດີນທາງມາວັງວຽງ ປະມານ 1 ແສນ 40 ພັນຄົນ. ໃນນີ້, ນັກທ່ອງທ່ຽວຕ່າງປະເທດ 1 ແສນກວ່າຄົນ ແລະ ນັກທ່ອງທ່ຽວພາຍໃນ 31 ພັນກວ່າຄົນ. ສໍາລັບປີ 2016 ມີຕົວເລກຈຳນວນນັກທ່ອງທ່ຽວຫຼຸດລົງເລັກໜ້ອຍ ແຕ່ຈຳນວນນັກທ່ອງທ່ຽວທີ່ເດີນທາງມາຈາກບັນດາປະເທດອາຊີ ເພີ່ມຂຶ້ນບໍ່ເຖິງ 10% ເຊິ່ງເປັນຕົວເລກທີ່ບໍ່ໜ້າຕົກໃຈພໍປານໃດ.
ສໍາລັບ ສະຖານທີ່ ແລະ ກິດຈະກໍາທີ່ນັກທ່ອງທ່ຽວນິຍົມໄປທ່ຽວ ປະກອບມີ: ລ່ອງກົງເບັງ, ຂີ່ເຮືອກາຍັກ, ຂີ່ເຮືອຈັກຊົມທຳມະຊາດແຄມນ້ຳຊອງ, ທ່ຽວຊົມສະຖານທີ່ທຳມະຊາດ, ຊົມຖ້ຳປູຄຳ, ແກ້ງຫຍຸຍ, ຖ້ຳນ້ຳ, ຖ້ຳຈັງ, ຖ້ຳລົມ ແລະ ຂີ່ສະລິງ.
ເພື່ອເປັນການຮອງຮັບຈໍານວນນັກທ່ອງທ່ຽວທີ່ຄາດວ່າຈະເພີ່ມຂຶ້ນໃນປີ 2018 ນີ້, ທາງເມືອງຈະເລັ່ງປັບປຸງບັນດາສະຖານທີ່ທ່ອງທ່ຽວ, ບັນດາໂຮງແຮມ, ເຮືອນພັກ, ຮ້ານອາຫານ, ຮ້ານກິນດື່ມ ແລະ ຜູ້ປະກອບການຕ້ອງໄດ້ຮົມອົບພະນັກງານໃຫ້ໄດ້ມາດຕະຖານອາຊຽນ ເພື່ອການພັດທະນາທີ່ຍືນຍົງ ພ້ອມກັນນີ້ ຍັງຈະກຳນົດເຂດພາຍໃນເມືອງ ໃຫ້ມີຄວາມເປັນລະບຽບຮຽບຮ້ອຍ, ສວຍງາມ ແລະ ອຳນວຍຄວາມສະດວກແກ່ນັກທ່ອງທ່ຽວ

Editor: ເສດຖະກິດ-ການຄ້າ