ໃນວັນທີ 25 ມັງກອນ 2018 ຜ່ານມານີ້, ກະຊວງໄປສະນີ ໂທລະຄົມມະນາຄົມ ແລະ ການສື່ສານ ສປປ ລາວ ໄດ້ເປັນເຈົ້າພາບ ຮ່ວມກັບ ສະມາຄົມຜູ້ບໍລິຫານ ໄອຊີທີ ອາຊຽນ ຈັດກອງປະຊຸມ ສົນທະນາ ຜູ້ບໍລິຫານ ໄອຊີທີ ອາຊຽນຄັ້ງທີ 6 ຂື້ນທີ່ ນະຄອນຫຼວງວຽງຈັນ ສປປລາວ, ໃຫ້ກຽດເປັນປະທານ ແລະ ກ່າວເປີດກອງປະຊຸມໂດຍ ທ່ານ ປອ ທັນສະໄໝ ກົມມະສິດ ລັດຖະມົນຕີ ກະຊວງໄປສະນີ, ໂທລະຄົມມະນາຄົມ ແລະ ການສື່ສານ ເປັນກຽດເຂົ້າຮ່ວມມີບັນດາ ລັດຖະມົນຕີ - ຮອງລັດຖະມົນຕີ ຂອງບັນດາປະເທດ ອາຊຽນ, ຫົວໜ້າອົງການຈັດຕັ້ງສາກົນ ຜູ້ບໍລິຫານ ແລະ ປະກອບການດ້ານໄອຊີທີ ຈາກ 10 ປະເທດອາຊຽນເຂົ້າຮ່ວມ.
ກອງປະຊຸມຄັ້ງນີ້ ເປັນໜຶ່ງໃນກິດຈະກຳເຄື່ອນໄຫວພາຍໃຕ້ແຜນງານດ້ານເຕັກໂນໂລຊີຂໍ້ມູນຂ່າວສື່ສານຂອງອາຊຽນ ເພື່ອສ້າງໂອກາດໃຫ້ບັນດາຜູ້ບໍລິຫານໄອຊີທີ ໄດ້ມີການພົບປະແລກປ່ຽນບົດຮຽນ ແລະ ປະສົບການໃນການຄຸ້ມຄອງບໍລິຫານ ແລະ ພັດທະນາໄອຊີທີ ໃນຂະແໜງການຂອງຕົນໃຫ້ມີຄວາມເຂັ້ມແຂງ ແລະ ທັນສະໄໝ ທັງເປັນການສ້າງຄວາມເຂົ້າໃຈ ແລະ ສາຍພົວພັນຮ່ວມມືໃນການພັດທະນາເຕັກໂນໂລຊີ ຮ່ວມກັນຂອງບັນດາປະເທດອາຊຽນໃນອະນາຄົດ ເປັນຕົ້ນແມ່ນ ການກຳນົດກົດໝາຍ ກົດໝາຍ ການຕ້ານອາຊະຍາກຳທາງດ້ານຄອມພິວເຕີ ແລະ ກົດໝາຍປົກປ້ອງຂໍ້ມູນຂ່າວສານ ເພື່ອຮອງຮັບການຂະຫຍາຍຕົວ ແລະ ຊົມໃຊ້ທາງດ້ານເຕັກໂນໂລຊີໃຫ້ມີຄວາມຖືກຕ້ອງ ແລະ ສອດຄ່ອງກັບການພັດທະນາເສດຖະກິດ-ສັງຄົມຂອງແຕ່ລະປະເທດ.
ທ່ານ ປອ ທັນສະໄໝ ກົມມະສິດ ລັດຖະມົນຕີ ກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ ກ່າວວ່າ: ສຳລັບຢູ່ລາວເພື່ອເຮັດໃຫ້ວຽກງານໄອຊີທີ ບັນລຸເປົ້າໝາຍໄລຍະຜ່ານມາລັດຖະບານ ໄດ້ສຸມໃສ່ຫຼາຍບັນຫາ ເພື່ອສົ່ງເສີມການເຕີບໂຕຂອງອຸດສາຫະກຳໄອຊີທີ ຂອງແຕ່ລະໄລຍະ ເຊັ່ນ: ການກຳນົດນະໂຍບາຍແຜນພັດທະນາວິໄສທັດ 2030, ຍຸດທະສາດ 2025 ແລະ ແຜນພັດທະນາວຽກງານແຕ່ລະດ້ານ ຮອດປີ 2020. ນອກນີ້, ຍັງໄດ້ເຮັດວຽກຢ່າງໃກ້ຊິດກັບອົງການຈັດຕັ້ງສາກົນໃນພາກພື້ນ ແລະ ສາກົນ, ເພື່ອເຮັດໃຫ້ວຽກງານແຕ່ລະຂະແໜງການບັນລຸເປົ້າໝາຍ ຄຽງຄູ່ກັນນັ້ນ ລັດຖະບານຍັງໄດ້ອອກກົດໝາຍໄອຊີທີ ກົດໝາຍ ກ່ຽວກັບ ການອາຊະຍາກຳ ທາງຄອມພິວເຕີ ແລະ ກົດໝາຍວ່າດ້ວຍການປົກປ້ອງຂໍ້ມູນ ສ້າງຕັ້ງໜ່ວຍງານສຸກເສີນທາງຄອມພິວເຕີ ສູນຄວາມຖີ່ທາງວິທະຍຸ - ສູນອິນເຕີເນັດ ສຳລັບພື້ນຖານໂຄງລ່າງ ແລະ ອື່ນໆ ເພື່ອສະໜັບສະໜູນຜູ້ປະຕິບັດການດ້ານໂທລະຄົມມະນາຄົມ ໃນການຂະຫຍາຍພື້ນທີ່ການເຊື່ອມຕໍ່ ໃຫ້ໄດ້ໃນຂອບເຂດທົ່ວປະເທດຢ່າງທົ່ວເຖິງ.
Editor: ກຳປານາດ ລັດຖະເຮົ້າ
