ງານເທດສະການອາຫານລາວ ຕ້ອນຮັບປີທ່ອງທ່ຽວລາວ 2018 ແມ່ນໄດ້ເປີດຂື້ນ ຢ່າງເປັນທາງການໃນ ວັນທີ 24 ມັງກອນ 2018 ນີ້ ຢູ່ທີ່ສວນເຈົ້າອານຸວົງ ບໍລິເວນແຄມຂອງ ທ່າວັດຈັນ, ເມືອງຈັນທະບູລີ, ນະຄອນຫລວງວຽງຈັນ. ພາຍໃຕ້ຄໍາຂວັນ: ສຸດຍອດອາຫານລາວ ຕ້ອນຮັບປີທ່ອງທ່ຽວລາວ 2018. ງານດັ່ງກ່າວ ແມ່ນຈະໄດ້ດໍາເນີນໄປຈົນເຖິງວັນທີ 27 ມັງກອນ 2018 ເປັນເວລາ 4 ວັນ, ສໍາລັບປີນີ້ ແມ່ນມີຮ້ານວາງສະແດງ ຫລາຍກວ່າ 180 ຮ້ານ, ໃນນັ້ນເປັນອາຫານ ຈໍານວນ 134 ຮ້ານ. ຫັດຖະກໍາ ກະສິກໍາ 21 ຮ້ານ ທີ່ມາຈາກປະເທດອາຊຽນ ແລະ ມາຈາກສະຖານທູດຕ່າງໆປະຈໍາລາວ ຂໍານວນ 3 ຮ້ານ.
ໃນພິທີ ໃຫ້ກຽດເຂົ້າຮ່ວມ ມີທ່ານ ດຣ. ນາງ ອິນລາວັນ ແກ້ວບຸນພັນ ປະທານສະຫາພັນແມ່ຍິງລາວ, ພ້ອມນີ້ຍັງມີຄະນະປະທານ -ຮອງປະທານສະມາຄົມນັກທຸລະກິດຍິງ, ບັນດາພັນລະຍາການນໍາ ພັກ-ລັດ ແລະ ຜູ້ໃຫ້ການສະຫນັບສະຫນູນ, ບັນດາແຂກ ແລະ ພາກສ່ວນຕ່າງໆ ເຂົ້າຮ່ວມຢ່າງພ້ອມພຽງ.
ທ່ານນາງ ຈັນທະຈອນ ວົງໄຊ ປະທານສະມາຄົມນັກທຸລະກິດແມ່ຍິງລາວ ທັງເປັນປະທານຄະນະກໍາມະການຈັດງານເທດສະການອາຫານລາວ ຄັ້ງນີ້ ໄດ້ກ່າວວ່າ: ການຈັດງານດັ່ງກ່າວ ແມ່ນມີຈຸດປະສົງ ເພື່ອປະກອບສ່ວນໃນການອະນຸລັກ ຮິດຄອງປະເພນີ ແລະ ວັດທະນະທໍາທາງດ້ານອາຫານ ໄວເປັນສັນຍາລັກ ຂອງຊາດ ແລະ ຄົນລາວ, ພ້ອມກັນນັນ ຍັງເປັນການເຊື່ອມໂຍງ-ເຜີຍແຜ່ ຕໍ່ນັກທ່ອງທ່ຽວ ແລະ ບັນດາປະເທດອາຊຽນ ແລະ ທົ່ວໂລກ ໃນໂອກາດປີທ່ອງທ່ຽວລາວ 2018 ພ້ອມກັນນີ້ ຍັງເປັນການສ້າງຖອກາດໃຫ້ຜູ້ປະກອບການ ໃນຂະແຫນງປຸງແຕ່ງອາຫານ ຢູ່ທ້ອງຖິ່ນ ໄດ້ມີການແລກປ່ຽນບົດຮຽນ-ປະສົບການປຸງແຕ່ງອາຫານລາວ ທີ່ມີລົດຊາດດີ ເປັນທໍາມະຊາດ ນອກຈາກນັນ ຍັງສົ່ງເສີມຜູ້ປະກອບການ ໃນຂະແຫນງການຜະລິດ ( ກະສິກໍາ-ຫັດຖະກໍາ, ອຸສາຫະກໍາປຸງແຕ່ງ, ໂຮງແຮມ ແລະ ຮ້ານອາຫານ ) ມີບົດບາດໃນການສ້າງຜະລິດຕະພັນຂອງຕົນເປັນສິນຄ້າ ຕອບສະຫນອງຕາມຄວາມຕ້ອງການຂອງຕະຫລາດ ໃນປະຈຸບັນ, ຮູ້ທໍາມາຫາກິນຊ່ວຍເຫລືອຄອບຄົວ ເພື່ອນໍາພາຄອບຄົວຫລຸດພົ້ນອອກຈາກຄວາມທຸກຍາກ.
ງານເລີ່ມແຕ່ວັນທີ 24 ໄປຈົນເຖິງວັນທີ 27 ມັງກອນ 2018 ລວມ 4 ວັນ, ທີ່ສວນເຈົ້າອານຸວົງ. ນະຄອນຫລວງວຽງຈັນ. ເຊີນໄປທ່ຽວຊົມໄດ້.
Editor: ກຳປານາດ ລັດຖະເຮົ້າ
