ໃນລະຫວ່າງ ວັນທີ 20-21 ມັງກອນ 2018 ທີ່ຜ່ານມານີ້, ທີ່ວັດຄອນສະຫວັນ ບ້ານທ່າພະໄຕ້ ໄດ້ຈັດງານ ພຸດທາພິເສກ ຫລື ສົມໂພດພະພຸດທະຮູບ ຂື້ນ ຢ່າງເປັນທາງການ ເພື່ອໃຫ້ຖືກຕ້ອງຕາມຫລັກພຸດທະສາສະຫນາ ແລະ ເພີ່ມຄວາມສັກສິດ ພຸດທະຄຸນ ແກ່ອົງພະພຸດທະຮູບ ທີ່ໄດ້ນໍາມາປະດິດສະຖານໃຫມ່ ໃນວັດແຫ່ງນີ້, ເພື່ອເປັນທີ່ເຄົາລົບຂາບໄຫວ ແລະ ບູຊາ ຂອງພຸດທະສາສະນິກະຊົນ ກໍ່ຄື ພໍ່ແມ່ປະຊາຊົນຊາວພຸດ ພາຍໃນບ້ານທ່າພະໄຕ້.
ເມື່ອກ່າວເຖິງ ວັດຄອນສະຫວັນ ທ່າພະໄຕ້ ແມ່ນເປັນອີກວັດຫນຶ່ງ ທີ່ມີອາຍຸຍາວນານ ເກືອບ 50 ປີ ນັບວ່າເປັນອີກວັດຫນຶ່ງທີ່ມີຄວາມເກົ່າແກ່ ເປັນທີ່ເຄົາລົບຂາບໄຫວ ຂອງປະຊາຊົນ ພາຍໃນບ້ານ ແລະ ບ້ານໃກ້ຄຽງ. ຕາມການບອກເລົ່າ ຂອງ ຍາທ່ານ ບຸນລໍ້າ ເຊີ່ງເປັນເຈົ້າອະທິການວັດ ຄອນສະຫວັນ ບ້ານທ່າພະໄຕ້ ກ່າວວ່າ: ວັດແຫ່ງນີ້ ສ້າງຕັ້ງຂື້ນມາໄດ້ຫລາຍສິບປີ ແລ້ວ, ເພື່ອເປັນທີ່ກາບໄຫວຂອງພຸດທະສາສະນິກະຊົນ ທັງໃກ້ ແລະ ໄກ. ເປັນສະຖານທີຊາວພຸດທໍາພິທີທາງສາສະຫນາ ທາງດ້ານຮິດຄອງປະເພນີ ແລະ ງານບຸນຕ່າງໆ ທາງພຸດທະສາສະຫນາ. ໃນໄລຍະ 10 ປີມານີ້ ວັດຄອນສະຫວັນ ທ່າພະໄຕ້ ແມ່ນໄດ້ມີການພັດທະນາຫລາຍສິ່ງ-ຫລາຍຢ່າງ ກຸດຕີ, ຫໍກອງ, ສ້າງພະພຸດທະຮູບ ແລະ ອື່ນໆຢ່າງຫລວງຫລາຍ. ເຮັດໃຫ້ວັດແຫ່ງນີ້ ມີຄວາມຮຸ່ງເຮືອງສີວີໄລ. ຍາທ່ານ ບຸນລໍ້າ ກ່າວຕື່ມວ່າ: ວັດ ໄດ້ຈັດງານ ຄັ້ງນີ້ຂື້ນ ແມ່ນເປັນງານສົມໂພດພະພຸດທະຮູບ ຫລື ພຸດທາພິເສກ ເຊີ່ງມີພະພຸດທະຮູບ 9 ອົງ ໃນປາງຕ່າງໆ ທີ່ເຈົ້າພາບ-ເຈົ້າສັດທາ ໄດ້ນໍາມາຖະຫວາຍ ແລະ ສົມທົບທຶນ ສ້າງ.
ຄໍາວ່າ ສົມໂພດ ຫລື ພຸດທາພິເສກ ແມ່ນມີຄວາມຫມາຍສໍາຄັນ ຢ່າງເລີກເຊີ່ງ ໃນທາງພຸດທະສາສະຫນາ ກໍາເນິດເກີດຂື້ນ ມາແຕ່ສະໄຫມບູຮານນາການ ນັບແຕ່ສະໄຫມພຸດທະການ ບາງຄັ້ງງານພຸດທະພິເສກ ດັ່ງກ່າວ ຍັງຖືກນໍາໃຂ້ເຂົ້າໃນພິທີກໍາ ຕ່າງໆ ໃນສາສະຫນາ ພາມ ແລະ ພຸດ ໄປພ້ອມໆກັນ. ພິທີພຸດທະພິເສກພະພຸດທະຮູບ ຫລື ວັດຖຸມົງຄຸນ ໂດຍມີພະເຖລະ-ນຸເຖລະ ທີ່ມີຄວາມຊຽວຊານ ທາງດ້ານສະມາທິ ໄດ້ນັ່ງສູດບົດສົມໂພດ ພາວະນາສົ່ງກະແສຈິດ ທີ່ເປັນຄຸນລັດຕະນະໄຕ ເຂົ້າສູ່ອົງພະພຸດທະຮູບ ເພື່ອເຮັດໃຫ້ ອົງພະພຸດທະຮູບ ໄດ້ເກີດມີຄວາມສັກສິດ ປະສິດທິພາບ ດ້ວຍພະເດດ-ພະຄຸນ ທາງພຸດທະສາສະຫນາ. ນອກຈາກພະເຖລະ-ນຸເຖລະ ຈະໄດ້ຜັດປ່ຽນກັນທ່ອງບົດສູດສົມໂພດ ຕະຫລອດຄືນແລ້ວ ເບີ້ອງ ອອກຕົນຍາດໂຍມ ພຸດທະສາສະນິກະຊົນ ຊາວພຸດ ທີ່ເຫລື່ອມໃສສັດທາ, ລວມທັງເຈົ້າພາບ-ເຈົ້າສັດທາ ແມ່ນໄດ້ພ້ອມກັນ ນຸ່ງຂ່າວ-ຫົ່ມຂ່າວ ເຂົ້າຮ່ວມພິທີສົມໂພດພະພຸດທະຮູບ ເພື່ອນ້ອມຈິດອະທິຖານ ບໍາເພັນບຸນບາລະມີ ໃນດ້ານຕ່າງໆ ເພື່ອກໍ່ໃຫ້ເກີດຄວາມເປັນສິລິມົງຄຸນ ແກ່ຊີວິດ ທັງໃນປະຈຸບັນ ແລະ ອະນາຄົດ ພາຍພົບຫນ້າ, ແລະ ງານສົມໂພດ ພະພຸດທະຮູບ ທີ່ວັດຄອນສະຫວັນ ບ້ານທ່າພະໄຕ້ ແມ່ນມີຊາວພຸດ ກໍ່ຄືພຸດທະສາສະນິກະຊົນ ເຂົ້າຮ່ວມເປັນ ຈໍານວນຫລວງຫລາຍ ທີ່ມາຈາກ ສາລະທິດ ທັງບ້ານໃກ້ເຮືອນຄຽງ ແລະ ມວນຊົນ ທີ່ມາຈາກແຫ່ງອື່ນໆ ເຊິ່ງສະແດງໃຫ້ເຫັນເຖິງຄວາມເຫລີ້ມໃສສັດທາ ອັນແຮງກ້າ ຂອງຄົນລາວຊາວພຸດ.
ພາຍຫລັງສໍາເລັດເສັດຊິ້ນ ການສົມໂພດພະພຸດທະຮູບ ຕະຫລອດຄືນ ເຊົ້າຂອງວັນຕໍ່ ຄືວັນທີ 21 ມັງກອນ ແມ່ນໄດ້ມີພິທີເຮັດບຸນໃສ່ບາດ - ຖວາຍສັງຄະທານ, ພ້ອມທັງຖວາຍກອງບຸນ ຈໍານວນຫນຶ່ງ ທີ່ເຈົ້າພາບ-ເຈົ້າສັດທາ ໄດ້ເປັນເຈົ້າພາບ ທີ່ໄດ້ຕັງຂື້ນ ໄປພ້ອມໆກັນ ກັບງານສົມໂພດພະພຸດທະຮູບ. ໃນພິທີໃສ່ບາດ ແມ່ນມີອອກຕົນຍາດໂຍມ ເຂົ້າຮ່ວມເປັນ ຈໍານວນຫລວງຫລາຍ.
Editor: ກຳປານາດ ລັດຖະເຮົ້າ
