ປີທ່ອງທ່ຽວລາວ 2018 ຖ້າໃຜຍັງບໍ່ຮູ້ວ່າຈະໄປທ່ຽວສະຖານທີໃດ ຈຶ່ງຈະໄດ້ສຳພັດກັບທຳຊາດ, ອາກາດເຢັນສະບາຍ, ພ້ອມມີສະຖານທີ່ພັກກິນເຂົ້າກັບບັນຍາກາດທີ່ສວຍງາມ ມື້ນີ້ລາຍການເມືອງລາວວັນນີ້ ມີສະຖານທີທ່ອງທ່ຽວ ຖ້ຳຜາບຸ້ນ (ບູລາກູນ 3) ຢູ່ບ້ານນາໄຊ, ຫ່າງຈາກຕົວເມືອງວັງວຽງ ປະມານ 16 ກິໂລແມັດ, ເຊິ່ງເປັນສະຖານທີ່ ທີ່ມີຄວາມສວຍງາມ ແລະ ເປັນທຳມະຊາດທີ່ສຸດ. ປັດຈຸບັນ ໄດ້ເປີດບໍລິການແກ່ນັກທ່ອງທ່ຽວ ແລະ ເປັນທີ່ນິຍົມ ຈາກນັກທ່ອງທ່ຽວທັງພາຍໃນ ແລະ ຕ່າງປະເທດເປັນຢ່າງດີ.
ທ່ານ ອຳພອນ ທຳມະວົງ ເຈົ້າຂອງສະຖານທີທ່ອງທ່ຽວ ຖ້ຳຜາບຸ້ນ ໄດ້ບອກກັບທີມຂ່າວເມືອງລາວວັນນີ້ ເມື່ອບໍ່ນານມານີ້ ວ່າ: ສຳລັບ ສະຖານທີ່ທ່ອງທ່ຽວ ຖ້ຳຜາບຸ້ນ ແຫ່ງນີ້ ຂ້າພະເຈົ້າໄດ້ລົງມືກໍ່ສ້າງ ແລະ ປັບປຸງສະຖານທີ ແຕ່ຕົ້ນປີ 2014, ມາຮອດປີ 2015 ກໍໄດ້ທົດລອງເປີດໃຫ້ບໍລິການແກ່ນັກທ່ອງທ່ຽວ ແລະ ໄດ້ຮັບການຕອບຮັບ ຈາກນັກທ່ອງທ່ຽວທັງພາຍໃນ ແລະ ຕ່າງປະເທດເປັນຢ່າງດີ. ຈາກນັ້ນ, ຈຶ່ງໄດ້ມີການປັບປຸງສະຖານທີ່ຕື່ມອີກ ເພື່ອເຮັດໃຫ້ນັກທ່ອງທ່ຽວໄດ້ມີຫລາຍກິດຈະກຳໃຫ້ເລືອກຫລີ້ນເມື່ອມາທ່ອງທ່ຽວທີ່ ຖ້ຳຜາບຸ້ນ, ເຊິ່ງໄດ້ໃຊ້ງົບປະມານໃນການປັບປຸງ 1 ຕື້ກວ່າກີບຈຶ່ງສຳເລັດ ແລະ ໄດ້ເປີດບໍລິການຢ່າງເປັນທາງການຈົນເຖິງໃນປັດຈຸບັນ.
ສຳລັບ ນັກທ່ອງທ່ຽວ ທີ່ມາທ່ຽວຢູ່ ຖ້ຳຜາບຸ້ນ ແມ່ນເສຍຄ່າຜ່ານປະຕູ 10.000 ກີບຕໍ່ຄົນ, ພ້ອມຮັບ ກົງເບັງ ຟຣີ ເພື່ອໃຊ້ໃນການລອຍນ້ຳ, ຂີ່ເຮືອຟຣີ. ນອກຈາກນີ້, ພວກເຮົາຍັງໄດ້ບໍລິການແກ່ນັກທ່ອງທ່ຽວທີ່ມີຄວາມສົນໃຈຢາກທ່ອງທ່ຽວແບບຕື່ນເຕັ້ນປະຈົນໄພ ເຊັ່ນ: ການຍ່າງປ່າ, ຂີ່ສະລິງຊົມທຳມະຊາດ, ຂຶ້ນພູເຂົາຊົມວິວທຳມະຊາດທີ່ສວຍງາມ, ຂີ່ສະລິງໂດດນ້ໍາໃສໆ ທີ່ໄຫລອອກມາຈາກຖ້ໍ່າ, ພ້ອມມີບໍລິການອາຫານຕາມສັ່ງ ແລະ ອື່ນໆ.
ພ້ອມນີ້, ທ່ານ ອໍາພອນ ທໍາມະວົງ ຍັງຝາກເຖິງບັນດານັກທ່ອງທ່ຽວທັງພາຍໃນ ແລະ ຕ່າງປະ ເທດ ທີ່ກໍາລັງ ຊອກຫາສະຖານທີ່ທ່ອງທ່ຽວແບບທຳມະຊາດ ຂໍເຊີນຊວນໃຫ້ມາລອງສຳພັດກັບຄວາມເປັນທຳມະຊາດຢູ່ ຖ້ຳຜາບຸ້ນ ຍິນດີຕ້ອນຮັບ.
ມີສຽງສຳພາດທ່ານ ອຳພອນ ທຳມະວົງ ເຈົ້າຂອງສະຖານທີທ່ອງທ່ຽວ ຖ້ຳຜາບຸ້ນ ມາໃຫ້ຮັບຊົມ
ປ່ອຍສຽງສໍາພາດ
Editor: ຕະວັນ ແສງສະຫວັນ
