ແຂວງຈຳປາສັກ ໄດ້ຈັດພິທີເປີດປີທ່ອງທ່ຽວລາວ 2018ພ້ອມກັບງານບຸນນະມັດສະການຜາສາດຫີນວັດພູ ມໍລະດົກໂລກຂຶ້ນຢ່າງເປັນທາງການໃນວັນທີ29 ມັງກອນ 2018 ນີ້, ທີ່ວັດພູຈໍາປາສັກ, ແຂວງຈຳປາສັກ ໂດຍໃຫ້ກຽດເຂົ້າຮ່ວມຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ປະທານຊີ້ນຳລະດັບຊາດການຈັດງານປີທ່ອງທ່ຽວລາວ2018, ທ່ານ ບໍ່ແສງຄໍາ ວົງດາລາ ລັດຖະມົນຕີກະຊວງຖະແຫຼງຂ່າວ,ວັດທະນະທຳແລະທ່ອງທ່ຽວ, ຮອງປະທານຊີ້ນໍາລະດັບຊາດການຈັດງານປີທ່ອງທ່ຽວລາວ2018, ມີບັນດາເຈົ້າແຂວງ, ຮອງເຈົ້າແຂວງຈຳປາສັກ, ຮອງເຈົ້າແຂວງສາລະວັນ, ແຂວງອັດຕະປີ, ພ້ອມດ້ວຍແຂກພາຍໃນ, ຕ່າງປະເທດ ແລະ ພໍ່ແມ່ພີ່ນ້ອງຊາວແຂວງຈຳປາສັກເຂົ້າຮ່ວມຢ່າງຫຼວງຫຼາຍ.
ທ່ານ ສອນໄຊ ສີພັນດອນ ຮອງນາຍົກລົດຖະມົນຕີ, ທ່ານ ບຸນຖອງ ດີວິໄຊ ເຈົ້າແຂວງໆຈໍາປາສັກ ພ້ອມບັນດາແຂກທີ່ເຂົ້າໄດ້ກັນຮ່ວມລັນຄ້ອງ 9 ບາດ, ປ່ອຍປຸມເປົ້າ ແລະ ປ່ອຍນົກສັນຕິພາບ9 ໂຕ ເພື່ອເປັນສິລິມຸງຄຸນ ໃຫ້ແກ່ພິທີເປີດງານຢ່າງເປັນທາງການ, ສໍາລັບກິດຈະກຳໃນງານ ແມ່ນຈະດຳເນີນເປັນເວລາ3 ມື້ 3 ຄືນ ແຕ່ວັນທີ 29-31 ມັງກອນ 2018 ນີ້, ເຊິ່ງມີຫຼາກຫຼາຍກິດຈະກຳການສະແດງສິລະປະວັດທະນະທໍາ, ການວາງສະແດງສິນຄ້າ, ການຈໍາໜ່າຍສິນຄ້າ, ການແຂ່ງຂັນກີລາພື້ນເມືອງ ແລະ ອື່ນໆ.
ທ່ານ ບຸນຖອງ ດີວິໄຊ ເຈົ້າແຂວງຈຳປາສັກໄດ້ສະແດງຄວາມຂອບໃຈເປັນຢ່າງຍິ່ງ, ສັນລະເສີນຊົມເຊີຍຢ່າງຈິງໃຈ ແລະ ກ່າວຕ້ອນຮັບອັນອົບອຸ່ນ ຕໍ່ການເຂົ້າຮ່ວມຂອງທຸກພາກສ່ວນ ສູ່ດິນແດນອະລິຍະທຳ, ອຸດົມຮັ່ງມີ ແລະ ສວຍງາມ ກໍຄືງານບຸນນະມັດສະການຜາສາດຫີນວັດພູ ແລະ ພິທີເປີດປີທ່ອງທ່ຽວລາວ 2018 ນີ້. ນັບແຕ່ໃດໆມາ, ງານນະມັດສະການຜາສາຫີນວັດພູ ໄດ້ຈັດຂຶ້ນເປັນປົກກະຕິໃນແຕ່ລະປີ,ພາຍຫຼັງໄດ້ຈັດເຂົ້າເປັນມໍລະດົກໂລກແລ້ວ ໃນທຸກຮອບ 5ປີໃດ ອໍານາດການປົກຄອງແຂວງ,ເມືອງ ພ້ອມກັບພໍ່ແມ່ປະຊາຊົນໃນທົ່ວແຂວງ ໄດ້ຈັດພິທີສະເຫຼີມສະຫຼອງຢ່າງຍິ່ງໃຫຍ່ຄຶກຄື້ນ. ສະເພາະບຸນປີນີ້ແມ່ນໄດ້ຈັດຂຶ້ນຢ່າງຍິ່ງໃຫຍ່ ພ້ອມກັບການເປີດປີທ່ອງທ່ຽວລາວ 2018 ເພື່ອເຮັດໃຫ້ການທ່ອງທ່ຽວລາວ-ການທ່ອງທ່ຽວແຂວງຈຳປາສັກ ໄດ້ສຳຜັດເຖິງດ້ານບັນຍາກາດ,ທາງດ້ານຮີດຄອງປະເພນີ ແລະ ວັດທະນະທຳອັນດີງາມ ທີ່ມີມາແຕ່ບູຮານນະການ. ໃນພິທີດັ່ງກ່າວເລີ່ມດ້ວຍ ການເດີນຂະບວນຂອງກ້ອນກຳລັງທຸງຊາດ,ກອງຕຸລິຢາງເຍົາວະຊົນ, ຂະບວນທຸງທິວ 7 ສີ, ປ້າຍມໍລະດົກໂລກ, ປ້າຍປີທ່ອງທ່ຽວລາວ, ລົດແຫ່ຮູບຈໍາລອງໂຮງຊາວ, ຂະບວນແຫ່ຟ້ອນທີ່ເປັນເອກະລັກຂອງບັນດາ10 ຕົວເມືອງຂອງແຂວງຈຳປາສັກ.
ໂອກາດດຽວກັນ, ທ່ານ ບົວລິນ ວົງພະຈັນ ຮອງເຈົ້າແຂວງໆຈຳປາສັກ,ຮອງປະທານຄະນະຮັບຜິດຊອບຊີ້ນຳຂັ້ນແຂວງໃຫ້ຮູ້ວ່າ: ໃນປີ 2017ມີນັກທ່ອງທ່ຽວເຂົ້າມາ799.054ເທື່ອຄົນ, ສ້າງລາຍຮັບໄດ້ 123,2 ລ້ານໂດລາສະຫະລັດ. ສະເພາະປີທ່ອງທ່ຽວລາວ2018 ນີ້ ຄາດວ່າຈະມີນັກທ່ອງທ່ຽວເຂົ້າມາບໍ່ຫລຸດ 917.700 ເທື່ອຄົນ ແລະ ຄາດຄະເນສ້າງລາຍຮັບປະມານ 140 ລ້ານໂດລາສະຫະລັດ.ສໍາລັບ ສະຖານທີ່ຮອງຮັບໃຫ້ແກ່ການທ່ອງທ່ຽວລາວ 2018ນີ້, ຢູ່ແຂວງຈໍາປາສັກມີແຫຼງທ່ອງທ່ຽວທັງໝົດ 216 ແຫ່ງ, ແຫຼງທ່ອງທ່ຽວທໍາມະຊາດ 116 ແຫ່ງ, ແຫຼງທ່ອງທ່ຽວປະຫວັດສາດ 40 ແຫ່ງ ແລະ ແຫຼງທ່ອງທ່ຽວທາງວັດທະນະທໍາ 60 ແຫ່ງ, ມີໂຮງແຮມ 66 ແຫ່ງ, ຣີຊອດ 08 ແຫ່ງ, ເຮືອນພັກ 162 ແຫ່ງ.
Editor: ກຳປານາດ ລັດຖະເຮົ້າ
