ພິທີແຫ່ພະສາດເຜິ້ງ ໃນມື້ຂຶ້ນ 14 ຄໍ່າ ເດືອນ 3 ລາວ ກົງກັບວັນທີ 30 ມັງກອນ 2018, ພິທີຕັກບາດບຸນພະທາດ ສີໂຄດຕະບອງ ໃນມື້ຂຶ້ນ 15 ຄໍ່າ ເດືອນ 3 ລາວ ກົງກັບວັນທີ 31 ມັງກອນ 2018 ແລະ ພິທີແຫ່ທຽນໃນຕອນກາງຄືນ, ແຕ່ລະວັນມີການແຂ່ງຂັນກິລາປະເພດຕ່າງໆ, ການເສັງກອງແຕ້ກອງຈິງ, ຊ່ຽງຊີ ແລະ ໄຫວ້ພະທາດສີໂຄດຕະບອງ.
ທ່ານ ຄຳສີ ອຸດທິວົງ ຮອງເຈົ້າແຂວງໆຄຳມ່ວນ ໄດ້ຖະແຫຼງກ່ຽວກັບການຈັດງານປີທ່ອງທ່ຽວລາວ 2018 ຂອງ ແຂວງຄຳມ່ວນ ເຊິ່ງທ່ານໄດ້ກ່າວໃນບາງຕອນສຳຄັນວ່າ: ການທ່ອງທ່ຽວເປັນຂະແໜງການເສດຖະກິດໜຶ່ງທີ່ມີຫຼາຍປະເທດໄດ້ເອົາໃຈໃສ່ພັດທະນາສົ່ງເສີມການທ່ອງທ່ຽວ ແລະ ຖືເອົາວຽກງານດັ່ງກ່າວເປັນອຸດສາຫະກຳ ແລະ ເປັນຂະແໜງເສດຖະກິດປາຍແຫຼມ ເພື່ອພັດທະນາເສດຖະກິດ-ສັງຄົມ ເຊິ່ງການທ່ອງທ່ຽວໄດ້ນຳເອົາເງິນຕາເຂົ້າມາຊຸກຍູ້ການລົງທຶນທາງທຸລະກິດທີ່ກ່ຽວຂ້ອງ ແລະ ທາງອ້ອມ ໂດຍສະເພາະທຸລະກິດການນຳທ່ຽວ, ທຸລະກິດເຮືອນພັກໂຮງແຮມ, ທຸລະກິດບໍລິການອາຫານ, ທຸລະກິດຂົນສົ່ງ, ຂາຍ ເຄື່ອງທີ່ລະນຶກ ແລະ ອື່ນໆ.
ພ້ອມດຽວກັນນີ້ ກໍ່ເປັນການລົງທຶນໃສ່ໃນການກໍ່ສ້າງພື້ນຖານໂຄງລ່າງ, ສ້າງວຽກເຮັດງານທຳໃຫ້ຊາວບ້ານ ພາໃຫ້ມີການສະສົມເງິນ ແລະ ໝູນວຽນເງິນ, ທັງເປັນການກະຈາຍລາຍໄດ້ສູ່ທ້ອງຖິ່ນຮາກຖານ ເຂດຊົນນະບົດຫ່າງໄກສອກຫລີກ,ໃນຂະນະດຽວກັນນັ້ນ ກໍ່ເຮັດໃຫ້ປະຊາຊົນໃນທຸກສາຂາອາຊີບມີລາຍຮັບລວມ ທັງເບື້ອງລັດກໍ່ມີລາຍໄດ້.
ນອກນັ້ນຍັງມີແຫລ່ງທ່ອງທ່ຽວທີ່ສຳຄັນທາງປະຫວັດສາດ ແລະ ວັດທະນະທຳຫລາຍແຫ່ງ ທີ່ເປັນມົນສະເໜ່ມັດໃຈຜູ້ຄົນທີ່ມາຈາກທົ່ວທຸກສາລະທິດ ໃນນີ້ ມີພະທາດສີໂຄດຕະບອງ ເຊິ່ງເປັນປູຊະນີຍະສະຖານ ແລະ ເປັນສັນຍາລັກຂອງປະຊາຊົນຊາວແຂວງຄຳມ່ວນ, ມີພະທາດຕຸ້ມພະວັງ ຢູ່ບ້ານນາວາງ, ຫໍໄຫວ້ປະທານໂຮຈິມິນ ຢູ່ບ້ານຊຽງຫວາງ ເມືອງໜອງບົກ….
ໂດຍລວມແລ້ວຈາກການສຳຫລວດແຫລ່ງທ່ອງທ່ຽວຢູ່ແຂວງຄຳມ່ວນ ປະຈຸບັນມີທັງໝົດ 198 ແຫ່ງ, ໃນນັ້ນ ມີແຫລ່ງທ່ອງທ່ຽວທາງທຳມະຊາດ 139 ແຫ່ງ, ທາງປະຫວັດສາດມີ 29 ແຫ່ງ ແລະ ທ່ອງທ່ຽວທາງວັດທະນະທຳມີ 30 ແຫ່ງ, ພ້ອມນັ້ນຢູ່ແຂວງຄຳມ່ວນຍັງມີການທ່ອງທ່ຽວຢ້ຽມຊົມວິຖີຊີວິດຂອງປະຊາຊົນ ບັນດາເຜົ່າຢູ່ແຕ່ລະເມືອງນຳອີກ. ດ້ານສິ່ງອຳນວຍຄວາມສະດວກເພື່ອຮອງຮັບນັກທ່ອງທ່ຽວປະກອບມີ: ໂຮງແຮມ 21 ແຫ່ງ, ເຮືອນພັກ 112 ແຫ່ງ, ມີບໍລິສັດນຳທ່ຽວ 5 ແຫ່ງ, ນອກນັ້ນຍັງມີຮ້ານອາຫານ, ຮ້ານກິນດື່ມ ແລະ ຮ້ານບັນເທີງຕ່າງໆ ໄວ້ຄອຍບໍລິການນັກທ່ອງທ່ຽວຢ່າງຄົບຖ້ວນ.
ສະເພາະ ປີທ່ອງທ່ຽວລາວ 2018 ນອກຈາກພິທີເປີດເປັນທາງການໃນງານບຸນນະມັດສະການພະ ທາດສີໂຄດຕະບອງແລ້ວ ໃນຕະຫຼອດປີ 2018 ຍັງຈະມີກິດຈະກຳອື່ນໆອີກຫຼາຍຢ່າງເຊັ່ນ: ບຸນນະມັດສະການພະທາດສີໂຄດຕະບອງ, ບຸນນະມັດສະການພະທາດເມືອງພອນ, ບຸນປີໃໝ່ລາວແຫ່ນາງສັງຂານ, ບຸນອອກພັນສາເມືອງທ່າແຂກ, ບຸນນະມັດສະການພະທາດ ຕຸ້ມພະວັງ, ບຸນສົມໂພດພະທາດວັດປ່າໂສກຄຳແສນ ເມືອງໜອງບົກ, ພິທີຫົດພະອັງແສນ ທີ່ບ້ານສັງ ເມືອງເຊບັ້ງໄຟ, ພະອົງ ແສນ ບ້ານໂພວາ ເມືອງມະຫາໄຊ, ພະອົງແສນ ບ້ານນາຄື ເມືອງຫີນບູນ, ບຸນຫລິ້ນຕົມ ແລະ ບຸນປີໃໝ່ລາວ ບ້ານກອງລໍ ເມືອງຄູນຄຳ ເຊື່ອມໃສ່ກັບການທ່ອງທ່ຽວຖໍ້າກອງລໍ-ນາຕານ, ບຸນຊ່ວງເຮືອບັນດາເມືອງຕ່າງໆເຊັ່ນ: ເມືອງນາກາຍ, ມະຫາໄຊ, ເຊບັ້ງໄຟ, ໜອງບົກ, ທ່າແຂກ, ຫີນບູນ ແລະ ຄູນຄຳ, ງານບຸນກິນເຕດ (ບຸນປີໃໝ່ຂອງພີ່ນ້ອງສັນຊາດລາວເຊື້ອຊາດ ຫວຽດນາມ ແລະ ຈີນ) ແລະ ກິດຈະກໍາປິ່ນອ້ອມອື່ນໆອີກຫລາຍຢ່າງ.
Editor: ລາວອັບເດດ
