ຕາມການລາຍງານຂອງຫນັງສືພິມປະເທດລາວ ບອກວ່າ: ວຽກງານທ່ອງທ່ຽວ ແມ່ນວຽກງານໜຶ່ງທີ່ສຳຄັນ ໃນການພັດທະນາ ເສດຖະກິດ-ສັງຄົມ ກໍຄື ການພັດທະນາຊີວິດການຢູ່ ຂອງປະຊາຊົນໃຫ້ດີຂຶ້ນເທື່ອລະກ້າວ, ໃນປີ 2018 ນີ້ ແຂວງສາລະວັນ ໄດ້ຂຶ້ນບັນຊີແຫລ່ງທ່ອງທຽ່ວ ຂອງແຂວງໄວ້ທັງໝົດ 96 ແຫ່ງ, ໃນນັ້ນ ແຫລ່ງທ່ອງທ່ຽວທາງທໍາມະຊາດ 53 ແຫ່ງ, ວັດທະນະທຳ 37 ແຫ່ງ ແລະ ແຫລ່ງທ່ອງທຽ່ວ ທາງປະຫວັດສາດ 6 ແຫ່ງ, ໂດຍຄາດວ່າມີນັກ ທ່ອງທຽ່ວທັງພາຍໃນ ແລະ ຕ່າງປະເທດເຂົ້າມາທ່ຽວ ແຂວງສາລະວັນ 95 ພັນກວ່າຄົນ ແລະ ຈະມີລາຍຮັບຈາກການ ທ່ອງທ່ຽວປະມານ 15 ລ້ານໂດລາສະຫາລັດ.
ຂໍ້ມູນດັ່ງກ່າວ ໄດ້ຮັບການລາຍງານຈາກ ທ່ານ ສົມໃຈ ອຸ່ນຈິດ ຫົວໜ້າພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແຂວງສາລະວັນ ໃນກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນ ແຂວງສາລະວັນ ຊຸດທີ I ໃນທ້າຍອາທິດຜ່ານມາ ແລະ ທ່ານຍັງໃຫ້ຮູ້ອີກວ່າ: ໃນປີ 2017 ຜ່ານມາ ພະແນກຖະແຫລງຂ່າວ, ວັດທະນະທຳ ແລະ ທ່ອງທຽ່ວ ໃນນາມທີ່ເປັນເສນາທິການ ໃຫ້ແກ່ອໍານາດການ ປົກຄອງແຂວງ ໄດ້ລົງສຳຫລວດ ແລະ ຄົ້ນພົບຖໍ້າແຫ່ງໃໝ່ທັງໝົດ 9 ຖໍ້າ, ຢູ່ທີ່ເຂດອຸທິຍານພູຜາສຸກ ເປັນເຂດທີ່ເໝາະທ່ອງທ່ຽວ ທາງທຳມະຊາດ ແລະ ເປັນແຫ່ງທ່ອງທ່ຽວໃໝ່ຂອງແຂວງ ຕິດພັນກັບ ການພັດທະນາ ແບບກວມລວມໃນເຂດພູພຽງບໍລິເວນ ແລະ ເປັນການເຊື່ອມຕໍ່ການທ່ອງທ່ຽວໃນ 4 ແຂວງພາກໃຕ້, ຕາມແລວຕາເວັນອອກ-ຕາເວັນຕົກ ແລະ ເປີດໃຫ້ບໍລິການ ແກ່ນັກທ່ອງທ່ຽວແລ້ວ ຈໍານວນ 5 ຖໍ້າ.
ປັດຈຸບັນທົ່ວແຂວງສາລະວັນ ມີໂຮງແຮມ 7 ແຫ່ງ, ເຮືອນພັກ 50 ແຫ່ງ, ຮ້ານອາຫານ 48 ແຫ່ງ, ຮ້ານກິນດື່ມ 64 ແຫ່ງ, ຮ້ານບັນເທີງ 8 ແຫ່ງ, ໃນນັນ ໂຮງແຮມທີ່ໄດ້ລະດັບ 2 ດາວມີ 1 ແຫ່ງ, ໄດ້ລະດັບ 1 ດາວມີ 1 ແຫ່ງ, ລະດັບເຮືອນພັກ ໄດ້ຮັບມາດຕະຖານດອກຈຳປາ 2 ດອກ ມີ 2 ແຫ່ງ, ໄດ້ຮັບລະດັບ 1 ດອກ ມີ 2 ແຫ່ງ,
ປີ 2017 ມີນັກທ່ອງທຽ່ວມາທຽ່ວຢູ່ ແຂວງສາລະວັນ ມີ 93 ພັນກວ່າຄົນ, ຄາດຄະເນລາຍຮັບຈາກການທ່ອງທຽ່ວທ່ອງໄດ້ 14 ລ້ານໂດລາສະຫາລັດ.
Editor: ຂ່າວສານປະເທດລາວ
