ຕາມການລາຍງານຈາກ ທ່ານ ພູວັນ ເພັດມີໄຊ ຮອງຫົວໜ້າພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແຂວງຫົວພັນ, ຜູ້ຊີ້ນຳວຽກງານທ່ອງທ່ຽວ ໃຫ້ຮູ້ວ່າ: ໃນປີ 2017 ຜ່ານມານີ້ແຂວງຫົວພັນ ສຳຫລວດຂື້ນບັນຊີແຫລ່ງທ່ອງທ່ຽວແຂວງໄດ້ 152 ແຫ່ງ, ໃນນີ້ ແຫລ່ງທ່ອງທ່ຽວທາງທໍາມະຊາດ 51 ແຫ່ງ, ແຫລ່ງທ່ອງທ່ຽວວັດທະນະທຳ 35 ແຫ່ງ ແລະ ແຫລ່ງທ່ອງທ່ຽວ ປະຫວັດສາດ 66 ແຫ່ງ, ເປີດນຳໃຊ້ແລ້ວ 54 ແຫ່ງ.
ໂດຍເຫັນໄດ້ຄວາມສຳຄັນ ແລະ ທ່າແຮງຂອງການທ່ອງທ່ຽວນັ້ນ, ລັດຖະບານ ໄດ້ມີນະໂຍບາຍຊຸກຍູ້ສົ່ງເສີມ ແລະ ທຶນພັດທະນາແຫລ່ງທ່ອງ ທີ່ສຳຄັນຈຳນວນໜຶ່ງ ເປັນຕົ້ນ ຖໍ້າປະຫວັດສາດທ່ານຜູ້ນຳ ຂອງບັນດາກະຊວງຕ່າງໆ ກໍໄດ້ບູລະນະສ້ອມແປງ ສ້າງເສັ້ນທາງຍ່າງເຊື່ອມຕໍ່ ລະຫວ່າງ ຖໍ້າຕໍ່ຖໍ້າ, ເສັ້ນທາງຍ່າງຢູ່ປ່າສະຫງວນແຫ່ງຊາດ ນໍ້າແອດພູເລີຍ, ນອກຈາກນີ້ທາງ ແຂວງຍັງໄດ້ອະນຸຍາດໃຫ້ ນັກທຸລະກິດພາຍໃນ ສຳປະທານບໍ່ນໍ້າຮ້ອນເມືອງຮ້ຽມ, ແຫລ່ງທ່ອງທ່ຽວຕາດໂກນ ເມືອງຊ່ອນ, ນໍ້າຕົກຕາດສະເຫລີຍ ເມືອງຊຳເໜືອ, ຕາດນໍ້ານົ່ວ ເມືອງວຽງໄຊ ແລະ ແກັງລິດ ເມືອງແອດ ແລະ ຜູ້ປະກອບການທຸລະກິດບໍລິການກໍໄດ້ມີການ ປັບປຸງການບໍລິການ ນັບມື້ດີຂຶ້ນໃນດ້ານຈຳນວນ ແລະ ຄຸນນະພາບ, ປະຈຸບັນແຂວງຫົວພັນ ມີໂຮງແຮມ 11 ແຫ່ງ, ເຮືອນພັກ 61 ແຫ່ງ, ມີຮ້ານອາຫານ, ກິນດື່ມ 180 ແຫ່ງ, ຮ້ານບັນເທິງ 5 ແຫ່ງ, ສາມາດດຶງດູດນັກທ່ອງທ່ຽວ ພາຍໃນ ແລະ ຕ່າງປະເທດ ໄດ້ 49.021 ເທື່ອຄົນ, ສາມາດສ້າງລາຍຮັບໄດ້ຫລາຍກວ່າ 34 ຕື້ກວ່າກີບ.
ສຳລັບ ທິດທາງແຜນການປີ 2018 ແຂວງຫົວພັນ ຈະຊຸກຍູ້ຜູ້ສຳປະທານແຫລ່ງທ່ອງທ່ຽວ ໃຫ້ມີການພັດທະນາ ແຫລ່ງທ່ອງທ່ຽວຫລາຍຂຶ້ນ, ປັບປຸງເສັ້ນທາງເຂົ້າຫາແຫລ່ງທ່ອງທ່ຽວຕ່າງໆ ໃຫ້ມີຄວາມສະດວກ,ສົມທົບກັບ ຄະນະ ຮັບຜິດຊອບຂັ້ນແຂວງ ແລະ ເມືອງສ້າງໂຕໜັງສືໃຫຍ່ໃສ່ໜ້າຜາ ເມືອງວຽງໄຊ, ນອກຈາກນີ້ ຍັງມີຫລາຍກິດຈະກໍາ ເພື່ອຕ້ອນຮັບປີທ່ອງທ່ຽວລາວ, ວັນປົດປ່ອຍຝາຖີ່ ແລະ ວັນສ້າງຕັ້ງເມືອງວຽງໄຊ ຄົບຮອບ 50 ປີ. ຄາດຄະເນ ປີ 2018 ຈະມີນັກທ່ອງທ່ຽວເຂົ້າມາທ່ຽວແຂວງຫົວພັນ ທັງໝົດ 50 ພັນກວ່າເທື່ອຄົນ.
Editor: ຂ່າວສານປະເທດລາວ
