ງານເທດສະການອາຫານລາວ ຕ້ອນຮັບປີທ່ອງທ່ຽວລາວ 2018 ແມ່ນໄດ້ຈັດຂື້ນ ໃນລະຫວ່າງວັນທີ 24-27 ມັງກອນ 2018 ທີ່ສວນເຈົ້າອານຸວົງ ບໍລິເວນແຄມຂອງ ທ່າວັດຈັນ, ນະຄອນຫລວງວຽງຈັນ ເຊີ່ງປີນີ້ ພາຍໃຕ້ຄໍາຂວັນ: ສຸດຍອດອາຫານລາວ ຕ້ອນຮັບປີທ່ອງທ່ຽວລາວ 2018. ງານຄັ້ງນີ້ ແມ່ນມີຮ້ານວາງສະແດງ ຫລາຍກວ່າ 180 ຮ້ານ, ໃນນັ້ນເປັນອາຫານ ຈໍານວນ 134 ຮ້ານ. ຫັດຖະກໍາ ກະສິກໍາ 22 ຮ້ານ ຈາກປະເທດອາຊຽນ ແລະ ສະຖານທູດຕ່າງໆ ອີກ 3 ຮ້ານ. ພ້ອມນີ້ ຍັງມີຮ້ານ ຈາກປະເທດເພື່ອນບ້ານ ( ໄທ ) 21 ຮ້ານ.
ພິເສດໃນປີນີ້: ແມ່ນໄດ້ຈັດຫລາຍກິດຈະກໍາ ຄື: ການແຂ່ງຂັນຄົ້ນຫາສຸດຍອດຜູ້ປຸງແຕ່ງອາຫານລາວ ດີເດັ່ນ, ແລະ ກິດຈະກໍາອື່ນໆ. ຈຸດປະສົງການຈັດງານ ເພື່ອເປັນການຊຸກຍູ້ ແລະ ສົ່ງເສີມຫົວຫນ່ວຍທຸລະກິດຂອງແມ່ຍິງ, ນັບທັງການຜະລິດ, ການປູກພຶດກະສິກໍາ, ການລ້ຽງ-ການປຸງແຕ່ງ, ທຸລະກິດຮ້ານອາຫານ, ການໂຮງແຮມ ແລະ ອື່ນໆ. ໃນນະຄອນຫລວງວຽງຈັນ ແລະ ທ້ອງຖິ່ນຕ່າງແຂວງ ໄດ້ມີໂອກາດນໍາເອົາຜະລິດຕະພັນຂອງຕົນມາວາງສະແດງ ຕໍ່ສື່ມວນຊົນ ແລະ ນັກທ່ອງທ່ຽວ ໄດ້ສໍາຜັດ ແລະ ຊິມອາຫານລາວ ທີ່ແຊບຊ້ອຍ.
ງານເລີ່ມແຕ່ວັນທີ 24 ໄປຈົນເຖິງວັນທີ 27 ມັງກອນ 2018 ລວມ 4 ວັນ, ທີ່ສວນເຈົ້າອານຸວົງ. ນະຄອນຫລວງວຽງຈັນ. ເຊີນໄປທ່ຽວຊົມໄດ້.
Editor: ກຳປານາດ ລັດຖະເຮົ້າ
