ປ່າສະຫງວນແຫ່ງຊາດ ນ້ຳແອດ-ພູເລີຍ ໄດ້ຖືກກຳນົດຂື້ນຢ່າງເປັນທາງການໃນປີ 1993 ໂດຍມີເນື້ອທີ່ທັງໝົດ 4,200 ຕາລາງກິໂລແມັດ, ເຊິ່ງກວມເອົາ 9 ເມືອງ ໃນ 3 ແຂວງພາກເໜືອ ຄື: ເມືອງແອດ, ເມືອງຊຳເໜືອ, ເມືອງຫົວເມືອງ, ເມືອງຮ້ຽມ ແລະ ເມືອງຊ່ອນ ໃນແຂວງຫົວພັນ, ແລະ ເມືອງວຽງຄຳ, ເມືອງໂພນໄຊ, ແລະ ເມືອງໂພນທອງ ໃນແຂວງຫຼວງພະບາງ, ເມືອງພູກູດ ແຂວງຊຽງຂວາງ. ປະກອບດ້ວຍບ້ານທີ່ຢູ່ຕິດຈອດ ແລະ ຢູ່ໃນ ຈຳນວນ 129 ບ້ານ, ມີປະຊາກອນອາໄສຢູ່ຫຼາຍກວ່າ 54.315 ຄົນ, ທີ່ມີຄວາມຫຼາກຫຼາຍທາງດ້ານຮີດຄອງປະເພນີ ບໍ່ວ່າຈະເປັນຊົນເຜົ່າກຶມມຸ, ເຜົ່າມົ້ງ, ເຜົ່າອິວມຽນ, ແລະ ລາວລຸ່ມ. ປ່າສະຫງວນແຫ່ງນີ້ມີລະດັບຄວາມສູງຈາກໜ້ານ້ຳທະເລແຕ່ 400- 2,257 ແມັດ, ມີຈຸດສູງສຸດຄືພູເລີຍ. ເມື່ອເວລາທີ່ເຮົາໄປທ່ຽວປ່າສະຫງວນນ້ຳແອັດ-ພູເລີຍ ເຮົາຈະໄດ້ເຫັນຊີວິດການເປັນຢູ່ຂອງປະຊາຊົນໃນເຂດນັ້ນ ເຫັນເຖິງຄວາມລຽບງ່າຍໃນການດຳລົງຊີວິດຂອງພວກເຂົາເຈົ້າ ລວມທັງຄຳເວົ້າ, ຮອຍຍິ້ມ ແລະ ສີໜ້າແວວຕາທີ່ເຕັມໄປດ້ວຍຄວາມຈິງໃຈ ເປັນກັນເອງເຊິ່ງມັນເປັນນິໃສຂອງຄົນທີ່ອາໃສຢູ່ແຖບສົນນະບົດ ມັນເປັນອີກມົນສະເໜ່ໜຶ່ງທີ່ໜ້າເກັບໄວ້ໃນຄວາມຊົງຈຳ.
ຫາກທ່ານໃດທີ່ມັກການພະຈົນໄພແບບຕື່ນເຕັ້ນຕ້ອງບໍ່ພາດທີ່ຈະມາທ່ຽວປ່າສະຫງວນນ້ຳແອດ-ພູເລີຍ ເພາະຈະມີທັງການເດີນປ່າ, ຂີ່ເຮືອລ່ອງເບິ່ງຄວາມງາມຂອງທຳມະຊາດ, ກິນເຂົ້າໃນປ່າ, ນອນໃນປ່າ ສູດດົມອາການທີ່ສະອາດບໍລິສຸດ ເຊິ່ງຊີວິດແບບນີ້ຫາບໍ່ໄດ້ໃນເມືອງໃຫຍ່. ເມືອງລາວຍັງມີແຫລ່ງທ່ອງທ່ຽວອີກຫຼາຍແຫ່ງທີ່ທ່ານຍັງບໍ່ຮູ້ ແລະ ບໍ່ເຄີຍໄປສຳຜັດ ທ່ຽວເມືອງລາວໃຫ້ທົ່ວ ເພື່ອສົ່ງເສີມເສດຖະກິດການທ່ອງທ່ຽວຂອງລາວ ແລະ ທ່ານຈະໄດ້ຮູ້ວ່າເມືອງລາວແມ່ນສະຫວັນຂອງຄົນເທິງດິນ. ນອກຈາກຈະໄດ້ສຳຜັດ ກັບທຳມະຊາດ ທີ່ສວຍງາມ, ສຳຜັດກັບວິຖີຊີວິດຂອງປະຊາຊົນບັນດາເຜົ່າ ເຂດປ່າສະຫງວຍ ນ້ຳແອດ-ພູເລີຍ ຍັງສາມາດສຶກສາເບີ່ງນິເວດ-ວິທະຍາ ຂອງປ່າໄມ້ ແລະ ສັດປ່ານານາຊະນິດ ທີ່ຍັງບໍ່ທັນສູນພັນ ແລະ ສັດຫວງຫ້າມຈຳນວນຫນຶ່ງ ທີ່ຍັງບົ່ງບອກເຖິງຄວາມອຸດົມສົມບູນ ຂອງຜຶນປ່າແຫ່ງນີ້.
Editor: ກຳປານາດ ລັດຖະເຮົ້າ
