ເມືອງລະຄອນເພັງ ແຂວງສາລະວັນ, ເປີດປີທ່ອງທ່ຽວໃນວັນ 25 ມັງກອນ 2018 ກົງກັບມື້ງານບຸນນະມັດສະການວັດພະບາດ ບ້ານນາດູ ເຊິ່ງພາຍໃນງານມີຫຼາຍກິດຈະກໍາເຊັ່ນ: ມີການວາງສະແດງສິນຄ້າກະສິກໍາ-ຫັດຖະກໍາທ້ອງຖິ່ນຂອງເມືອງ, ມີການສະແດງສິນລະປະ-ວັນນະຄະດີ, ມີການປະກວດນາງສາວເຂົ້າຂາວຫອມອ່ອນ, ການແຂ່ງຂັນຊົກມວຍລາຍລາວ, ມີຂະບວນແຮ່ບົດຟອ້ນເຊີນທ່ຽວເມືອງລະຄອນເພັງ, ຂະບວນແຮ່ຕົ້ນເງິນ ແລະພິທີຖວາຍຕົ້ນເງິນ, ໃສບາດຢາດນໍ້າ ແລະພິທີທາງສາດສະໜາອື່ນໆ.

ໃນພິທີ ທ່ານ ໜູໄຊ ຈັນດາວົງ ຮອງເຈົ້າເມືອງ, ຜູ້ຊີ້ນໍາວຽກງານວັດທະນະທໍາ-ສັງຄົມ ປະທານຈັດງານປີທ່ອງທ່ຽວລາວ ເມືອງລະຄອນເພັງ ໄດ້ລາຍງານວ່າ: ຈຸດປະສົງຂອງການຈັດງານທ່ອງທ່ຽວຄັ້ງນີ້ແມ່ນເພື່ອອະນຸລັກຮັກສາວັດທະນາທຳຮິດຄອງປະເພນີອັນດີງາມຂອງຊາດ, ຂອງທ້ອງຖິ່ນໃຫ້ຍັງຄົງຢູ່ຄູ່ກັບເຊັ່ນລູກເຊັ່ນຫຼານ, ທັງເປັນການສ້າງວຽກເຮັກງານທຳໃຫ້ປະຊາຊົນໃນທ້ອງຖິ່ນໃຫ້ມີລາຍໄດ້ໃນທ້ອງຖິ່ນຈາກການທ່ອງທຽ່ວ, ເພີ່ມກຳລັງແຮງໃນດ້ານຄວາມສາມະຄີພາຍໃນໃຫ້ແໜ້ນແກ່ນ ແລະ ພາຍນອກໃຫ້ກວ້າງຂວາງ, ເພື່ອດຶງດູດນັກທ່ອງທ່ຽວທັງພາຍໃນ ແລະຕ່າງປະເທດມາໃຫ້ຫຼາຍຂື້ນ, ທັງເປັນຊຸກຍູ້ການລົງທຶນດ້ານທຸລະກິດທາງກົງ ແລະທາງອ້ອມເຊັ່ນ ທຸລະກິດນຳທ່ຽວສະຖານທີພັກພັກແຮມ, ຫ້ານອາອານ, ສະຖານທີ່ບັນເທີງ, ການຂົນສົ່ງ ແລະການຊື້ຂາຍເຄື່ອງທີ່ລະລຶກ ແລະອື່ນໆ, ເພື່ອພັດທະນາພື້ນຖານໂຄງລາງສະຖານທີທ່ອງທ່ຽວທາງດ້ານວັດທະນະທຳ, ທຳມະຊາດ ແລະປະຫວັດສາດ.

ຈາກນັ້ນ ທ່ານ ບຸນທຽມ ແກ້ວໄຊຍະວົງ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງສາລະວັນ ແລະທ່ານ ແກ້ວຜາ ສີລາດວງໃຈ ຮັກສາການເລຂາພັກເມືອງລະຄອນເພັງ ກໍ່ໄດ້ໃຫ້ກຽດຕັດແຖບຜ້າ, ປ່ອຍປຸມເປົ້າ ແລະລັ່ນຄອງ 9 ບາດເປີດງານປີທ່ອງທ່ຽວລາວ ປີ 2018 ຂອງເມືອງລະຄອນເພັງ ແຂວງສາລະວັນຢ່າງເປັນທາງການ ໂດຍມີການນໍາຈາກແຂວງ, ເມືອງ, ພະເຖລານຸເທລະ, ພະນັກງານວິຊາການ, ອໍານາດການປົກບ້ານ ແລະມວນຊົນເຂົ້າຮ່ວມຢ່າງຫຼວງຫຼາຍ. ສໍາລັບບຸນນະມັດສະການວັດພະບາດ ບ້ານນາດູ ເມືອງລະຄອນເພັງແຂວງສາລະວັນຈະໄດ້ດໍາໄປເລີມແຕ່ວັນ 25 ຫາ 31 ມັງກອນ 2018 ຈິງສຳເລັດ.

ແຫລ່ງຂ່າວ ຖວທ ເມືອງລະຄອນເພັງ

Editor: ກຳປານາດ ລັດຖະເຮົ້າ