ພິທີເປີດປີທ່ອງທ່ຽວລາວ 2018 ຂອງແຂວງວຽງຈັນ ແລະ ງານບຸນກິນຈຽງເຜົ່າມົ່ງ ຫລັກ 52 ໄດ້ຈັດຂຶ້ນຢູ່ທີ່ ເດີ່ນໂຮງຮຽນ ມໍຕົ້ນໂພນຄຳ, ເມືອງໂພນໂຮງ, ແຂວງວຽງຈັນ ໃນຕອນເຊົ້າວັນທີ 20 ທັນວາ 2017 ນີ້ ເຂົ້າຮ່ວມໃນພິທີມີ ທ່ານ ອຸ່ນທວງ ຂາວພັນ, ຮອງລັດຖະມົນຕີ ກະຊວງຖະແຫ່ລງຂ່າວ-ວັດທະນະທຳ ແລະ ທ່ອງທ່ຽວ ມີທ່ານຮອງເຈົ້າແຂວງໆວຽງຈັນ ມີບັນດາການນຳຂັ້ນແຂວງຂັ້ນເມືອງ, ພະແນກການກ່ຽວຂ້ອງ ພ້ອມດ້ວຍພໍ່ແມ່ປະຊາຊົນ ກຸ່ມບ້ານທົ່ວເມືອງໂພນໂຮງ ແລະ ເມືອງໃກ້ຄຽງເຂົ້າຮ່ວມຢ່າງຫລວງຫລາຍ,
ສຳລັບ ພິທີເປີດປີທ່ອງທ່ຽວລາວ 2018 ຂອງແຂວງວຽງຈັນ ແລະ ງານບຸນກິນຈຽງເຜົ່າມົ້ງ ຫລັກ52 ປີນີ້ ໄດ້ມີຫລາກຫລາຍກິດຈະກຳ ເຊັ່ນ: ກິດຈະກຳງົວຊົນງົວ ຟ້ອນລາຍງ້າວ ການເດີນແບບຂອງນ້ອງນັກຮຽນ ການສະແດງສິນລະປະວັນນະຄະດີ, ຍິງຫນ້າເກັກ, ການສະແດງເດີນແບບຊຸດຊົນເຜົ່າ ແລະ ກິດຈະກຳອື່ນໆຕື່ມອີກໃນນີ້ ຍັງມີການວາງສະແດງສິນຄ້າໂອດັອບ ແລະ ສິນຄ້າທົ່ວໄປຢ່າງຫລວງຫລາຍ ງານບຸນກິນຈຽງປີນີ້ແມ່ນຈະໄດ້ດຳເນີນໄປເຖີງວັນທີ 24 ທັນວາ 2017 ຈຶ່ງສຳເລັດ ຫາກທ່ານຜູ້ຊົມທ່ານໃດຫາມີເວລາ ກໍ່ສາມາດແວະເດີນທາງໄປທ່ຽວຊົມງານດັ່ງກ່າວໄດ້.
ພ້ອມດຽວກັນນີ້ ເພື່ອເປັນການສະເຫຼີມສະຫຼອງປີທ່ອງທ່ຽວລາວ 2018 ທາງແຂວງວຽງຈັນ ກໍ່ໄດ້ກຽມຄວາມພ້ອມໃນການຈັດກິດຈະກຳຕ່າງໆ ໃນແຕ່ລະເມືອງ ເພື່ອເປັນການດຶງດູດຄວາມສົນໃຈໃຫ້ກັບນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ອງທ່ຽວພາຍໃນແຂວງໃຫ້ຫຼາຍຂຶ້ນ.
ສໍາລັບ ກິດຈະກໍາທີ່ຈະຈັດຂຶ້ນໃນປີ 2018 ທີ່ແຂວງວຽງຈັນ ມີດັ່ງນີ້:
+ ເມືອງວຽງຄຳ
– ບຸນບັ້ງໄຟ ຫຼື ບຸນກຸດສົງການ ( ປີໃໝ່ລາວ ), ບ້ານໂພນໝີ ຈັດຂຶ້ນໃນລະຫວ່າງວັນທີ 12 – 16 ເມສາ .
– ບຸນແຫ່ດອກໄມ້ສົດ ບ້ານໂນນສະຫວ່າງ ຈັດຂຶ້ນໃນມື້ຂຶ້ນ 15 ຄ່ຳເດືອນສິງຫາ.
+ ເມືອງໂພນໂຮງ
– ບຸນພະທາດດອນແກ້ວ ບ້ານນາເຫຼົ່າ ຈັດຂຶ້ນໃນມື້ຂຶ້ນ 15 ຄ່ຳ ເດືອນມີນາ.
– ບຸນກິນຈຽງເຜົ່າມົ້ງຫຼັກ 52 ຈັດຂຶ້ນໃນລະຫວ່າງເດືອນທັນວາ.
+ ເມືອງແກ້ວອຸດົມ
– ບຸນແຫ່ປະສາດເງິນ ບ້ານພູເຂົາຄຳ ຈັດຂຶ້ນໃນມື້ຂຶ້ນ 15 ຄ່ຳ ເດືອນກຸມພາ.
– ບຸນມະຫາຊາດ ບ້ານແກ້ວກູ່ ຈັດຂຶ້ນໃນເດືອນມີນາ.
+ ເມືອງທຸລະຄົມ
– ບຸນພະທອງສາມສີ ແມ່ນຈະຈັດຂຶ້ນເປັນບຸນມະຫາຊາດ ເປັນບຸນປະຈຳປີ ເຊິ່ງຈະຈັດຂຶ້ນໃນເດືອນມີນາ.
– ບຸນບັ້ງໄຟ ບ້ານນາແພງ ຈັດຂຶ້ນໃນມື້ຂຶ້ນ 15 ຄ່ຳ ເດືອນມິຖຸນາ.
– ບຸນພະທາດມາຫຼ້າ ບ້ານນາຄອງ ຈັດຂຶ້ນໃນມື້ຂຶ້ນ 15 ຄ່ຳ ເດືອນມີນາ.
+ ເມືອງຫີນເຫີບ
– ບຸນເກຼີ ບ້ານດອນແກ້ວ ຈັດຂຶ້ນໃນລະຫວ່າງເດືອນທັນວາ ຫາກາງເດືອນມັງກອນ.
– ບຸນຊ່ວງເຮືອຫີນເຫີບ ຈັດຂຶ້ນໃນເດືອນຕຸລາ.
+ ເມືອງເຟືອງ
– ບຸນຖວາຍຜ້າທໍ່ໜໍ່ຄຳ ສາມໝື່ນເມືອງເຟືອງ ຈັດຂຶ້ນໃນລະຫວ່າງ ມື້ຂຶ້ນ 11 – 12 ຄ່ຳ ເດືອນພຶດສະພາ.
– ບຸນບັ້ງໄຟ ບ້ານນາໂນນຫີນແຮ່ ຈັດຂຶ້ນໃນເດືອນ 6 ເພັງ.
– ບຸນເກຼີ ບ້ານໂພນສະອາດ ຈັດຂຶ້ນໃນທ້າຍເດືອນທັນວາ ຫາກາງເດືອນມັງກອນ.
+ ເມືອງໝື່ນ
– ບຸນປະເພນີເຜົ່າອີມ່ຽນ ບ້ານນ້ຳຮ້ອນ ຈັດຂຶ້ນໃນລະຫວ່າງເດືອນມັງກອນ ຫາ ເດືອນກຸມພາ.
– ບຸນກິນຈຽງຂອງ 4 ບ້ານ ເທສະບານເມືອງໝື່ນ ຈັດຂຶ້ນໃນທ້າຍເດືອນທັນວາ ຫາ ກາງເດືອນມັງກອນ.
+ ເມືອງຊະນະຄາມ
– ບຸນມະຫາຊາດວັດໃຫຍ່ຜາຫົດ ບ້ານຊະນະຄາມ ຈັດຂຶ້ນໃນເດືອນມີນາ.
– ບຸນຊ່ວງເຮືອ ບ້ານຊະນະຄາມ ຈັດຂຶ້ນໃນລະຫວ່າງວັນທີ 5 – 7 ຕຸລາ.
– ບຸນບັ້ງໄຟ ເມືອງຊະນະຄາມ ຈັດຂຶ້ນໃນວັນທີ 16 ພຶດສະພາ.
+ ເມືອງວັງວຽງ
– ພິທີແຫ່ນາງສັງຂານ ບ້ານວັງວຽງ ຈັດຂຶ້ນໃນລະຫວ່າງວັນທີ 10 – 12 ເມສາ.
– ເພີດເພີນກັບການທ່ຽວຊົມຖ້ຳຕ່າງໆ, ທ່ຽວຊົມທຳມະຊາດຕາມລຳນ້ຳຊອງ ແລະ ບັນດາກິດຈະກຳທ່ອງທ່ຽວຕ່າງໆ.
– ເທດສະການໝາກກ້ຽງຫວານ ຈັດຂຶ້ນໃນທ້າຍເດືອນທັນວາ.
+ ເມືອງກາສີ
– ບຸນບັ້ງໄຟ ບ້ານນາມົນໃໝ່ ຈັດຂຶ້ນໃນມື້ຂຶ້ນ 15 ຄ່ຳ ເດືອນກໍລະກົດ.
– ບຸນຊ່ວງເຮືອ ບ້ານຈຽງ ຈັດຂຶ້ນໃນກາງເດືອນຕຸລາ.
– ບຸນເກຼີ ບ້ານວຽງສະໄໝ ບ້ານໂພນງາມ ແລະ ບ້ານຜາເຈົ້າ ຈັດຂຶ້ນໃນທ້າຍເດືອນທັນວາ ຫາ ກາງເດືອນມັງກອນ.
+ ເມືອງແມດ
– ບຸນຊ່ວງເຮືອນ້ຳແມດ ບ້ານນ້ຳແມດ ຈັດຂຶ້ນໃນມື້ຂຶ້ນ 8 ຄ່ຳເດືອນພະຈິກ.
– ບຸນມະຫາຊາດ ບ້ານນາໂພ ຈັດຂຶ້ນໃນເດືອນ 3 ອອກໃໝ່ 7 ຄ່ໍາ.
– ບຸນບັ້ງໄຟຫົວເມືອງ ຈັດຂຶ້ນໃນເດືອນ 6 ອອກໃໝ່ 6 ຄ່ຳ.
ນອກຈາກນັ້ນ, ກໍ່ຍັງມີບັນດາກິດຈະກຳປິ່ນອ້ອມອີກຫຼາຍຢ່າງທີ່ເພິ່ນຈະຈັດຂຶ້ນ.

Editor: ຕະວັນ ແສງສະຫວັນ