ບຸນນະມັດສະການພະບາດໂພນສັນ ໃນປີນີ້ ຈັດຍາວນານ ເປັນເວລາ 9 ວັນ ເຊີ່ງເລີ່ມມາແຕ່ວັນທີ 23 ທັນວາ ໄປຈົນເຖິງ ວັນທີ 31 ທັນວາ 2017 ແລະ ພິເສດໃນວັນທີ 1 ມັງກອນ 2018 ແມ່ນຈະມີພິທີເປີດປີທ່ອງທ່ຽວລາວ ຂອງແຂວງບໍລິຄໍາໄຊ ຢ່າງເປັນທາງການ.
ຕະຫລອດໄລຍະຂອງງານແມ່ນມີງານວາງສະແດງສິນຄ້າ: ງານຕະຫລາດນັດ ແລະ ວາງສະແດງຜະລິດຕະພັນທ່ອງທ່ຽວ. ການຄົບງັນງານບຸນຕາມປະເພນີ ໂດຍມີການໄຫວນະມັດສະການອົງພະທາດ, ແລະ ຮອຍພະບາດ. ງານບຸນແມ່ນໄດ້ຈັດຂຶ້ນເປັນເວລາ 9 ວັນເຕັມ ພາຍໃຕ້ຄໍາຂວັນທີ່ວ່າ: ໄປທ່ຽວບໍລິຄໍາໄຊ, ນໍາໃຈມິດຕະພາບ, ດິນແດນກຸຫລາບ, ກາບພະບາດໂພນສັນ, ອາຍຸຫມັ້ນພັນປີ.
ງານດັ່ງກ່າວເພື່ອເປັນເສີມຂະຫຍາຍ ແລະ ພັດທະນາວຽກງານການທ່ອງທ່ຽວຂອງແຂວງບໍລິຄໍາໄຊ ຕິດພັນກັບການສົ່ງເສີມການທ່ອງທ່ຽວ, ປີທ່ອງທ່ຽວລາວ 2018 ໃຫ້ກວ່າງຂວາງ, ໃນນັ້ນ ແຂວງບໍລິຄໍາໄຊ ຍັງຖືເອົາວຽກງານການທ່ອງທ່ຽວ ທໍາມະຊາດ, ວັດທະນະທໍາ ແລະ ປະຫວັດສາດ ໃຫ້ມີການຂະຫຍາຍຕົວຢ່າງແຂງແຮງ-ຕໍ່ເນື່ອງ, ເປັນການພັດທະນາການທ່ອງທ່ຽວ ໃຫ້ກາຍເປັນອຸດສາຫະກໍາການທ່ອງທ່ຽວ ແລະ ຍັງເປັນການດຶງດູດນັກທ່ອງທ່ຽວ ທັງພາຍໃນ ແລະ ຕ່າງປະເທດ ໃຫ້ຫລາຍຂື້ນ ເພື່ອໃຫ້ຂະແຫນງການທ່ອງທ່ຽວໄດ້ມີການພັດທະນາ ໄປຄຽງຄູ່ກັບຂະແຫນງການອື່ນໆ ນອກນັ້ນ, ຍັງເປັນການສົ່ງເສີມຜະລິດຕະພັນຫັດຖະກໍາ, ກະສິກໍາ ແລະ ການປຸງແຕ່ງ ປະກອບສ່ວນ ໃຫ້ຊີວິດການເປັນຢູ່ຂອງພໍ່ແມ່ປະຊາຊົນບັນດາເຜົ່າ ນັບມື້ນັບດີຂື້ນ.
Editor: ກຳປານາດ ລັດຖະເຮົ້າ
