ເພື່ອກະກຽມຄວາມພ້ອມ ໃນການຈັດງານນະມັດສະການ ຮອຍພະບາດນາດູ່ ແລະ ສະເຫຼີມສະຫຼອງປີທ່ອງທ່ຽວ 2018 ທີ່ຈະໄດ້ຈັດຂຶ້ນໃນລະຫວ່າງວັນທີ 25-31 ມັງກອນ 2018 ທີ່ຈະເຖິງນີ້ ໃຫ້ມີຄວາມສະດວກຄ່ອງແຄວ ແລະ ມີຜົນສໍາເລັດ.
ໃນເມື່ອບໍ່່ດົນນີ້ ທີ່ຫ້ອງປະຊຸມຫ້ອງວ່າການປົກຄອງເມືອງລະຄອນເພັງ ແຂວງສາລະວັນ ໄດ້ຈັດກອງປະຊຸມປຶກສາຫາລື ແລະ ປະກາດແຕ່ງຕັ້ງຄະນະຊີ້ນໍາ ແລະ ກົງຈັກຊ່ວຍວຽກ ໃນການຈັດງານນະມັດສະການຮອຍພະບາດນາດູ່ ແລະ ສະເຫຼີມສະຫຼອງປີທ່ອງທ່ຽວ 2018 ໂດຍການເປັນປະທານຂອງທ່ານ ແກ້ວຜາ ສີລາດວງໃຈ ຮັກສາການເລຂາພັກ-ເຈົ້າເມືອງໆ ລະຄອນເພັງ, ມີຮອງເຈົ້າເມືອງ, ຫົວໜ້າກອງບັນຊາການທະຫານເມືອງ ກໍາມະການພັກເມືອງ, ຫົວໜ້າຫ້ອງການ ແລະ ວິຊາການກ່ຽວຂ້ອງເຂົ້າຮ່ວມ. .
ກອງປະຊຸມໄດ້ ພ້ອມກັນຄົ້ນຄ້ວາ ແລະ ປຶກສາຫາລືໃນບັນຫາຕ່າງໆທີ່ກ່ຽວຂ້ອງ ເພື່ອຄວາມເປັນເອກະພາບ, ສະດວກ-ຄ່ອງແຄວ ໃນການຈັດຕັ້ງປະຕິບັດ ແລະ ຮັບປະກັນໃຫ້ການຈັດງານນະມັດສະການຮອຍພະບາດນາດູ່ ແລະ ສະເຫຼີມສະຫຼອງປີທ່ອງທ່ຽວ 2018 ມີຜົນສໍາເລັດ. ງານນະມັດສະການຮອຍພະບາດນາດູ່ ແມ່ນກິດຈະກໍາທີ່ເປັນປະເພນີສືບທອດຂອງຊາວເມືອງ ລະຄອນເພັງ ເຊິ່ງຈັດຂຶ້ນໃນລະຫວ່າງມື້ອອກໃໝ່ 10 ຄ່ໍາ ຫາ 15 ຄໍ່າ ເດືອນສາມ ຂອງທຸກໆປີ ພາຍໃນງານມີພິທີກໍາທາງພຸດທະສາສາໜາ, ຮ້ານວາງສະແດງຈໍາໜ່າຍສິນຄ້າ ແລະ ມະຫໍລະສົບຄົບງັນອື່ນໆ.
ພິເສດສໍາລັບໃນປີນີ້ ເມືອງລະຄອນເພັງ ໄດ້ກໍານົດເອົາງານນະມັດສະການຮອຍພະບາດນາດູ່ ເປັນການສະເຫຼີມສະຫຼອງ ແລະ ເປີດປີທ່ອງທ່ຽວ 2018 ຢູ່ຂັ້ນເມືອງ ສະນັ້ນ, ພາຍໃນງານປີນີ້ ແມ່ນຈະມີກິດຈະກໍາຕ່າງໆເພີ່ມຂຶ້ນ ແລະ ຟົດຟື້ນກວ່າທຸກໆປີທີ່ຜ່ານມາ ສໍາລັບມື້ເປີດງານງານ ແມ່ນຈະໄດ້ຈັດຂຶ້ນ ໃນວັນທີ 25 ມັງກອນ ທີ່ຈະມາເຖິງນີ້ ແລະ ດໍາເນີນຮອດວັນທີ 31 ມັງກອນ 2018.
Editor: ດາວໄຊ ສີວິໄລ
