ທ່ານ ນາງ ອິນຄຳ ພັນດາລາ, ເຈົ້າເມືອງໂພນໂຮງ ກ່າວວ່າ: ວຽກງານທ່ອງທ່ຽວເປັນຂະແໜງການໜຶ່ງ ທີ່ສ້າງລາຍຮັບໃຫ້ສັງຄົມໄດ້ດີສົມຄວນ, ເວົ້າສະເພາະ ປີ 2015 ມີນັກທ່ອງທ່ຽວເຂົ້າມາທ່ຽວແຂວງວຽງຈັນ 5 ແສນກວ່າຄົນ ສາມາດສ້າງລາຍຮັບໄດ້ 190 ຕື້ກວ່າກີບ.
ພາຍຫລັງເປີດປີທ່ອງທ່ຽວ ຄາດວ່າຈະມີນັກທ່ອງທ່ຽວເຂົ້າມາທ່ຽວແຂວງວຽງຈັນ ປະມານ 8 ແສນຄົນ ຈະສ້າງລາຍຮັບໄດ້ປະມານ 246 ຕື້ກີບ. ພ້ອມນີ້, ຍັງໄດ້ກຽມກົນໄກໃນການຊຸກຍູ້ໃຫ້ວຽກງານທ່ອງທ່ຽວມີຜົນສຳເລັດ ຄື: ຊຸກຍູ້ການຈັດຕັ້ງປະຕິບັດນິຕິກຳ ກ່ຽວກັບວຽກທ່ອງທ່ຽວໃຫ້ຖືກຈັດຕັ້ງປະຕິບັດ, ສຸມໃສ່ພັດທະນາສິ່ງອຳນວຍຄວາມສະດວກຕ່າງໆ ເພື່ອຮອງຮັບນັກທ່ອງທ່ຽວໃຫ້ໄດ້ ປະມານ 8 ແສນຄົນ ໃນປີ 2018, ສ້າງຈິດສຳນຶກໃຫ້ແກ່ສັງຄົມໃຫ້ເຫັນໄດ້ຄວາມສຳຄັນຂອງວຽກງານທ່ອງທ່ຽວ ສົ່ງເສີມທຸລະກິດຂະໜາດນ້ອຍ ແລະ ຂະໜາດກາງດ້ານທ່ອງທ່ຽວ ໃຫ້ມີຄຸນນະພາບ ແລະ ອື່ນໆ.
ສຳລັບ ກິດຈະກຳປີທ່ອງທ່ຽວ 2018 ແຂວງວຽງຈັນ ມີ ບຸນແຫ່ຜາສາດເງິນ, ເມືອງແກ້ວອຸດົມ, ບຸນພະທາດດອນແກ້ວ, ບຸນກິນຈຽງເຜົ່າມົ້ງຫລັກ 52 ເມືອງໂພນໂຮງ, ບຸນພະເຫວດ ພະທອງສາມສີເມືອງທຸລະຄົມ, ບຸນປີໃໜ່ລາວ (ກຸດສົງການ) ແຫ່ນາງສັງຂານ ເມືອງວັງວຽງ, ບຸນບັ້ງໄຟ ບ້ານໂພນໜີ, ບ້ານປາກກະຍຸງ, ບຸນດອກໄມ້ສົດ ບ້ານໂນນສະຫວ່າງ ເມືອງວຽງຄຳ, ບຸນຖວາຍຜາທໍ່ໜໍ່ຄຳ ເມືອງເຟືອງ, ບຸນເຜົ່າອິມ່ຽນ ບ້ານນ້ຳຮອນ, ບຸນກະເກຼິ ບ້ານນ້ຳເພີນ, ເມືອງໝື່ນ , ບຸນພະເຫວດ ວັດໃຫຍ່ຜາຫົດ, ເມືອງຊະນະຄາມ, ບຸນບັ້ງໄຟ ບ້ານນາມົນ, ເມືອງກາສີ, ບຸນຊ່ວງເຮືອເມືອງແມດ ແລະ ບຸນ ອື່ນໆຕື່ມອີກ.
Editor: ຕະວັນ ແສງສະຫວັນ
