ເພື່ອເປັນການສ້າງບຸກຄະລາກອນເຂົ້າໃນການພັດທະນາທຸລະກິດ ດ້ານການທ່ອງທ່ຽວ ໃຫ້ມີຄຸນນະພາບ ແລະ ຮັບປະກັນໃຫ້ມີການບໍລິການທີ່ດີ ວ່ອງໄວ ແລະ ມີຄວາມປະທັບໃຈຕໍ່ຜູ້ທີ່ເຂົ້າມາຊົມໃຊ້ບໍລິການ ທັງພາຍໃນ ແລະ ຕ່າງປະເທດ ທັງເປັນການປະກອບສ່ວນຮັບໃຊ້ໃຫ້ແກ່ວັນສຳຄັນຕ່າງໆຂອງຊາດ ແລະ ການເປັນເຈົ້າພາບທີ່ດີ ເພື່ອຕ້ອນຮັບປີທ່ອງທ່ຽວລາວ 2018 ນີ້.
ດັ່ງນັ້ນ ພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວ ນະຄອນຫຼວງວຽງຈັນ ຈຶ່ງໄດ້ເປີດຊຸດຝຶກອົບຮົມພະນັກງານບໍລິການທີ່ພັກແຮມ, ຮ້ານອາຫານ, ສວນອາຫານ ແລະ ສະຖານທີ່ທ່ອງທ່ຽວຊຸດທີ 25 ຂຶ້ນ ໃນວັນທີ 5 ທັນວາ ຜ່ານມາ ຢູ່ທີ່ຫ້ອງປະຊຸມຂະແໜງທ່ອງທ່ຽວ ນະຄອນຫຼວງວຽງຈັນ ໂດຍການເຂົ້າຮ່ວມເປັນປະທານຂອງທ່ານ ຄຳປະດິດ ເຂັມມານິດ ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ນະຄອນຫຼວງວຽງຈັນ ເຊິ່ງມີສໍາມະນາກອນຫຼາຍກວ່າ 30 ຄົນ ເຂົ້າຮ່ວມ,
ສຳລັບ ຊຸດຝຶກອົບຮົມໃນຄັ້ງນີ້ ນັກສຳມະນາກອນ ແມ່ນຈະໄດ້ຮັບບົດຮຽນຫຼາຍດ້ານ ເພື່ອໄປນຳໃຊ້ເຂົ້າໃນວຽກງານຕົວຈິງ ເປັນຕົ້ນການຮັບແຂກດ້ວຍໄມຕີຈິດ, ໃບໜ້າຍິ້ມແຍ້ມແຈ່ມໃສການບໍລິການ, ຫ້ອງນອນດ້ວຍຄວາມປອດໄພຕໍ່ຊີວິດ ແລະ ຊັບສິນຂອງແຂກ, ສະໜອງອາຫານທີ່ມີຄວາມສະອາດ ຮັບປະກັນດ້ານສຸຂະອະນາໄມ ແຊບນົວ ແລະ ເປັນເອກະລັກ, ການບໍລິການທີ່ມີຄວາມວ່ອງໄວປະທັບໃຈ ແລະ ຖືກຫຼັກວິຊາການ ລວມທັງລາຄາການບໍລິການທີ່ເໝາະສົມ ແລະ ສົມເຫດສົມຜົນ ຊຸດຝຶກອົບຮົມໃນຄັ້ງນີ້ ແມ່ນຈະດຳເນີນເປັນເວລາ 5 ວັນ ຈຶ່ງຈະປິດລົງ.
Editor: ດາວໄຊ ສີວິໄລ
