ໃນວັນທີ 18 ທັນວາ 2017 ນີ້, ທີ່ໂຮງແຮມແລນມາກ ແມ່ຂອງຣີເວີໄຊ ນະຄອນຫລວງວຽງຈັນ, ໄດ້ຈັດກອງປະຊຸມເຜີຍແຜ່ຂໍ້ມູນການທ່ອງທ່ຽວ ແຂວງຫູເປີ່ຍ, ສປ.ຈີນ ແລະ ລາວ, ໂດຍການເຂົ້າຮ່ວມຂອງ ທ່ານ ນາງ ເຢນ ພູ ລິວ ຫົວໜ້າກົມພັດທະນາການທ່ອງທ່ຽວແຂວງຫູເປີ່ຍ ແລະ ທ່ານ ນາງ ພອນມະລີ ອິນທະພົມ ຮອງຫົວໜ້າກົມພັດທະນາການທ່ອງທ່ຽວ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ມີບັນດາຫົວໜ່ວຍທຸລະກິດທ່ອງທ່ຽວລາວ-ຈີນ ເຂົ້າຮ່ວມ. ກອງປະຊຸມດັ່ງກ່າວ, ຈັດຂຶ້ນເພື່ອການເຜີຍແຜ່ຂໍ້ມູນ ກ່ຽວກັບການທ່ອງທ່ຽວຂອງແຂວງຫູເປີຍ ສປ ຈີນ ຕໍ່ ສປປ ລາວ.
ໃນໂອກາດດັ່ງກ່າວ, ທ່ານ ນາງ ເຢນ ພູ ລິວ ກ່າວວ່າ: ແຂວງຫູເປີ່ຍ ເປັນແຂວງໜຶ່ງທີ່ຕັ້ງຢູ່ພາກກາງຂອງ ສປ ຈີນ ມີເນື້ອທີ່ 185.900 ຕາແມັດ ມີປະຊາກອນ 60 ລ້ານກວ່າຄົນ ມີແມ່ນໍ້າຢັງຊີຈຽງໄຫລຜ່ານ, ແຂວງດັ່ງກ່າວ ໄດ້ມີປະຫວັດສາດອັນຍາວນານ ມີສະຖານທີ່ທ່ອງທ່ຽວ ທາງທຳມະຊາດ ວັດທະນະທຳ ແລະ ປະຫວັດສາດ ທີ່ສາມາດດຶງດູດນັກທ່ອງທ່ຽວ ໃຫ້ເດີນທາງໄປທ່ຽວຊົມ ແຂວງດັ່ງກ່າວຈຳນວນຫລວງຫລາຍໃນແຕ່ລະປີ. ພ້ອມນີ້, ທ່ານ ນາງ ເຢນ ພູ ລິວ ຍັງໄດ້ນຳສະເໜີ ສະຖານທີ່ທ່ອງທ່ຽວເຊັ່ນ: ເມືອງວູຫັ່ນ ເປັນເທສະບານແຂວງຫູເປີ່ຍ ແລະ ເປັນຈຸດໃຈກາງຂອງການຄົມມະນາຄົມຂົນສົ່ງຂອງປະເທດຈີນ, ພູວູຕັ່ງ ເປັນແຫລ່ງກຳເນີດຂອງສາສະໜາເຕົ໋າ, ປ່າເຊີນຫລົງເຍ ເປັນປ່າຕຶບໜາ, ເຊິ່ງປ່າດັ່ງກ່າວ ແມ່ນມີຄົນປ່າບູຮານອາໄສຢູ່, ເຂື່ອນໄຟຟ້າຊັນເຊຍ ຕັ້ງຢູ່ເທິ່ງແມ່ນ້ຳຢັງຊີຈຽງ ແລະ ເປັນເຂື່ອນໄຟຟ້າທີ່ໃຫຍ່ທີ່ສຸດໃນປະເທດຈີນ, ພ້ອມນີ້, ນັກທ່ອງທ່ຽວຍັງສາມາດນັ່ງເຮືອ ຊົມທະເລສາບຕົງຫູ ທີ່ອ້ອມຮອບໄປດ້ວຍທິວທັດທຳມະຊາດທີ່ສວຍງາມ ພ້ອມທັງທ່ຽວຊົມວິຖີຊີວິດຂອງຊາວເມືອງວູຫັ່ນ ເປັນເມືອງໃຫຍ່ທີ່ງຽບສະຫງົບ ທັງເປັນສູນລວມຂອງການເດີນທາງທັງທາງບົກ ແລະ ທາງອາກາດ. ນອກຈາກນີ້, ຍັງມີສະຖານທີ່ທ່ອງທ່ຽວທີ່ສວຍງາມ ຈຳນວນຫລວງຫລາຍ.
ພ້ອມນີ້, ທ່ານ ນາງ ພອນມະລີ ອິນທະພົມ ກ່າວວ່າ: ການທີ່ກົມພັດທະນາການທ່ອງທ່ຽວແຂວງຫູເປີ່ຍ ໄດ້ນຳເອົາຂໍ້ມູນການທ່ອງທ່ຽວ ມາເຜີຍແຜ່ໃນຄັ້ງນີ້ ຖືວ່າເປັນການຮ່ວມມືດ້ານການທ່ອງທ່ຽວ ຂອງສອງ ປະເທດ ທີ່ສຳຄັນ ໂດຍສະເພາະການຮ່ວມມືດ້ານຂະແໜງການທ່ອງທ່ຽວລາວ ແລະ ຫູເປີ່ຍ ທີ່ຈະໄດ້ເລີ່ມຮ່ວມມືດ້ານການທ່ອງທ່ຽວ ດຶງດູດເອົານັກທ່ອງທ່ຽວເດີນທາງມາທ່ອງທ່ຽວ ທັງສອງປະເທດໃຫ້ຫລາຍຂຶ້ນ ໂດຍສະເພາະປີ 2018 ສປປ ລາວ ໄດ້ເປີດປີທ່ອງທ່ຽວລາວ ຈຶ່ງເຊີນຊວນໃຫ້ແຂວງຫູເປີ່ຍ ນຳເອົາສະຖານທີ່ທ່ອງທ່ຽວຂອງລາວໄປຮ່ວມໂຄສະນາ ດຶງດູດເອົານັກທ່ອງທ່ຽວແຂວງຫູເປີຍ ໃຫ້ມາທ່ຽວ ສປປ ລາວ ແລະ ສປປ ລາວ ໄດ້ນຳເອົາ ຂໍ້ມູນດ້ານການ ທ່ອງທ່ຽວຂອງແຂວງຫູເປີ່ຍ ໂຄສະນາໃຫ້ກັບນັກທ່ອງທ່ຽວລາວ ໄດ້ຮັບຮູ້ເພື່ອຮ່ວມກັນແລກປ່ຽນການທ່ອງທ່ຽວ.
