ເມືອງໂພນທອງ, ແຂວງ ຫຼວງພະບາງ ໄດ້ຈັດງານບຸນກິນຈຽງ (ນໍເປເຈົາ) ຂອງປະຊາຊົນເຜົ່າມົ້ງ ຂຶ້ນທີ່ ບ້ານຫ້ວຍແອນ ກຸ່ມທອງສີ ໂດຍມີ ທ່ານ ສົມມາລີ ຄໍາເກັ່ງ ເຈົ້າເມືອງໂພນທອງ, ມີຫົວໜ້າ-ຮອງຫົວໜ້າຫ້ອງການ, ແຂກຮັບເຊີນ, ຕະຫຼອດຮອດອົງການປົກຄອງ ແລະ ປະຊາຊົນ ເຂົ້າຮ່ວມ.
ທ່ານ ສຸກສະຫວັນ ແກ້ວມະນີ ຫົວໜ້າຫ້ອງການຖະແຫຼງຂ່າວ ວັດທະນະທໍາ ແລະ ທ່ອງທ່ຽວເມືອງ ເລຂາຄະນະພັກຮາກຖານກຸ່ມທອງສີ ໄດ້ຜ່ານບົດສະຫຼຸບປະຈຳປີກ່າວເປີດງານ ແລະ ເລົ່າປະຫວັດຄວາມເປັນມາຂອງງານ ບຸນກິນຈຽງ ຂອງເຜົ່າມົ້ງ ວ່າ: ຊົນເຜົ່າມົ້ງເປັນ ຊົນເຜົ່າ ໜຶ່ງໃນ 49 ຊົນເຜົ່າໃນວົງຄະນາຍາດແຫ່ງຊາດລາວຈັດຢູ່ໃນ ໝວດພາສາມົ້ງ-ອີວມຽນ ມີປະຫວັດຄວາມເປັນມາອັນຍາວນານ ຄ້າຍຄືກັບຊົນເຜົ່າອື່ນໆ, ຊົນເຜົ່າມົ້ງມີພາສາຂຽນເປັນເອກະລັກຂອງຕົນເອງ ສ່ວນພາສາປາກເວົ້າມີຄວາມແຕກຕ່າງກັນເລັກໜ້ອຍແຕ່ສາມາດເຂົ້າໃຈຊຶ່ງກັນ ແລະ ກັນ ມີເອກະລັກທາງດ້ານ ຮີດຄອງ ປະເພນີຄວາມເຊື່ອຖື ວັດທະນະທຳ ຂອງຕົນເອງໄວ້ໃຫ້ ຮຸ່ນລູກ-ຮຸ່ນຫຼານ ຈົນເຖິງທຸກວັນນີ້.
ງານບຸນກິນຈຽງຂອງຊົນ ເຜົ່າມົ້ງຄັ້ງນີ້ ເພື່ອເປັນການ ສະເຫຼີມ ສະຫຼອງຜົນງານການຜະລິດໃນຮອບ 1 ປີ ທັງເປັນການ ຟື້ນຟູເຜີຍແຜ່ຮີດຄອງປະເພນີ ແລະ ວັດທະນະທຳອັນດີງາມຂອງຕົນ ເປັນການສົມມາຄາລະວະຕໍ່ຜູ້ອາວຸໂສ, ຜູ້ເປັນພໍ່ເປັນແມ່ ແລະ ຜູ້ນຳພາໃນຕະກຸນ ເປັນໂອກາດເຕົ້າ ໂຮມພໍ່ແມ່ ຍາດຕິພີ່ນ້ອງທັງໃກ້ ແລະ ໃກ ເພື່ອຢ້ຽມຢາມ ພົບປະສ້າງສັນຄວາມສາມັກຄີ ແລະ ຮູ້ບຸນຄຸນຊຶ່ງກັນ ແລະ ກັນ, ພາຍໃນງານໄດ້ມີການ ແຂ່ງຂັນກິລາ ຍິ່ງໜ້າເກັກ, ກິລາໝາກຄ່າງ, ກິລາແຂ່ງລົດສາມລໍ້ໄມ້ ລະຫວ່າງບ້ານຕໍ່ບ້ານ, ໂຍນໝາກຄອນ ແລະ ຊົມສິລະປະຂອງຊົນເຜົ່າມົ້ງຢ່າງມ່ວນຊື່ນ.
Editor: ດາວໄຊ ສີວິໄລ
