ກຳແພງໃຫ່ຍ ພູຄັນນາ ຫຼື ກຳແພງຍັກ: ເປັນສະຖານທີ່ທ່ອງທ່ຽວທາງທຳມະຊາດ ຕັ້ງຢູ່ບ້ານໃໝ່ໂພສີ, ເຊິ່ງຫ່າງຈາກເທດສະບານເມືອງທ່າແຂກ 8 ກິໂລແມັດ, ຂຶ້ນລົດໄປຕາມທິດທາງເໜືອ ຕາມເສັ້ນທາງເລກທີ 13 ໃຕ້. ເປັນກຳແພງຫີນທີ່ກ້ວາງ ແລະ ສູງ, ມີຫຼາຍຕອນ ເຊິ່ງເມື່ອລວມກັນແລ້ວ ຍາວເຖິງ 15 ກິໂລແມັດ. ສະຖານທີ່ສຳລັບຊົມກຳແພງຍັກນີ້ ດີທີ່ສຸດແມ່ນຢູ່ແຖບບ້ານນາຫຍ້າຫວາຍ, ກຳແພງຫີນຍັກ ຢູ່ທີ່ນີ້ເປັນບ່ອນທີ່ ມີກ້ອນຫີນຍັກ ໃນຮູບຊົງກຳແພງ ທີ່ບໍ່ທັນແຕກແຍກ, ຍາວກ່ວາໜູ່ມີຄວາມຍາວເຖິງ 75 ແມັດ ແລະ ມີຄວາມສູງເຖິງ 16 ແມັດ.
“ກຳແພງໃຫ່ຍພູຄັນນາ” ໄດ້ໄຂປິດສະໜາວ່າ: ຄຳມ່ວນ ເປັນແຂວງແຫ່ງຕຳນານທີ່ມີຄວາມຈິງ ໂດຍມີບັນດານັກບູຮານຄະດີຊີ້ແຈງວ່າ: ແມ່ນກຳແພງທີ່ເກີດຂຶ້ນຈາກທຳມະຊາດ ບໍ່ແມ່ນຄົນປັ້ນແຕ່ງ ເຊິ່ງຜ່ານຂະບວນວິວັດທະນາການຫຼາຍລ້ານປີກ່ອນ ຈຶ່ງເປັນກຳແພງຍັກຫີນຊາຍ. ຢ່າງໃດກໍ່ດີ, ຍັງມີທິດສະດີອື່ນອີກ ທີ່ສັນນິຖານວ່າ ແມ່ນອະລິຍະທຳແຫ່ງລະບົບປ້ອງກັນ ທີ່ສ້າງຂຶ້ນໃນສະຕະວັດ VIII ພາຍໃຕ້ຍຸກສະໄໝຂອງອານາຈັກສີໂຄດ ຕະບອງເກົ່າແກ່.

Editor: ອົງການພັດທະນາການທ່ອງທ່ຽວ