ພິທີນັບຖອຍຫຼັງສົ່ງທ້າຍປີເກົ່າ 2017 ແລະ ຕ້ອນຮັບປີໃໝ່ສາກົນ 2018 ທີ່ນະຄອນຫຼວງວຽງຈັນ, ພ້ອມທັງປະກາດເປີດປີທ່ອງທ່ຽວລາວ 2018 ຢ່າງເປັນທາງການ ໄດ້ຈັດຂຶ້ນໃນຕອນຄໍ່າວັນທີ 31 ທັນວາ 2017 ນີ້, ຢູ່ແຄມຂອງທ່າວັດຈັນ ນະຄອນຫຼວງວຽງຈັນ ໂດຍການເປັນປະທານຂອງ ທ່ານ ປະລິນຍາເອກ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ, ເປັນກຽດເຂົ້າຮ່່ວມຂອງ ທ່ານ ສະຫວັນຄອນ ຣາຊມົນຕີ ຮອງລັດຖະມົນຕີ ກະຊວງ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວລາວ ມີບັນດາຮອງເຈົ້າຄອງ, ພ້ອມດ້ວຍທູຕານຸທູດ, ອົງການຈັດຕັ້ງສາກົນປະຈໍາລາວ, ແຂກທີ່ເຊີນ, ພາກສ່ວນກ່ຽວຂ້ອງ ແລະ ມວນຊົນຊາວນະຄອນຫຼວງວຽງຈັນເຂົ້າຮ່ວມສະຫຼອງຢ່າງຄຶກຄື້ນ.
ກ່ອນເລີ່ມພິທີນັບຖອຍຫລັງ ໃນຕອນຄໍ່າ ຄະນະນໍານະຄອນຫລວງວຽງຈັນ, ພ້ອມດ້ວຍແຂກທຸຕານຸທູດ ໄດ້ຈັດກິດຈະກໍາ ຂີ່ລົດໄຟຟ້າ ເລາະຢ້ຽມຊົມ ທັດສະນິຍະພາບ ຂອງຕົວເມືອງນະຄອນວຽງຈັນ ໂດຍມີຈຸດເລີ່ມຕົ້ນທີ່ບໍລິເວນແຄມຂອງ ສວນເຈົ້າອານຸວົງ, ແລ່ນຜ່ານມາທາງຫໍຄໍາ, ຜ່ານປະຕູໄຊ ແລະ ເຂົ້າສູ່ເດີນທາດຫລວງວຽງຈັນ. ພ້ອມກັນນີ້ ທ່ານ ເຈົ້າຄອງນະຄອນຫລວງວຽງຈັນ ຍັງໄດ້ໃຫ້ກຽດເລາະຢ້ຽມຊົມ ຄວາມສວຍງາມຂອງພະທາດຫລວງວຽງຈັນ ເຊີ່ງເປັນພະທາດມີ່ງຂວັນຂອງຊາວລາວ ທັງຊາດ, ທັງເປັນສະຖານທີ່ສັກສິດ ແລະ ເປັນສູນລວມດວງໃຈ ຂອງຄົນລາວ ເຊີ່ງພາຍຫລັງໄດ້ຮັບການປະຕິສັງຂອນຄືນໃຫມ່ ອົງພະທາດ ແມ່ນມີຄວາມສວຍງານໂດດເດັ່ນ ເຫລືອຄໍາບັນລະຍາຍ ສະແດງໃຫ້ເຫັນເຖິງຄວາມຈະເລີນຮຸ່ງເຮືອງທາງດ້ານວັດທະນະທໍາ ແລະ ຄວາມເຂັ້ມແຂງທາງດ້ານຈິດໃຈ, ຄວາມສາມັກຄິ ຮັກແພງ ຂອງຄົນລາວທັງຊາດ. ຫັລງຈາກນັ້ນ ຄະນະໄດ້ເດີນທາງມາຢ້ຽມຢາມ ສວນສະພັງເລນ-ຫນອງພະຍານາກ ພ້ອມທັງຮັບຊີມອາຫານ ລາວ ທີ່ເປັນເອກະລັກ, ພາຍຫລັງສໍາເລັດການຢ້ຽມຢາມສວນສະພັງເລນ ແລ້ວ ຄະນະໄດ້ເດີນທາງມາທີ່ສວນປະຕູໄຊ ເພື່ອຊື່ນຊົມກັບທັດສະນີຍະພາບຄວາມງາມ ໃນຍາມລາຕີ, ເຊີ່ງໄດ້ຖຶກຕົບແຕ່ງຢ່າງສວຍງາມ ດ້ວຍແສງສີໄຟ ເອຍ້ອງ ສວນປະຕູໄຊ ແມ່ນມີຄວາມໂດດເດັ່ນ ແລະ ມີຄວາມສວຍງາມຫລາຍ ຕັ້ງຢູ່ໃຈກາງເມືອງນະຄອນຫລວງວຽງຈັນ ເປັນສັນຍາລັກ ແຫ່ງໄຊຊະນະ ແລະ ກາຍເປັນອະນຸສອນສະຖານ ທີ່ນັກທ່ອງທ່ຽວມາລາວ ຕ້ອງໄດ້ມາຖ່າຍຮູບ ນະສະຖານທີ່ນີ້. ຫລັງຈາກນັ້ນ ຈີ່ງໄດ້ກ່າວເຂົ້າສູ່ພິທີນັບຖອຍຫລັງ ທີ່ແຄມຂອງ ທ່າວັດຈັນ, ໃນພິທີ ແມ່ນປະກອບດ້ວຍກິດຈະກໍາຫລາຍຢ່າງ ລວມທັງການສະແດງສິລະປະວັນນະຄະດີ, ການຮ້ອງເພງ, ການແດນແບບ ຂອງບັນດານາງສາວລາວ ແລະ ນາງສາວ ຈາກເວທີ ຕ່າງໆ, ພ້ອມກັນນັ້ນຍັງມີການສົນທະນະກ່ຽວກັບການພັດທະນາແຫລ່ງທ່ອງທ່ຽວ ໃນນະຄອນຫລວງວຽງຈັນ.
ທ່ານ ສີຫຸນ ສິດທິລືໄຊ ຮອງເຈົ້າຄອງນະຄອນຫຼວງວຽງຈັນ ກ່າວຈຸດປະສົງໃນການຈັດງານ ແລະ ນຳສະເໜີແຜນວຽກຕ່າງໆຂອງນະຄອນຫຼວງວຽງຈັນທີ່ຈະມີຂຶ້ນໃນການຈັັດປີທ່ອງທ່ຽວລາວ 2018 ວ່າ: ເພື່ອສ້າງຂະບວນການໃນການເປັນເຈົ້າພາບທີ່ດີ ແລະ ໂສມໜ້າໃໝ່ໃຫ້ແກ່ຊາວລາວໃນທົ່ວປະເທດໂດຍການສ້າງນະຄອນຫຼວງວຽງຈັນ ໃຫ້ມີສະເໜ່ທາງດ້ານວັດທະນະທໍາ ທໍາມະຊາດ ອາຫານການກິນ ແລະ ມະນຸດສໍາພັນທີ່ດີ.
- ໜຶ່ງ, ຈະຈັດພິທີສະເຫຼີມສະຫຼອງປີທ່ອງທ່ຽວລາວໃນວັນເປີດງານຕະຫຼາດນັດສະແດງສິນຄ້າ ແລະ ຜະລິດຕະພັນທ່ອງທ່ຽວໃນໄລຍະບຸນນະມັດສະການພະທາດຫຼວງປະຈໍາປີ 2018.
- ສອງ, ດ້ານວັດທະນະທໍາການທ່ອງທ່ຽວຈະດໍາເນີນກອງປະຊຸມເຈົ້າ ໜ້າທີ່ອາວຸໂສດ້ານການທ່ອງທ່ຽວ 5 ນະຄອນລຸ່ມແມ່ນ້ຳຂອງ ຄັ້ງທີ 5 ໃນເດືອນພະຈິກ 2018.
- ສາມ, ວຽກງານທ່ອງທ່ຽວວັດທະນະທໍາ ແລະ ປູຊະນິຍະສະຖານສໍາຄັນບູລະນະປະຕິສັງຂອນພະທາດຫຼວງ ແລະ ຈັດສັນຄວາມເປັນລະບຽບຮຽບຮ້ອຍ ສະໜາມຫຼວງວຽງຈັນ ແລະ ອ້ອມຮອບ,ຈັດສັນຄວາມງາມຂອງປະຕູໄຊ, ຈັດສັນການບໍລິການການທ່ອງທ່ຽວພາຍໃນຫໍພິພິສີສະເກດ ແລະຫໍພະແກ້ວ, ວັດຊຽງຄວນ ແລະ ວັດວາອາຮາມຕ່າງໆທີ່ມີຊື່ສຽງໃຫ້ມີມົນຂັງ ແລະ ມີສະເໜ່ຂອງພຸດທະສາດສະໜາ.
- ສີ່, ສ້າງສິ່ງໂຄສະນາອະທິບາຍໃຫ້ມີຄວາມເຂົ້າໃຈໃນຫໍພິພິທະພັນຕ່າງໆ ແລະ ສ້າງສີສັນອານຸສອນສະຖານທີ່ມີຊື່ສຽງໃຫ້ໂດດເດັ່ນ.
- ຫ້າ, ແຫຼ່ງທ່ອງທ່ຽວທໍາມະຊາດຈະຈັດການທ່ອງທ່ຽວເພື່ອສຸຂະພາບ ແລະ ການພັກຜ່ອນ
- ຫົກ, ໂຄສະນາກິດຈະກໍາບຸນປະເພນີທາງສາດສະໜາ ຕາມຮີດສິບ12 ຄອງ 14 ໃນພິທີ ການນໍານະຄອນຫລວງວຽງຈັນ, ຄະນະປະທານ, ທຸຕານຸທູດ ພ້ອມດ້ວຍແຂກ ໄດ້ພ້ອມກັນນັບຖອຍຫລັງ ເຄາດາວ ຕ້ອນຮັບປີໃຫມ່ສາກົນ 2018 ແລະ ຊື່ນຊົມຄວາມງາມຂອງດອກໄມ້ໄຟ
Editor: ກຳປານາດ ລັດຖະເຮົ້າ
