ຖ້ຳອ່າງຫລວງ ຄືອີກຫນຶ່ງຖ້ຳທີ່ນອນຢູ່ໃນເມືອງວັງວຽງ ແຫລ່ງທ່ອງທ່ຽວທຳມະຊາດທີ່ກຳລັງໄດ້ຮັບຄວາມນິຍົມຫລາຍຈາກ ນັກທ່ອງທ່ຽວທັງພາຍໃນ ແລະ ຕ່າງປະເທດ, ຊຶ່ງຕັ້ງຢູ່ບ້ານນາມ່ວງ ຫ່າງຈາກຕົວເມືອງວັງວຽງ 13 ກິໂລແມັດ, ໃຊ້ເວລາເດີນທາງປະມານ 15 ນາທີ ກໍມາເຖິງແຫລ່ງທ່ອງທ່ຽວ, ບໍລິເວນຖ້ຳຈະເຫັນທິວທັດທຳມະຊາດທີ່ສວຍງາມເຮັດໃຫ້ທຸກທ່ານມີຄວາມປະທັບໃຈ ແລະ ນັກທ່ອງທ່ຽວຫລາຍໆຄົນຕ້ອງຖ່າຍຮູບໄວ້ເປັນທີ່ລະນຶກ. ຖ້ຳອ່າງຫລວງ ແຫ່ງນີ້ມີອ່າງລອຍນ້ຳແບບທຳມະຊາດທີ່ສວຍງາມ ແລະ ມີພູເຂົາປ່າໄມ້ອ້ອມຮອບ ຮູ້ສຶກຜ່ອນຄາຍເວລາໄປພັກຜ່ອນ. ນອກຈາກນີ້, ພາຍໃນແຫລ່ງທ່ອງທ່ຽວຍັງມີຫລາຍກິດຈະກຳ ຄ່ອຍບໍລິການແກ່ນັກທ່ອງທ່ຽວ ເຊັ່ນ: ກິດຈະກຳໂດດນ້ຳ, ໂຫນສະລິງໂດດນ້ຳ ແລະ ບໍລິການຂີ່ສະລິງທີ່ມີຄວາມຍາວເຖິງ 800 ແມັດເປັນສະລິງທີ່ມີຍາວທີ່ສຸດໃນເມືອງວັງວຽງເລີຍກໍວ່າໄດ້, ຊຶ່ງຄ່າບໍລິການແມ່ນ 120.000 ກີບເທົ່ານັ້ນ.
ທ່ານ ຫມອກ ຈິດຕະວົງ ຜູ້ສຳປະທານແຫລ່ງທ່ອງທ່ຽວ ຖ້ຳອ່າງຫລວງ ເປີດເຜີຍວ່າ: ສໍາລັບ ການສໍາຫລວດອອກແບບ ແລະ ປັບປຸງສະຖານທີ່ທ່ອງທ່ຽວແຫ່ງນີ້ແມ່ນໃຊ້ເວລາຫນຶ່ງເດືອນ, ຫລັງຈາກນັ້ນ ກໍໄດ້ລົງມືກໍ່ສ້າງໃຊ້ງົບປະມານ 400.000 ໂດລາສະຫະລັດ ເຊິ່ງເປັນງົບຂອງຂ້າພະເຈົ້າເອງ ແລະ ໄດ້ເລີ່ມເປີດມາແຕ່ວັນທີ 13 ເມສາ 2017 ເປັນຕົ້ນມາ ພາຍຫລັງໄດ້ເປີດໃຫ້ບໍລິການກໍຄ່ອຍໆໄດ້ຮັບຄວາມນິຍົມ ແລະ ມາຮອດປັດຈຸບັນແມ່ນມີນັກທ່ອງທ່ຽວ ມາທ່ຽວຫລາຍໃນໄລຍະ ວັນເສົາ-ອາທິດ ແລະ ວັນບຸນເທດສະການຕ່າງໆ, ນັກທ່ອງທ່ຽວທີ່ມາຫລາຍແມ່ນນັກທ່ອງທ່ຽວພາຍໃນ, ຮອງລົງມາກໍແມ່ນຄົນຕ່າງປະເທດ.
ທ່ານ ຫມອກ ຍັງໃຫ້ຮູ້ອີກວ່າ: ສໍາລັບ ຄ່າບໍລິການຜ່ານປະຕູເຂົ້າຊົມສະຖານທີ່ທ່ອງທ່ຽວ ຖ້ໍາອ່າງຫລວງ ແມ່ນ 10.000 ກີບຕໍ່ຄົນ ຊຶ່ງໃນຄາບໍລິການ 10.000 ກີບນີ້ ແມ່ນລວມທັງຄາບໍລິການນັ່ງຕູບຟີ, ລອຍນ້ຳຟີ ແລະ ສະຖານທີ່ຈອດລົດ. ຢູ່ພາຍໃນສະຖານທີ່ທ່ອງທ່ຽວ ກໍຍັງມີຮ້ານອາຫານຕາມສັ່ງໄວ້ຄ່ອຍບໍລິການໃຫ້ແກ່ນັກທ່ອງທ່ຽວ ສ່ວນອາຫານທີ່ນັກທ່ອງທ່ຽວມັກສັ່ງກິນ ກໍຈະເປັນ ປີ້ງປ້າ, ປີ້ງໄກ່, ຕົ້ມໄກ່, ຕ້ຳຫມາກຮຸ່ງ, ແກ້ງຫນໍ່ໄມ້ ແລະ ຍັງມີອາຫານທະເລ ໄວ້ຄ່ອຍບໍລິການຕື່ມອີກ, ສຳລັບ ລາຄາອາຫານ ເລີ່ມຕົ້ນພຽງ 15.000 ກີບເທົ່ານັ້ນ.
Editor: ຕະວັນ ແສງສະຫວັນ
