ນັບແຕ່ຫລວງພະບາງ ໄດ້ຖືກຮັບຮອງເປັນມໍລະດົກໂລກ ຈາກອົງການອຸຍເນັສໂກ ໃນປີ 1995 ທາງອໍານາດການປົກຄອງແຂວງຫລວງພະບາງ ໄດ້ມີນິຕິກໍາ. ກົດລະບຽບການຄຸ້ມຄອງປົກປັກຮັກສາ ມໍລະດົກໂລກ ໃຫ້ຍືນຍົງ ເປັນຕົ້ນແມ່ນ ການປົກປັກຮັກສາທາງດ້ານວັດທະນະທໍາ, ທໍາມະຊາດ ແລະ ສີ່ງແວດລ້ອມ. ໃນນັ້ນ ມີການກໍານົດເຂດມໍລະດົກ ແລະ ແຫລ່ງທ່ອງທ່ຽວ, ຂື້ນບັນຊີເຮືອນມໍລະດົກໂລກ, ສິ່ງສາທາລະນະ, ວັດວາອາຣາມ ແລະ ວັດຖຸສິ່ງຂອງຕ່າງໆ, ກໍານົດການປຸກສ້າງໃນເຂດມໍລະດົກ ຄວາມສູງບໍ່ໃຫ້ເກີນ 9 ແມັດ, ເຂດຊານເມືອງ ຄວາມສູງບໍ່ໃຫ້ເກີນ 12 ແມັດ,
ນອກນີ້, ຍັງໄດ້ມີລະບຽບການປົກປັກຮັກສາຄັນຄູ ແລະ ຕ້ານຕະຝັງເຈື່ອນ ຕາມອ້ອມຮອບແຄມຝັ່ງນໍ້າໃນຕົວເມືອງ, ປົກປັກຮັກສາປ່າໄມ້ ແລະ ທົ່ງນາຢູ່ເຂດເຂດ ບໍ່ໃຫ້ມີການບຸກລຸກທໍາລາຍ ແລະ ໃນໄລຍະຜ່ານມາ ແຂວງຫລວງພະບາງ ໄດ້ຈັດງານສະເຫລີມສະຫລອງ ຫລວງພະບາງເປັນມໍລະດົກໂລກ ຄົບຮອບ 20 ປີ, ເຊີ່ງເຮັດໃຫ້ຫລວງພະບາງ ເປັນທີ່ຫນ້າສົນໃຈຈາກແຂກຕ່າງດ້າວ, ທ້າວຕ່າງແດນ ເຂົ້າມາທ່ອງທ່ຽວເປັນຈໍານວນຫລວງຫລາຍ, ພ້ອມດຽວກັນນີ້. ກໍ່ໄດ້ມີນັກລົງທຶນຈາກພາຍໃນ ແລະ ຕ່າງປະເທດ ເຂົ້າມາລົງທຶນ ເປັນຕົ້ນແມ່ນ ໂຄງການກໍ່ສ້າງໂຮງແຮມ, ເຮືອນພັກ, ຮ້ານອາຫານ, ຣິສອດ ແລະ ອື່ນໆ ຫລາຍແຫ່ງ. ເພື່ອຮອງຮັບນັກທ່ອງທ່ຽວ ທີ່ເຂົ້າມາຢ້ຽມຊົມ ຫລວງພະບາງ ແລະ ນັ້ນຖືເປັນຈຸດເດັ່ນທີ່ເຮັດໃຫ້ແຂວງຫລວງພະບາງ ມີທ່ວງທ່າບາດກ້າວຂະຫຍາຕົວ ແລະ ໃບຫນ້າໃຫມ່.
Editor: ກຳປານາດ ລັດຖະເຮົ້າ
