ໃນວັນທີ 29 ມັງກອນ 2018 ທີ່ວັດພູຈຳປາສັກ ເມືອງ ແລະ ແຂວງຈຳປາສັກ, ໄດ້ຈັດພິທີເປີດປີທ່ອງທ່ຽວລາວ 2018, ພ້ອມຈັດງານສະເຫລີມສະຫລອງ ບຸນນະມັດສະການຜາສາດຫີນວັດພູ, ໂດຍເປັນການປະຕິບັດຕາມ ແຜນການເຄື່ອນໄຫວຈັດກິດຈະກຳປີທ່ອງທ່ຽວລາວ ເພື່ອເປັນການຊຸກຍູ້ສົ່ງເສີມການທ່ອງທ່ຽວພາຍໃນ “ລາວທ່ຽວລາວ” ໄປພ້ອມກັບການຈັດກິດຈະກຳໂຄສະນາດຶງດູດເອົານັກທ່ອງທ່ຽວ ແລະ ນັກລົງທຶນຕ່າງປະເທດ ໃຫ້ເຂົ້າມາທ່ຽວ ແລະ ມາລົງທຶນຢູ່ພາຍໃນປະເທດໃຫ້ຫລາຍຂຶ້ນ.
ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ທັງເປັນປະທານຊີ້ນຳລະດັບຊາດການຈັດງານປີທ່ອງທ່ຽວລາວ 2018 ໄດ້ໃຫ້ກຽດລັ່ງຄ້ອງ 9 ບາດ ເພື່ອເປີດງານດັ່ງກ່າວ, ເຊິ່ງມີ ທ່ານ ບຸນຖອງ ດີວິໄຊ ເຈົ້າແຂວງໆຈຳປາສັກ, ມີບັນດາ ຄະນະພັກ, ຄະນະນຳແຂວງ, ບັນດາຜູ້ຕາງໜ້າຈາກແຂວງອ້ອມຂ້າງ, ກະຊວງ, ກົມກອງທີ່ກ່ຽວຂ້ອງ, ແຂກພາຍໃນ ແລະ ຕ່າງປະເທດ, ພ້ອມດ້ວຍພໍ່ແມ່ປະຊາຊົນຊາວເມືອງຈຳປາສັກ ແລະ ບັນດາເມືອງອ້ອມຂ້າງ ແຂວງຈຳປາສັກ ເຂົ້າຮ່ວມຢ່າງເປັນຂະບວນຟົດຟື້ນ.
ໃນໂອກາດນີ້, ທ່ານ ບຸນຖອງ ດີວິໄຊ ໄດ້ສະແດງຄວາມຂອບໃຈເປັນຢ່າງຍິ່ງ, ສັນລະເສີນຊົມເຊີຍຢ່າງຈິງໃຈ ແລະ ຕ້ອນຮັບອັນອົບອຸ່ນ ຕໍ່ການເຂົ້າຮ່ວມຂອງທຸກພາກສ່ວນສູ່ດິນແດນອະລິຍະທຳ, ອຸດົມຮັ່ງມີ ແລະ ສວຍງາມແຫ່ງນີ້ ກໍຄື ງານບຸນນະມັດສະການຜາສາດຫີນວັດພູ ແລະ ພິທີເປີດປີທ່ອງທ່ຽວລາວ 2018. ສະຖານບູຮານວັດພູ ແມ່ນການອອກແບບທີ່ຍອດຢ້ຽມຂອງຄົນບູຮານ, ໜ້າງຶດງໍ້ອັດສະຈັນ ເມື່ອຫວນຄືນເຖິງການກໍ່ສ້າງໃນສະ ໄໝນັ້ນ ເຊັ່ນ: ການຄວັດແກະສະຫລັກ, ດອກດວງໃສ່ແຜ່ນຫີນ, ກ້ອນຫີນ ສຸດທີ່ປານີດບັນຈົງ, ການຍົກຍໍກໍ່ສ້າງດ້ວຍໂງ່ນຫີນກ້ອນໃຫຍ່ໆຂຶ້ນແຕ່ລະແທ່ນ, ແຕ່ລະຊັ້ນ ແລະ ແຕ່ລະດ້ານ ສຸດທີ່ສູງຊັນທຸລະກັນດານ ແລະ ອື່ນໆ.
ມາຮອດປັດຈຸບັນ ສະຖານບູຮານແຫ່ງນີ້ ແມ່ນໜຶ່ງທີ່ນອນໃນ 1.031 ແຫ່ງຂອງ 163 ປະເທດ ໃນທົ່ວໂລກ, ເປັນມໍລະດົກແຫ່ງທີ 2 ຂອງ ສປປ ລາວ ແລະ ແມ່ນໜຶ່ງໃນ 216 ແຫລ່ງທ່ອງທ່ຽວຂອງແຂວງຈຳປາສັກ. ນອກຈາກນັ້ນ, ຍັງເປັນສາງຄັງສະສົມວັດຖຸບູຮານເກົ່າແກ່ ແລະ ສິ່ງສັກສິດຫລາຍຢ່າງ ເຊິ່ງເປັນແມ່ເຫລັກດຶງດູດນັກທ່ອງທ່ຽວ, ນັກຄົ້ນຄວ້າ, ນັກບູຮານຄະດີ ທັງພາຍໃນ ແລະ ຕ່າງປະເທດ ເຂົ້າມາທ່ຽວຊົມ, ສຶກສາຄົ້ນຄວ້າ, ກາບໄຫວ້ແຕ່ລະປີເປັນຈຳນວນຫລວງຫລາຍ ແລະ ແມ່ນແຫລ່ງທີ່ສ້າງລາຍຮັບປອດມົນລະພິດ ທີ່ບໍ່ບົກແຫ່ງເປັນຈັກເທື່ອ. ນັບແຕ່ໃດໆມາ, ງານນະມັດສະການຜາສາຫີນວັດພູ ໄດ້ຈັດຂຶ້ນເປັນປົກກະຕິໃນແຕ່ລະປີ, ພາຍ ຫລັງເຂົ້າເປັນມໍລະດົກໂລກແລ້ວ ໃນທຸກຮອບ 5 ປີໃດ ອຳນາດການປົກຄອງແຂວງ, ເມືອງ ພ້ອມກັບພໍ່ແມ່ປະຊາຊົນໃນທົ່ວແຂວງ ໄດ້ຈັດພິທີສະເຫລີມສະຫລອງຢ່າງຄຶກຄື້ນ. ສະເພາະບຸນປີນີ້, ໄດ້ຈັດຂຶ້ນຢ່າງຍິ່ງໃຫຍ່ພ້ອມກັບການເປີດປີທ່ອງທ່ຽວລາວ 2018 ເພື່ອເຮັດໃຫ້ການທ່ອງທ່ຽວລາວ-ທ່ອງທ່ຽວຈຳປາສັກ ໄດ້ສຳຜັດກັບບັນຍາກາດເທດສະການ ທາງຮີດຄອງປະເພນີ ແລະ ວັດທະນະທຳອັນດີງາມ ທີ່ມີມາແຕ່ບູຮານນະການ.
ສຳລັບການຈັດງານໃນປີນີ້, ແມ່ນຈະດຳເນີນໃນລະຫວ່າງວັນທີ 29-31 ມັງກອນ 2018, ຊຶ່ງປະກອບດ້ວຍຫລາຍກິດຈະກຳ ເຊັ່ນ: ຂະບວນແຫ່ງກ້ອນກຳລັງຕ່າງໆ ຂອງ 10 ຕົວເມືອງ ຂອງແຂວງຈຳປາສັກທີ່ເປັນເອກະລັກ ໂດຍລຽງຕາມຕົວອັກສອນ, ຂະບວນແຫ່ຂອງກ້ອນກຳລັງອື່ນໆ, ຂະບວນຟ້ອນ, ການສະແດງຄອນເສີດ ແລະ ການສະແດງສິລະປະຕ່າງໆ, ການວາງສະແດງສິນຄ້າທັງພາຍໃນ ແລະ ຕ່າງປະເທດ, ພິທີຕັກບາດ, ການແຂ່ງຂັນກິລາພື້ນເມືອງ, ພິທີວຽນທຽນ, ລວມທັງການສະແດງສິລະປະວັນນະຄະດີຂອງທ້ອງຖິ່ນ.
ທ່ານ ບົວລິນ ວົງພະຈັນ ຮອງເຈົ້າແຂວງໆຈຳປາສັກ, ຮອງປະທານຄະນະຮັບຜິດຊອບຊີ້ນຳຂັ້ນແຂວງກ່າວວ່າ: ໃນປີ 2011 ມີນັກທ່ອງທ່ຽວເຂົ້າມາທ່ຽວແຂວງຈຳປາສັກ 333.921 ເທື່ອຄົນ, ສ້າງລາຍຮັບໄດ້ 30,6 ລ້ານກວ່າໂດລາສະຫະລັດ, ມາຮອດປີ 2015 ນັກທ່ອງທ່ຽວເພີ່ມຂຶ້ນເປັນ 611.244 ເທື່ອຄົນ, ສ້າງລາຍຮັບໄດ້ 67,4 ລ້ານກວ່າໂດລາສະຫະລັດ ແລະ ໃນປີ 2017 ມີນັກທ່ອງທ່ຽວເຂົ້າມາ 799.054 ເທື່ອຄົນ, ສ້າງລາຍຮັບໄດ້ 123,2 ລ້ານໂດລາສະຫະລັດ.
ສະເພາະປີທ່ອງທ່ຽວລາວ 2018 ນີ້ ຄາດວ່າຈະມີນັກທ່ອງທ່ຽວເຂົ້າມາບໍ່ຫລຸດ 917.700 ເທື່ອຄົນ ແລະ ຄາດຄະເນສ້າງລາຍຮັບປະມານ 140 ລ້ານໂດລາສະຫະລັດ.

Editor: ຂ່າວສານປະເທດລາວ