ຖ້ຳນອນ ສະຖານທີ່ທ່ອງທ່ຽວທຳມະຊາດ ທີ່ສຳຄັນອີກແຫ່ງຫນື່ງຂອງ ເມືອງວັງວຽງ ເຊິ່ງມີທີ່ຕັ້ງຫ່າງຈາກຕົວເມືອງພຽງ 2 ກິໂລແມັດໄປທາງທິດເຫນືອ, ທີ່ໄດ້ຮັບການບູລະນະໃຫມ່ຈາກບໍລິສັດ ທ່ອງທ່ຽວວັນເດີຟູນລາວ ຈຳກັດ ໃນປີ 2015 ເປັນຕົ້ນມາ, ເຊິ່ງຖ້ຳນອນ ເປັນອີກຖ້ຳຫນື່ງທີ່ໄດ້ຮັບຄວາມນິຍົມຫລາຍຈາກນັກທ່ອງທ່ຽວ ປັດຈຸບັນ ຖ້ຳນອນ ໄດ້ຮັບການບູລະນະໃຫມ່ ແລະ ມີຫລາຍກິດຈະກຳທີ່ເປີດໃຫ້ບໍລິການຢູ່ຖ້ຳນອນ ເປັນຕົ້ນ ການຂີ່ສະລິງ ທີ່ມີຄວາມຍາວເຖິງ 2.000 ແມັດ, ການບໍລິການຢ່າງເລາະຖ້ຳ ເຊິ່ງຈະມີປະຊາຊົນເປັນຜູ້ນຳທາງ, ຍ່າງທ່ຽວຊົມທຳມະຊາດຢູ່ຖ້ຳນອນ, ບໍລິການຂີ່ເຮືອກາຍັກລອງແມ່ນ້ຳຊ່ອງ. ສ່ວນການບໍລິການທີ່ພັກ ແລະ ຮ້ານອາຫານຕາມສັ່ງ ເຊິ່ງຈະເປີດໃຫ້ບໍລິການໃນທ້າຍເດືອນ ທັນວາ 2017 ນີ້.
ທ່ານ ບຸນພັນ ວົງສຳພັນ ຫົວຫນ້າບໍລິສັດ ທ່ອງທ່ຽວວັນເດີຟູນລາວ ຈຳກັດ ໄດ້ໃຫ້ສຳພາດຕໍ່ ວ່າ: ຮອດປີ 2015 ຂ້າພະເຈົ້າກໍໄດ້ສ້າງສະລິງຂື້ນ ເພື່ອໃຫ້ບໍລິການແກ່ນັກທ່ອງທ່ຽວທີ່ມາທ່ຽວຢູ່ຖ້ໍານອນແຫ່ງນີ້, ນອກຈາກນີ້ ຂ້າພະເຈົ້າ ກໍຍັງໄດ້ສ້າງທີ່ພັກແຮມ ແລະ ຮ້ານອາຫານ ໄວ້ຄ່ອຍບໍລິການແກ່ນັກທ່ອງທ່ຽວ ເຊິ່ງຄາດວ່າຈະເປີດໃຫ້ບໍລິການໃນທ້າຍເດືອນ ທັນວາ ນີ້ ແລະ ສາມາດຮ້ອງຮັບນັກທ່ອງທ່ຽວໄດ້ເຖິງ 200-300 ຄົນ.
ສຳລັບ ການບໍລິການສ່ວນຫລາຍແມ່ນໃຫ້ບໍລິຫານແບບແອັກເລນເຈີ ເປັນຕົ້ນກໍແມ່ນ: ການບໍລິການຂີ່ສະລິງຊົມທຳມະຊາດ ຢູ່ຖ້ຳນອນ ທີ່ມີຄວາມຍາວ 2.000 ແມັດ ລາຄາບໍລິການ 100.000 ກີບສະເພາະຄົນລາວ, ບໍລິການຂີ່ເຮືອກາຍັກລອງແມ່ນ້ຳຊ່ອງ ຄາບໍລິການຫນຶ່ງມື 80,000 ພ້ອມອາຫານສວຍ ສະເພາະຄົນລາວ, ບໍລິການຮ້ານອາຫານ, ບໍລິການປີ້ນຜາ, ບໍລິການຍ່າງປ່າເພື່ອຊົມທໍາມະຊາດ ແລະ ບໍລິການຂີ່ລົດຖີບ. ທຸກການບໍລິການຂອງພວກເຮົາແມ່ນມີໄກນຳທ່ຽວເປັນຜູ້ນຳພາໄປ, ພ້ອມທັງ ອຸປະກ່ອນຮັກສາຄວາມປອດໄພໃນແຕ່ລະກິດຈະກໍາ ທັງນີ້ກໍເພື່ອຮັບປະກັນຄວາມປອດໄພໃຫ້ແກ່ນັກທ່ອງທ່ຽວ ເຊິ່ງຈະບໍ່ປ່ອຍໃຫ້ນັກທ່ອງທ່ຽວໄປເອງໂດຍເດັດຂາດ, ສຳລັບ ການບໍລິການຂີ່ສະລິງນີ້ ພວກເຮົາແມ່ນໃຊ້ສາຍລວດ 2 ເສັ້ນ ທັງນີ້ກໍ່ເພື່ອຮັບປະກັນໃຫ້ແກ່ນັກທ່ອງທ່ຽວ, ນອກຈາກນີ້ພວກເຮົາຍັງມີພະນັກງານຊ່ວຍເບກໃຫ້ເວລາໄປເຖິງຈຸດພັກ ເພື່ອຮັບຮອງຄວາມປອດໄພ 100% ໃຫ້ແກ່ນັກທ່ອງທ່ຽວທີ່ມາຂີ່ສະລິງ.
Editor: ຕະວັນ ແສງສະຫວັນ
