ພິທີເປີດການແຂ່ງຂັນກິລາ ຕ້ານຢາເສບຕິດປະຈຳສົກຮຽນ 2017-2018 ຂອງໂຮງຮຽນ ມສ ປາກງຽບ ໄດ້ຈັດຂື້ນໃນກາງເດືອນ ມັງກອນ 2018 ນີ້, ຢູ່ທີ່ເດີ່ນກິລາໂຮງຮຽນດັ່ງກ່າວ ໃນພິທີໄດ້ເດີ່ນຂະບວນ ກ້ອນກຳລັງຂອງນັກກິລາ ແຕ່ລະຊັ້ນຮຽນເຂົ້າສູ່ສະໝາມກິລາ ເຊິ່ງເລີມຈາກກ້ອນກຳລັງທຸງຊາດ, ທຸງທິວ, ທຸງກິລາ, ຕາມດ້ວຍປ້າຍຄຳຂວັນກິລາ ແລະ ກ້ອນກຳລັງຂອງນັກກິລາແຕ່ ມ 1 - ມ 7 ໂດຍການເປັນປະທານຂອງ ທ່ານ ອາຈານ ນິພົນ ອ່ອນສຸລະທຸມ ອຳນວຍການໂຮງຮຽນ ມສ ປາກງຽບ, ທັງເປັນປະທານຈັດງານແຂ່ງຂັນກິລາຂອງໂຮງຮຽນ ເປັນກຽດເຂົ້າຮ່ວມຂອງ ທ່ານ ບຸນມາກ ພັນດານຸວົງ ຮອງຫົວໜ້າພະແນກສຶກສາທິການ ແລະ ກິລາແຂວງບໍລິຄໍາໄຊ ມີແຂກຖຶກເຊີນຈາກໂຮງຮຽນອ້ອມຂ້າງ ອຳນາດການປົກຄອງບ້ານອ້ອມຂ້າງ ຄູອາຈານ ແລະ ນັກຮຽນເຂົ້າຮ່ວມ,

ໃນພິທີ ທ່ານ ອາຈານ ພິດສະໄໝ ຮອງອຳນວຍການໂຮງຮຽນ ມສ ປາກງຽບ ໄດ້ລາຍງານການກະກຽມຄວາມພ້ອມ ຂອງການຈັດງານ ສຳລັບການແຂ່ງຂັນກິລາ ຕ້ານຢາເສບຕິດ ຂອງໂຮງຮຽນ ມສ ປາກງຽບ ປະຈຳສົກຮຽນ 2017-2018 ແມ່ນມີ 6 ປະເພດກິລາ ປະກອບມີຄື: ກິລາບານເຕະ, ບາຍສົ່ງ, ກະຕໍ້, ເປຕັງ, ແລ່ນ-ລານ ແລະ ກິລາດຶງເຊືອກ ມີນັກກິລາທັງໝົດ 776 ຄົນ,ຍິງ 402 ຄົນ ໃນນັ້ນບາງປະເພດກິລາໄດ້ມີການແຂ່ງຂັນໄປແລ້ວ ຈາກນັ້ນໃນພິທີ ທ່ານ ອາຈານ ນິພົນ ອ່ອນສຸລະທຸມ ອຳນວຍການໂຮງຮຽນ ປະທານຈັດງານ ກໍ່ໄດ້ຂື້ນກ່າວເປີດງານແຂ່ງຂັນກິລາຕ້ານຢາເສບຕິດ ຂອງໂຮງຮຽນ ປະຈຳສົກຮຽນ 2017-2018 ພ້ອມທັງຕັດແຖບຜ້າເປີດການແຂ່ງຂັນຢ່າງເປັນທາງການ

ທ່ານ ອາຈານ ນິພົນ ອ່ອນສຸລະທຸມ ອຳນວຍການໂຮງຮຽນ ມສ ປາກງຽບ, ທັງເປັນປະທານຈັດງານແຂ່ງຂັນກິລາຂອງໂຮງຮຽນ ໄດ້ໃຫ້ຮູ້ວ່າ: ສຳລັບການເປີດງານແຂ່ງຂັນກິລາ ປະຈຳສົກຮຽນ 2017-2018 ຄັ້ງນີ້ ແມ່ນເພື່ອປະຕິບັດຕາມ 5 ຫຼັກມູນຂອງການສຶກສາ ທີ່ກະຊວງສຶກສາທິການ ແລະ ກິລາວາງອອກ ກໍ່ຄື:ທິດທາງແຜນການປະຈຳສົກຮຽນ 2017-2018 ຂອງໂຮງຮຽນວາງອອກ ໄປຄຽງຄູ່ກັນນັ້ນ ກໍ່ເພື່ອເປັນການສ້າງຂະບວນການ ເຮັດໃຫ້ພາຍໃນໂຮງຮຽນ ມີການເຄື່ອນໄຫວຝຶກຊ້ອມກິລາ ສະເໝີຕົ້ນສະເໝີປາຍ ແລະ ເປັນການສ້າງໄດ້ນັກກິລາ ທີ່ມີພອນສະຫວັນ ແລະ ສະຫງວນມັກດ້ານກິລາປະເພດຕ່າງໆ ເພື່ອເຂົ້າຮ່ວມແຂ່ງຂັນໃນລະດັບຕ່າງໆຂອງພາກພື້ນ ແລະ ສາກົນ

ຂອບໃຈ ທີມຂ່າວ ຈາດ ພະແນກຖະແຫລງຂ່າວ,
ວັດທະນະທໍາ ແລະ ທ່ອງທ່ຽວ ແຂວງບໍລິຄໍາໄຊ

Editor: ກຳປານາດ ລັດຖະເຮົ້າ