ແຂວງບໍ່ແກ້ວ ເປັນແຂວງໜຶ່ງໃນ 18 ແຂວງຂອງລາວ ທີ່ມີດິນແດນສວຍສົດສວຍງາມທາງດ້ານທຳມະຊາດ ອຸດົມສົມບູນໄປດ້ວຍວັດທະນະທຳ ແລະ ຂຶ້ນຊື່ລືນາມທາງດ້ານປະຫັວດສາດ.
ແຂວງ ບໍ່ແກ້ວ ມີສະຖານທ່ອງທ່ຽວ ທີ່ຫນ້າທ່ຽວຊົມ ເຊັ່ນ: ທາງດ້ານວັດທະນະທຳ, ປະຫວັດສາດ ແລະ ທຳມະຊາດ. ຊຶ່ງແຫລ່ງທ່ອງທ່ຽວທາງດ້ານທຳມະຊາດພາຍໃນແຂວງບໍ່ແກ້ວ ທີ່ມີຊື່ສຽງ ແລະ ຫນ້າສຳຜັດ ເປັນຕົ້ນແມ່ນ: ປ່າສະຫງວນແຫ່ງຊາດນ້ຳກ່ານ ເປັນປ່າສະຫງວນທີ່ມີເນື້ອທີ່ເຖິງ 136.000 ເຮັກຕາ, ເປັນແຫລ່ງທ່ອງທ່ຽວທຳມະຊາດ ທີ່ຍັງຄົງຄວາມອຸດົມສົມບູນຂອງຕົ້ນໄມ້. ນອກນີ້, ກໍ່ຍັງມີ ບໍ່ນ້ຳຮ້ອນຫ້ວຍເລາະ, ນ້ຳຕົກຕາດນ້ຳຍອນ, ນ້ຳຕົກຕາດນ້ຳຕາ, ບໍ່ນ້ຳອຸ່ນ ແລະ ອີກຫລາກຫລາຍແຫ່ງ.
ສ່ວນແຫລ່ງທ່ອງທ່ຽວທາງດ້ານປະຫວັດສາດ ແຂວງບໍ່ແກ້ວ ແມ່ນຄ້າຍທະຫານຝຣັ່ງເກົ່າ, ເມືອງເກົ່າສຸວັນນະໂຄມຄຳ. ສ່ວນທາງດ້ານວັດທະນະທຳພາຍໃນແຂວງເດັ່ນໆ ແລະ ມີຊື່ສຽງກໍ່ຄື: ວັດຈອມເຂົາມະນີລັດ, ຫໍຫລັກເມືອງ, ຊົນເຜົ່າແລນແຕນ, ງານເທດສະການດອກງີ້ວບານ ແລະ ງານບຸນປະເພນີວັດທະນະທຳບັນດາເຜົ່າ ເຊິ່ງໄດ້ຈັດຂື້ນໃນທຸກໆປີ ເພື່ອສົ່ງເສີມການທ່ອງທ່ຽວ.
Editor: ດາວໄຊ ສີວິໄລ
