ຫລາຍຄົນທີ່ໄປທ່ອງທ່ຽວເມືອງວັງວຽງ ແຂວງວຽງຈັນ, ຄົງຈະບໍ່ມີໃຜທີ່ບໍ່ຮູ້ຈັກ ຮ້ານອາຫານ ແສງເພັດ ຖ້ຳລົມ ເຊິ່ງເປັນຮ້ານອາຫານຕາມສັ່ງ ແລະ ບໍລິການເຄື່ອງດື່ມທຸກຊະນິດ, ພ້ອມທັງ ມີສະຖານທີ່ພັກຜ່ອນແຄມນ້ຳຊ່ອງ, ສິ່ງສຳຄັນອາຫານແຊບ ແລະ ມີຄວາມສົດໃໝ່ທຸກມື້.
ທ່ານ ແສງເພັດ ຄຳກອງ, ເຈົ້າຂອງຮ້ານອາຫານ ແສງເພັດຖ້ໍ້າລົມ ບອກກັບນັກຂ່າວພວກເຮົາວ່າ: ຖ້າທ່ຽບໃສ່ໃນເມື່ອກ່ອນກັບປັດຈຸບັນ ຖືວ່າລູກຄ້າເພີ່ມຂຶ້ນຫລາຍ ແລະ ທາງຮ້ານຂອງພວກເຮົາ ກໍໄດ້ເພີ່ມບ່ອນນັ່ງຈາກ 10 ຕູບ ມາເປັນ 20 ຕູບ ແລະ ໄດ້ເພີ່ມບ່ອນນັ່ງຢູ່ແຄມນ້ຳຊ່ອງຕື່ມອີກ 30 ບ່ອນນັ່ງ ເພື່ອຮອງຮັບນັກທ່ອງທ່ຽວ ແຕ່ຖ້າມີງານ ຫລື ເທດສະການ ກໍຖືວ່າຍັງບໍ່ພຽງພໍຕໍ່ລູກຄ້າ ກໍ່ຄືນັກທ່ອງທ່ຽວທີ່ເຂົ້າມາໃຊ້ບໍລິການ.
ໃນປີ 2018 ເຊິ່ງເປັນປີທ່ອງທ່ຽວລາວ ກໍຈະໄດ້ເພີ່ມຕູບ ແລະ ບ່ອນນັ່ງຕື່ມອີກ ເພື່ອໃຫ້ພຽງພໍຕໍ່ນັກທ່ອງທ່ຽວທີ່ມາໃຊ້ບໍລິການ. ສຳລັບ ນັກທ່ອງທ່ຽວທີ່ເຂົ້າມາໃຊ້ບໍລິການ ສ່ວນຫລາຍກໍແມ່ນນັກທ່ອງທ່ຽວພາຍໃນ ທີ່ໄດ້ເດີນທາງມາພັກຜ່ອນ ແລະ ທ່ຽວຊົມຢູ່ເມືອງວັງວຽງ, ຮອງລົງມາກໍແມ່ນ ສ. ເກົາຫລີ ແລະ ປະເທດຕ່າງໆຈາກອາຊີ ແລະ ເອີຣົບ, ສ່ວນອາຫານທີ່ໄດ້ຮັບຄວາມນິຍົມຈາກນັກທ່ອງທ່ຽວ ກໍມີປີ້ງໄກ່ລາດທານ້ຳປາແດກ, ຕົ້ມໄກ່ລາດ, ແກງໜໍ່ໄມ້, ພັນປາ, ຕ່ຳໝາກຮຸ່ງ ແລະ ອາຫານຕາມສັ່ງ.
ທ່ານ ແສງເພັດ ຍັງໃຫ້ຮູ້ຕື່ມວ່າ: ວັດຖຸດິບທີ່ນຳມາປຸງແຕ່ງ ເພື່ອບໍລິການໃຫ້ແກ່ນັກທ່ອງທ່ຽວ ແມ່ນມີຄວາມສົດໃໝ່ທຸກມື້ ບໍ່ວ່າຈະເປັນໄກ່ລາດທີ່ລ້ຽງເອງ ເມື່ອມີລູກຄ້າສັ່ງຈຶ່ງໄດ້ທຳການປຸງແຕ່ງ ແລະ ປີ້ງໃຫ້ຮ້ອນໆ. ສະນັ້ນ, ເວລາລູກຄ້າທີ່ສັ່ງອາຫານຈາກທາງຮ້ານຕ້ອງໄດ້ລໍຖ້າແດ່ ເພາະຕ້ອງໄດ້ໃຊ້ເວລາ ໃນການປຸງແຕ່ງ, ທັງນີ້ ກໍເພື່ອເຮັດໃຫ້ອາຫານແຊບ ແລະ ຖືກໃຈກັບລູກຄ້າທີ່ມາໃຊ້ບໍລິການ. ຖ້າຫາກທ່ານໃດ ທີ່ໄດ້ເດີນທາງມາທ່ອງທ່ຽວທີ່ເມືອງວັງວຽງ ແລ້ວຢາກມານັ່ງກິນເຂົ້າພັກຜ່ອນແຄມນ້ຳຊ່ອງ ຢູ່ທີ່ໜ້າຖ້ຳລົມ ຮ້ານອາຫານແສງເພັດ ຍີນດີໃຫ້ບໍລິການ.

Editor: ຕະວັນ ແສງສະຫວັນ