ທ່ານ ຍັນຍົງ ສີປະເສີດ ຮອງເລຂາພັກແຂວງ, ຮອງເຈົ້າແຂວງ, ທັງເປັນປະທານຈັດງານມະຫາກໍາບຸນຊ້າງ ໄດ້ເປີດເຜີຍ ວ່າ: ສໍາລັບ ການຈັດງານມະຫາກຳບຸນຊ້າງໄຊຍະບູລີ ປະຈໍາປີ 2018 ນີ້ ຈະໄດ້ດໍາເນີນໄປເປັນເວລາ 7 ວັນ ແລະ ຈະເລີ່ມເປີດງານເປັນທາງການໃນວັນທີ 17 ກຸມພາ 2018 ເຊິ່ງຈະມີຊ້າງເຂົ້າຮ່ວມທັງໝົດຈຳນວນ 69 ໂຕ ແລະ ຈະຈັດພິທີປິດເປັນທາງການໃນວັນທີ 22 ກຸມພາ.
ສໍາລັບ ຕະຫຼາດນັດວາງສະແດງສິນຄ້າແມ່ນຈະເລີ່ມເປີດໃຫ້ບໍລິການນັບແຕ່ວັນທີ 16 ກຸມພາ ເປັນຕົ້ນໄປ; ພ້ອມກັນນີ້ ກໍໄດ້ກໍານົດເອົາງານບຸນຄັ້ງນີ້ ເປັນການເປີດປີທ່ອງທ່ຽວຂອງແຂວງໄຊຍະບູລີ ຢ່າງເປັນທາງການ. ສໍາລັບ ກິດຈະກໍາຫຼັກຂອງການຈັດງານ ແມ່ນຈະເນັ້ນໜັກກິດຈະກຳທີ່ຕິດພັນກັບຊ້າງ ແລະ ການອະນຸລັກຊ້າງໂດຍສະເພາະການສະແດງຂອງຊ້າງຄຳຮູ້ ຊຶ່ງຈະຍົກລະດັບໃຫ້ມີຄວາມຫຼາກຫຼາຍກວ່າປີທີ່ຜ່ານມາ, ພ້ອມກັນນີ້ ໃນແຕ່ລະວັນຂອງໄລຍະການຈັດງານແມ່ນຈະຈັດໃຫ້ມີກິດຈະກໍາທ່ອງທ່ຽວ ທີ່ສວຍງາມເຊັ່ນ: ຖ້ຳນ້ຳທັ່ງ, ຖ້ຳຜາຂີ້ມິ້ນ, ຖ້ຳລະຄັງສະຫວັນ, ກົກໄມ້ຂ່າໃຫຍ່ຫຼາຍຮ້ອຍປີ, ນ້ຳຕົກຕາດ, ຢ້ຽມຊົມວິຖີຊີວິດຂອງເຜົ່າຕອງເຫຼືອງ, ວັດທະນະທຳເຜົ່າລື້, ເຜົ່າອື່ນໆ ແລະ ຊົມທະເລໝອກ ແລະ ຊີມຊາພັນປີ.
ນອກຈາກນີ້, ໃນງານບຸນຍັງມີກິດຈະກຳຕ່າງໆ ເພື່ອໃຫ້ບັນດາທ່ານໄດ້ມາທ່ຽວ, ມາຊົມເປັນຕົ້ນແມ່ນ: ພິທີເຮັດບຸນຕັກບາດອຸທິດກຸສົນໃຫ້ຊ້າງ, ການວາງສະແດງສິນຄ້າໜຶ່ງເມືອງໜຶ່ງຜະລິດຕະພັນ ຈາກພາຍໃນ ແລະ ຕ່າງປະເທດ, ສິນຄ້າກະສິກຳ, ຫັດຖະກຳ, ອຸດສາຫະກຳປຸງແຕ່ງທີ່ເປັນເອກະລັກຂອງທ້ອງຖິ່ນ, ການສະແດງຄອນເສີດ ແລະ ການສະແດງສິລະປະວັນະຄະດີຈາກພາກສ່ວນຕ່າງໆ.
Editor: ເສດຖະກິດ-ການຄ້າ
