ແຂວງຈຳປາສັກ ເປັນອີກແຂວງໜຶ່ງ ໃນ 18 ແຂວງຂອງລາວ ທີ່ຢູ່ທາງພາກໃຕ້ ທີ່ອຸດົມສົມບູນໄປ ດ້ວຍທຳມະຊາດ ແລະ ຫລາກຫລາຍທາງວັດທະນະທຳ ແລະ ຮອງຮອຍທາງດ້ານປະຫັວດສາດ.
ແຂວງຈຳປາສັກ ມີແຫລ່ງທ່ອງທ່ຽວທາງດ້ານທຳມະຊາດ 112 ແຫ່ງ ຢັ່ງຢາຍຢູ່ໃນແຂວງ ເຊິ່ງມີຫລາຍແຫ່ງ ທີ່ມີຊື່ສຽງ ແລະ ຫນ້າສຳຜັດ ເປັນຕົ້ນຄື: ນ້ຳຕົກຕາດຄອນພະເພັງ ແມ່ນໜຶ່ງໃນຈໍານວນນໍ້າຕົກຕາດ ຂອງສາຍພູເຫຼັກ ອັນຍາວຢຽດ, ຂັ້ນຕອນລໍາແມ່ນໍ້າຂອງຕອນໃຕ້ຂອງປະເທດເຮົາ ທີ່ນອນຢູ່ດິນແດນ ເຂດມະຫານະທີ ສີພັນດອນ ເຊິ່ງມີຄວາມຍາວເຖິງ 15 ກິໂລແມັດ, ເປັນແຫລ່ງທ່ອງທ່ຽວທຳມະຊາດ ທີ່ຍັງຄົງຄວາມອຸດົມສົມບູນ ແລະ ສວຍສົດງົດງາມ. ນອກຈາກນີ້, ກໍ່ຍັງມີນ້ຳຕົກຕາດຜາສ້ວມ, ນ້ໍ້າຕົກຕາດຟານ, ນ້ໍ້າຕົກຕາດເຍືອງ, ນ້ໍາຕົກຕາດຈໍາປີ, ນ້ຳຕົກຕາດມ່ວນ, ນ້ໍາຕົກຕາດສົມພານິດ, ດອນແດງ, ພູສະເຫຼົ້າ, ພູບາຈຽງ ແລະ ອື່ນໆ.
ສ່ວນແຫລ່ງທ່ອງທ່ຽວທາງດ້ານປະຫວັດສາດ ມີ 40 ແຫ່ງ ທີ່ໂດດເດັ່ນ ແລະ ມີຊື່ສຽງ ແມ່ນ ຜາສາດຫີນວັດພູ ທີ່ຕັ້ງຢູ່ຝັ່ງຂວາຂອງແມ່ນໍ້າຂອງ ຫ່າງຈາກໃຈກາງແຂວງຈໍາປາສັກ ປະມານ 40 ກິໂລ ແມັດ, ນອກຈາກນັ້ນກໍ່ຍັງມີ ຂົວຝຣັ່ງ, ທາດສາມປາມ, ອຸມຸງເຮືອນຫີນ, ເມືອງບູຮານ ແລະ ພູອາສາ.
ສ່ວນທາງດ້ານວັດທະນະທຳ ມີ 60 ແຫ່ງ ໂດດເດັ່ນ ແລະ ມີຊື່ສຽງກໍ່ຄື: ວັດຫຼວງ, ວັດຈອມເພັດ, ຫໍພະແກ້ວ, ແກະສະຫຼັກຫີນ, ຕະຫຼາດດາວເຮືອງ, ຫັດຖະກຳຕ່ຳແຜ່ນ, ເຮືອນເກົ່າແກ່ຂອງລາວພາກໃຕ້, ຫີນບູຮານ,ປູກມອນ-ລ້ຽງມ້ອນ-ສາວໄໝ, ຫີນບູຮານ, ຫັດຖະກໍາກະໂຕກຫວາຍ, ເຮືອນຊົນເຜົ່າລະເວນ, ເຮືອນເຜົ່າຍະເຫີນ,ເຮືອນເຜົ່າໂອຍ ແລະ ງານບຸນປະເພນີວັດທະນະທຳບັນດາເຜົ່າ. ເຊິ່ງໄດ້ຈັດຂຶ້ນໃນທຸກໆປີ ເພື່ອສົ່ງເສີມການທ່ອງທ່ຽວ.
Editor: ແຂວງຈຳປາສັກ
