ໃນວັນທີ 31 ທັນວາ 2017 ທີ່ສວນຫຼັກເມືອງ, ແຂວງເຊກອງ ໄດ້ຈັດພິທີເປີດປີທ່ອງທ່ຽວລາວ ແລະ ບຸນປະເພນີເສົາຫຼັກເມືອງ 10 ເຜົ່າຂອງແຂວງດັ່ງກ່າວຂຶ້ນ ໂດຍການໃຫ້ກຽດ ເຂົ້າຮ່ວມເປີດງານຂອງ ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ ທັງເປັນປະທານຊີ້ນໍາຈັດງານປີທ່ອງທ່ຽວລາວ 2018 ລະດັບຊາດ, ເຊິ່ງມີ ທ່ານ ຄໍາເຜີຍ ບຸດດາວຽງ ເຈົ້າແຂວງໆເຊກອງ ພ້ອມດ້ວຍບັນດາເຈົ້າແຂວງ-ຮອງເຈົ້າແຂວງອ້ອມຂ້າງ, ບັນດາຜູ້ຕາງໜ້າຈາກກະຊວງ-ກົມກອງ ທີ່ກ່ຽວຂ້ອງ, ບັນດາຜູ້ແທນຈາກແຂວງແຮກສ່ຽວ ຂອງປະເທດອ້ອມຂ້າງ, ຄະນະພັກ-ຄະນະນຳແຂວງ ແລະ ພໍ່ແມ່ປະຊາຊົນຊາວແຂວງເຊກອງ ເຂົ້າຮ່ວມເປັນຂະບວນຟົດຟື້ນ
ໃນໂອກາດນີ້, ທ່ານ ຖາວອນ ພົມມະໄລລຸນ ຮອງເຈົ້າແຂວງໆເຊກອງ ກໍ່ໄດ້ລາຍງານໃຫ້ຊາບ ກ່ຽວກັບການຫ້າງຫາກະກຽມຄວາມພ້ອມດ້ານຕ່າງໆ ເພື່ອຕ້ອນຮັບປີທ່ອງທ່ຽວລາວ 2018 ແລະ ການຈັດງານບຸນປະເພນີເສົາຫຼັກເມືອງ 10 ເຜົ່າຂອງແຂວງເຊກອງ ເຊິ່ງໄດ້ມີຂະບວນການຕ່າງໆ ເປັນຕົ້ນ ບຸນປະເພນີຊ່ວງເຮືອປະຈຳປີ, ສະເຫຼີມສະຫຼອງວັນຊາດ 2 ທັນວາ ຄົບຮອບ 42 ປີ, ຂະ ບວນການສີລະປະວັນນະຄະດີ, ງານວາງສະແດງສິນຄ້າ, ງານວາງສະແດງທ່າແຮງດ້ານການທ່ອງທ່ຽວ, ວາງສະແດງອາຫານພື້ນເມືອງ, ງານຕະຫຼາດນັດ ແລະ ງານສົ່ງທ້າຍປີເກົ່າ-ຕ້ອນຮັບປີໃໝ່ສາກົນ 2018. ສະເພາະ ປີທ່ອງທ່ຽວລາວ 2018 ທີ່ແຂວງເຊກອງ ໄດ້ສຸມໃສ່ 5 ເນື້ອໃນຂອງການຕ້ອນຮັບປີທ່ອງທ່ຽວນີ້ ກໍ່ຄາດວ່າຈະມີນັກທ່ອງທ່ຽວເຂົ້າມາແຂວງເຊກອງ 50 ພັນກວ່າເທື່ອຄົນ ສ້າງລາຍຮັບກວ່າ 8,5 ລ້ານໂດລາສະຫະລັດ
ໃນພິທີ, ທ່ານ ຄຳເຜີຍ ບຸດດາວຽງ ເຈົ້າແຂວງໆເຊກອງ ກໍ່ໄດ້ກ່າວວ່າ: ການເປີດປີທ່ອງທ່ຽວຄັ້ງນີ້ ແມ່ນຄັ້ງທີ 3 ນັບແຕ່ປີ 1999 ເປັນຕົ້ນມາ ຊຶ່ງລັດຖະບານລາວ ໄດ້ຖືເອົາການເປີດປີທ່ອງທ່ຽວລາວ ເປັນເຫດການທີ່ສຳຄັນ ເພື່ອປະກອບສ່ວນກະຕຸ້ນພື້ນຖານເສດຖະກິດຂອງຊາດ, ຂອງທ້ອງຖິ່ນ ກໍ່ຄືນຳຜົນປະໂຫຍດໂດຍກົງ ມາໃຫ້ປະຊາຊົນ ແລະ ສັງຄົມ. ສະນັ້ນ, ທົ່ວພັກ, ທົ່ວກຳລັງປະກອບອາວຸດ ແລະ ທົ່ວປວງຊົນລາວທັງຊາດ ໄດ້ພ້ອມພຽງຮຽງໜ້າກັນ ຫ້າງຫາກະກຽມເປັນເຈົ້າພາບທີ່ດີ ເພື່ອຕ້ອນຮັບນັກທ່ອງທ່ຽວ ທີ່ມາຈາກທົ່ວທຸກມຸມໂລກ. ຖືເອົາການເປີດປີທ່ອງທ່ຽວລາວ ເວົ້າລວມ, ເວົ້າສະເພາະ ປີທ່ອງທ່ຽວລາວທີ່ແຂວງເຊກອງ ໃນປີນີ້ ເປັນການເປີດກວ້າງການຮ່ວມມື, ການພັດທະນາຮອບດ້ານ ແລະ ການເຊື່ອມໂຍງ ໃນທຸກຂະແໜງການພາຍໃນແຂວງ ເຊກອງ ເພື່ອຂຸດຄົ້ນ ແລະ ພັດທະນາທ່າແຮງບົ່ມຊ້ອນພາຍໃນທ້ອງຖິ່ນ, ດຶງດູດການຮ່ວມມືກັບພາກພື້ນ ແລະ ສາກົນ ໃນການຈັດຕັ້ງປະຕິບັດແຜນພັດທະນາເສດຖະກິດ, ວັດທະນະທຳ-ສັງຄົມຂອງແຂວງ, ພະຍາຍາມ ດຶງດູດນັກທ່ອງທ່ຽວ, ນັກທຸລະກິດ ແລະ ຜູ້ປະກອບການ ໃຫ້ເຂົ້າມາມີສ່ວນຮ່ວມ ໃນການສ້າງສາພັດທະນາ ແລະ ສ້າງລາຍຮັບໃຫ້ທ້ອງຖິ່ນແຂວງເຊກອງ ບັນລຸໄດ້ຕາມລະດັບຄາດໝາຍທີ່ວາງໄວ້.
ໃນວາລະ ໂອກາດທີ່ມີຄວາມສໍາຄັນ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ໄດ້ໃຫ້ກຽດລັ່ນຄ້ອງ 9 ບາດ, ປ່ອຍປ້າຍ ແລະ ຊົມການສະແດງສິລະປະ-ວັນນະຄະດີ ໃນຫລາຍລາຍການສະແດງ. ຢ່າງຈົບງາມ.
ແຫລ່ງຂ່າວຈາກ ສນຍ
Editor: ກຳປານາດ ລັດຖະເຮົ້າ
