ແຂວງບໍ່ແກ້ວ ໄດ້ຖືເອົາວຽກງານການທ່ອງທ່ຽວ ເປັນຈຸດໃຈກາງ ໃນການພັດທະນາເສດຖະກິດ-ສັງຄົມ ເພື່ອສົ່ງເສີມການຜະລິດ ເປັນສິນຄ້າ, ການຂົນສົ່ງ, ການບໍລິການ, ການສ້າງວຽກເຮັດງານທຳ, ການສ້າງລາຍຮັບ ແລະ ປັບປຸງຊີວິດການເປັນຢູ່ ຂອງປະຊາຊົນບັນດາເຜົ່າ ໃຫ້ດີຂື້ນ. ໃນປີ 2018 ປີທ່ອງທ່ຽວລາວ, ແຂວງບໍ່ແກ້ວ ຈະສູ້ຊົນພະຍາຍາມດຶງດູດເອົານັກທ່ອງທ່ຽວ ໃຫ້ມາທ່ຽວຊົມ ແຂວງ ກໍ່ຄື ສປປ ລາວ ໃຫ້ຫລາຍ ເທົ່າທີ່ຈະຫລາຍໄດ້ , ພ້ອມກັນນັນຄະນະນໍາພາຍໃນແຂວງ ຍັງໄດ້ເນັ້ນ ໃຫ້ພາກທຸລະກິດ ປະກອບການ ດ້ານໂຮງແຮມ, ເຮືອນພັກ, ຮ້ານອາຫານ ແລະ ຮ້ານບັນເທິງຕ່າງໆ ເພີ່ມທະວີຄວາມເອົາໃຈໃສ່ເປັນເຈົ້າການ-ການເປັນເຈົ້າພາບທີ່ດີ, ເອົາໃຈໃສ່ໃນການພັດທະນາ ແຫລ່ງທ່ອງທ່ຽວຂອງຕົນ ເພື່ອດຶງດູດໃຫ້ນັກທ່ອງທ່ຽວ ມາທ່ຽວແຂວງບໍ່ແກ້ວ ນັບມື້ນັບຫລາຍຂື້ນ, ອີກດ້ານຫນຶ່ງ ແຂວງບໍ່ແກ້ວ ນັບວ່າເປັນແຂວງທີ່ມີທ່າແຮງ ແລະ ເງື່ອນໄຂຫລາຍດ້ານ, ນັບທັງດ້ານຄົມມະນາຄົມ ຂົນສົ່ງ ທາງບົກ, ທາງນ້ຳ ແລະ ທາງອາກາດ ທີ່ສ້າງສິ່ງເອື້ອອຳນວຍ ຕໍ່ການພົວພັນໄປ-ມາ ລະຫວ່າງ ປະເທດໃກ້ຄຽງ. ເຊັ່ນ: ປະເທດໄທ, ແລະ ປະເທດມຽນມາ. ມີຂົວມິດຕະພາບລາວ-ໄທ ຂ້າມແມ່ນ້ຳຂອງ ລະຫວ່າງ ຫ້ວຍຊາຍ-ຊຽງຂອງ ເຊິ່ງເປັນເສັ້ນທາງຂົນສົ່ງທີ່ສຳຄັນ ລະຫວ່າງປະເທດ ແລະ ໄປຍັງພາກພື້ນ. ນອກຈາກນັ້ນ ທີ່ເມືອງຕົ້ນເຜີ້ງ ຍັງມີມີເຂດເສດຖະກິດພິເສດ 3 ຫລຽມຄຳ ເຊິ່ງເປັນເຂດທີ່ມີການພັດທະນາ ຢ່າງໄວວາ ແລະ ມີການຂະຫຍາຍຕົວທາງດ້ານເສດຖະກິດ ທີ່ສູງ. ດ້ານການທ່ອງທ່ຽວ ແລະ ຊັບພະຍາກອນທ່ອງທ່ຽວ ແຂວງບໍ່ແກ້ວ ຍັງປະກອບດ້ວຍແຫລ່ງທ່ອງທ່ຽວ ຫລາຍບ່ອນທີ່ຫນ້າສົນໃຈ, ທີ່ໄດ້ຮັບການພັດທະນາ ແລະ ກໍາລັງພັດທະນາ ເຊັ່ນ: ດ້ານທຳມະຊາດ, ປະຫວັດສາດ ແລະ ວັດທະນະທຳ -ວັດທະນະທໍາບັນດາເຜົ່າ ທີ່ມີຄວາມເປັນເອກະລັກຫລາຍສີສັນ, ແລະ ເອກະລັກສະເພາະ ແຂວງບໍ່ແກ້ວ ແມ່ນມີຫລາຍເຜົ່າຊົນ ທີ່ອາໃສຢູ່ຮ່ວມກັນ. ດ້ວຍຄວາມປອງດອງສາມັກຄີ ປະກອບສ່ວນໃນການສ້າງສາພັດທະນາ ແລະ ເສີມສ້າງ ວັດທະນະທໍາອັນດີງາມຂອງຊາດ
Editor: ກຳປານາດ ລັດຖະເຮົ້າ
