ພິທີເປີດປີທ່ອງທຽ່ວລາວ 2018 ທີ່ເມືອງໄຊຈຳພອນ, ແຂວງ ບໍລິຄໍາໄຊ ໄດ້ຈັດຂື້ນໃນວັນທີ 13 ມັງກອນ 2018 ຢູ່ທີ່ເດີ່ນໂຮງຮຽນປະຖົມສົມບູນນໍ້າສັກ ໃຫ້ກຽດເຂົ້າຮ່ວມພິທີຂອງ ທ່ານ ລໍາສະ ໄໝ ວໍລະສານ ຄະນະປະຈຳພັກແຂວງ ປະທານແນວລາວສ້າງຊາດແຂວງບໍລິຄຳໄຊ, ມີ ທ່ານ ອຸດົມ ໄຊນວນຕາ ຮັກສາການເຈົ້າເມືອງ ໄຊຈຳພອນ, ທ່ານນາງ ຄຳຍອງ ຈອມມະນີວົງ ຮອງຫົວໜ້າ ພະແນກ ຖວທ ແຂວງບໍລິຄຳໄຊ ຜູ້ຊີ້ນຳວຽກງານການທ່ອງທຽ່ວ, ມີຄະນະຮັບຜິດຊອບຈັດງານຂັ້ນແຂວງ, ຂັ້ນເມືອງ, ຮອງເຈົ້າເມືອງຄຳເກີດ, ເມືອງປາກກະດິງ ແລະ ເມືອງທ່າພະບາດ ພ້ອມດ້ວຍອຳນາດການການປົກຄອງຂັ້ນບ້ານ ຕະຫຼອດຮອດມວນຊົນພາຍໃນບ້ານ ນໍ້າສັກເຂົ້າຮ່ວມ.
ກ່ອນເປີດງານຈະເລີ່ມຂື້ນຢ່າງເປັນທາງການນັ້ນ ຄະນະປະທານພ້ອມດ້ວຍມວນຊົນໄດ້ຮັບຊົມ ຊົມການສະແດງສີລະປະດົນຕີ, ເປັນຕົ້ນແມ່ນບົດຟ້ອນປະກອບສຽງເພງຫຼາຍບົດ ຈາກນ້ອງໆ ນັກຮຽນ, ການສະແດງສິລະປະດັ່ງກ່າວແມ່ນໄດ້ສ່ອງແສງເຖິງວິຖີຊີວິດ,ຄວາມສາມັກຄີ,ການດຳລົງຊິວິດຂອງປະຊາຊົນລາວບັນດາເຜົ່າ,ກໍ່ຄືການຕໍ່ສູ້ກູ້ຊາດໃນໄລຍະຜ່ານມາ, ສາມາດສ້າງເບີກບານໃຈ,ຄວາມມ່ວນຊື່ນໃຫ້ແກ່ຜູ້ທີ່ມາທຽ່ວຊົມດ້ວຍຮອຍຍີ້ມ ແລະ ສຽງຕົບມື ເປັນການສ້າງສີສັນບັນຍາກາດໃຫ້ແກ່ການເປີດງານປີທ່ອງທຽ່ວລາວ 2018 ທີ່ເມືອງ ໄຊຈຳພອນ.
ທ່ານ ໂກ້ ໄຊສົມບັດ ຮອງເຈົ້າເມືອງ ໄຊຈໍາພອນ ຄະນະປະທານຈັດງານຂື້ນຜ່ານ ບົດສະຫຼຸບໃນການຫ້າງຫາກະກຽມຈັດປີທ່ອງທຽ່ວລາວ 2018 ທີ່ເມືອງໄຊພອນ ໃນນັ້ນແມ່ນໄດ້ຈັດຂື້ນທ່າມກາງບຸນຂື້ນປີໃໝ່ຂອງຊົນເຜົ່າຕູມ ຫຼື (ອັນເຕດ) ຊົນເຜົ່າຕູມ ແມ່ນຊົນເຜົ່າໜື່ງຂອງເຜົ່າລາວ ທີ່ມີມູນເຊື້ອການອອກແຮງງານ, ມີຄວາມສາມັກຄີ,ຮັກຊາດ, ຮັກບ້ານເກີດເມືອງນອນ ຕິດພັນກັບການຕໍ່ສູ້ກູ້ຊາດປະຫວັດຄວາມເປັນມາຂອງເມືອງ ໄຊຈຳພອນ ຕະຫຼອດມາ, ແລະ ມາຮອດປະຈຸບັນແມ່ນໄດ້ສືບທອດກັນມາເປັນເວລາ 3 ລູ້ນດ້ວຍກັນ. ສຳລັບບຸນປະເພນີທີ່ຂາດບໍ່ໄດ້ຂອງເຜົ່າຕູມ ແມ່ນມື້ອອກໃໝ່ 1 ເດືອນ 3 ລາວ ຂອງທຸກໆປີ.
ການຈັດປີທ່ອງທຽ່ວລາວ ຢູ່ເມືອງໄຊຈຳພອນ ຂື້ນນີ້ກໍ່ເພື່ອເປັນການຊຸກຍູ້ສົ່ງເສີມການທ່ອງທຽ່ວລາວ ໃຫ້ມີຄວາມເຂັ້ມແຂງ, ສົ່ງເສີມຜະລິດຕະພັນຂອງປະຊາຊົນພາຍໃຕ້ຄຳຂັວນທີ່ວ່າ ( ທ່ອງທຽ່ວເມືອງລາວ ທ່ອງທຽ່ວໄຊຈຳພອນ ຊົມທຳມະຊາດທີ່ໜ້າອອນຊອນ ຊົມຖິ່ນກຳເນີດທ່ານ ສີສົມພອນ ລໍວັນໄຊ ໃສ່ໃຈສິ່ງແວດລ້ອມ ). ສໍາລັບເມືອງໄຊຈໍາພອນ ມີແຫຼ່ງທອ່ງທຽ່ວທາງທໍາມະຊາດ 5 ແຫ່ງ. ຈາກນັ້ນຄະນະຮັບຜິດຊອບຈັດງານການເປີດປີທ່ອງທຽ່ວ ຍັງໄດ້ຕັດແທບຜ້າ,ເປີດປ້າຍ,ລັ່ນຄ້ອງ 9 ບາດ, ເພື່ອຢັ້ງຢືນການເປີດປີທ່ອງທຽ່ວລາວ 2018 ທີ່ເມືອງ ໄຊຈໍາພອນ ຢ່າງເປັນທາງການ. ຄະນະອຳນາດການປົກຄອງບ້ານ ຍັງໄດ້ຖືເອົາໂອກາດນີ້ ຈັດພິທີຜູກແຂນ ບາສີສູ່ຂັວນ, ໃຫ້ຄະນະນຳຂັ້ນແຂວງ,ຂັ້ນເມືອງຕື່ມອີກ,ທັງນີ້ກໍ່ເພື່ອສະແດງເຖິງຄວາມຮູ້ບຸນຄຸນ ຄຸນງາມຄວາມດີ ຂອງຂັ້ນເທິງທີ່ໄດ້ໄກ້ຊິດຕິດແທດຊີ້ນຳ-ນຳພາການສ້າງສາພັດທະນາ ແຂວງບໍລິຄຳໄຊ ເວົ້າລວມ,ເວົ້າສະເພາະ ເມືອງໄຊຈຳພອນ ຕະຫຼອດໃນໄລຍະຜ່ານມາ, ຮັກສາໄດ້ມູນເຊື້ອວັດທະນາທໍາອັນດີງາມຂອງຊາດ, ຂອງເຜົ່າລາວເຮົາ.
ແຫລ່ງຂ່າວ ທີມຂ່າວ ຖວທ ຈາກແຂວງບໍລິຄໍາໄຊ
Editor: ກຳປານາດ ລັດຖະເຮົ້າ
